لو ده أول حمل ليكي (ولو مش أول برضو) فأتمنى إنك تستفيدي من النصايح دي، اللي بنقلهالك من وحي تجربتي المتواضعة
أهم نصائح للحامل في الشهور الأولى وكل الشهور
- اقرئي واتعلمي، متعتمديش على الدكتور بتاعك بس، حتى لو كان كويس وشاطر، لأن فيه تفاصيل كتيرة أوي ومعلومات مفيدة مش هتعرفيها إلا لو سعيتي بنفسك إنك تعرفي، ده غير إن وقت الدكتور مش هيسمح إنه يقولك كل حاجة.
- اقرئي واتعلمي من أول يوم، عشان فيه معلومات كل ما هتعرفيها من بدري هيكون أحسن.
- لما تضطري تقللي حركتك وتقعدي في البيت فترات طويلة، خاصة لو كنتي في الطبيعي واخدة على الخروج، متستسلميش لضيقك، لكن استغلي الوقت ده في إنك تعملي حاجات كنتي محتاجة تقعدي في البيت عشان تعمليها، زي القراءة، الكتابة، الأنتخة، الترويق الخفيف في البيت، الرسم، الرغي في التليفون… إلخ.
- استغلي الموقف واتدلعي على جوزك شوية، لو متدلعتيش دلوقتي هتتدلعي امتى يعني؟!
- بالنسبة للبس الحمل، متشتريش حاجات كتير، فمثلًا ممكن تجيبي بنطلون جينز (أو اتنين عشان لو واحد اتقطع أو بيتغسل أو أي حاجة) وتضربي عليه من فوق أي حاجة عندك تكون مناسبة تلبسيها فترة الحمل، ولو مش عندك اشتري بلوزات وتونيكات (4 قطع مثلًا في رأيي عدد مناسب جدًا) ولو ينفع تبقى حاجات ممكن تلبسيها كمان في غير الحمل يبقى كويس.
تعرفي أيضًا على: كل ما يهمك عن الحمل في الطفل الثاني، الأعراض والولادة، في أي أسبوع الولادة
- خليكي باردة شوية.. أيوة، خليكي باردة، يعني لو إنتي حامية وبتحبي تعملي كل حاجة بسرعة وفي الحال وعلى أكمل وجه زي حالاتي، لازم تتقبلي إن ده مش ممكن يحصل في الحمل، حفاظًا على صحتك وصحة ابنك أو بنتك.
- تقبلي إن مجهودك هيقل، وإنك هتبقي عاوزة تنامي كتير وتستريحي كتير.. تقبلي ده عادي جدًا من غير ما تحسي بالذنب. وعلى فكرة النوم من الحاجات المهمة جدًا لصحتك أثناء الحمل، وكمان لصحة الجنين، لأن هرمونات الحمل بتفرز أكتر وإنتي نايمة.
- اطلبي المساعدة، الناس لبعضيها، مش عيب ولا ضعف ولا دلع، طالما إنك محتاجاها، وغالبًا إنتي فعلًا هتحتاجيها، بالذات وأنتِ حامل في الشهور الأولى، خاصة لو حملك مش مستقر. ده غير إن أول 3 شهور بيكونوا محتاجين راحة، وإنتي بتبقي عاوزة تنامي كتير، ويمكن كمان تبقي بتعاني من أعراض الحمل زي الغثيان والصداع… إلخ، ودي بتختلف حدتها من ست للتانية. ويمكن تحتاجي المساعدة كمان في آخر 3 شهور لما تتقلي وتبقي بتتعبي بسرعة من الوقفة.
- احرصي كل الحرص إنك تفضلي في بيتك، وإنتي وجوزك دبروا أموركم مع بعض، والأهل يساعدوكم قدر المستطاع وإنتو في بيتكم، دي حاجة هتقرب بينك وبين جوزك أكتر وتخليه حاسس بيكي أكتر.
- فضفضي.. في فترة الحمل هتمري بمشاعر كتير، وتقلبات مزاجية ملهاش سبب أحيانًا. تعملي إيه؟ أولًا اطمني؛ إنتي طبيعية، وتقبلي ده كجزء طبيعي من الحمل. ثانيًا متستسلميش للمشاعر دي. وثالثًا فضفضي مع حد بترتاحيله واتكلمي عن مخاوفك وأفكارك.
وأخيرًا.. استمتعي بالتجربة المميزة دي في حياتك!
تعرفي على: 10نصائح للحامل لتخفيف الإرهاق
تعرفي على: أجمل هدايا للأم بمناسبة الولادة: 10 هدايا غير تقليدية
