دايمًا في حكايات الستات مع بعض بيبقى فيه فقرة ثابتة بيشتكوا فيها من الراجل اللي في حياتهم، سواء كان زوج أو خطيب أو حبيب٬ بس طبعًا الإقبال على الشكوى من الأزواج تاريخية يا فندم٬ وتلاقيهم كلهم قاعدين يردوا على بعض بنفس أداء الإعلان بتاع “أيوة أنا عندي نفس المشكلة دي”.
أحيانًا اختلاف وجهات النظر بيكون سببه اختلافات الشخصيات، وأحيانًا بيكون بسبب انعدام الحوار بين الزوجين، في حاجات هي بتبقى عايزة توصلها لجوزها مش عارفة تعبر عنها، أو متخيلة إنه مش هيفهمها أو هيتهمها بالنكد.
هنحاول هنا نقول للراجل خمس حاجات مراته عايزة تقولهاله ومعلومات مفيدة عن النساء بشكل عام، وأسرار عن النساء مكانش حد بيعرفهالك قبل كدة.
الجنس حلو بس مش طول الوقت
المشكلة الأبدية اللي بين الرجالة والستات في الخناقات٬ واللي بتخلي الخناقة بعد ما تخلص تبتدي تاني من أول وجديد واحتمال تكون أعنف٬ إن الراجل بيستخدم العلاقة الجنسية في التعبير عن حبه، بغض النظر عن الموقف٬ يعني لو متخانقين واتصالحوا بيبقى عايز يعبرلها عن إنه صفي تمامًا ولسة بيحبها بنفس القدر٬ أو لو متخاصمين بيحاول يصالحها ويعرفها إنه بيحبها ومش عايز يفضلوا متخاصمين.
عزيزي الراجل.. الست في اللحظة دي بتتخيل إنك مش مهتم إنها زعلانة أو محبطة أو متضايقة منك، وكل اللي يهمك هو إشباع رغبتك على حسابها٬ هي مبتبقاش شايفة دي رومانسية خالص، هي بتبقى شايفاها تجاهل لمشاعرها. طبعًا مفيش حاجة ثابتة المفروض تتعمل عشان سوء التفاهم يخلص، بس في الغالب الستات بيكونوا محتاجين أي حاجة تانية غير العلاقة الحميمة.
تعرفي على: المزلق الحميمي: ما فوائد المزلق وأضراره وطريقة استخدامه
الكلام هو الطريقة الوحيدة للتواصل
رغم إن الرجالة معظمهم بيشوفوا إن الصمت والهدوء بيحل كل الخلافات، إلا إن الست بتكون شايفة إن لما يكون فيه سوء تفاهم بينكم أو عندك مشاكل في الشغل أو محتاج دعم في حتة معينة أو مخنوق أو متضايق أو حتى عايز تاخد جنب وتسكت وتركز في الفراغ٬ إنك تتكلم معاها وتفهمها ده بوضوح، وهي هتديك مساحتك، لكن الصمت من البداية للنهاية هي مش بتفهمه وبتحس إنه تجاهل.
في الغالب إصرارها إنكم تتكلموا وتحلوا المشكلة ده مبيكونش زن، ده بيكون رغبة في التواصل وحل الأمور، بتكون قلقانة، خصوصًا إن حياتنا سريعة ومرهقة جدًا، وده بيخلي القلق يزيد جواها، إنك تكون بطلت تحبها زي زمان، أو إنك مش محتاج دعمها في حياتك، أو إن وجودها بشكل عام بقى ممل، بتكون محتاجة تطمن إنك مبتفكرش تقصيها من حياتك.
تدخلات الأهل بتجيب مشاكل.. دايمًا
في الغالب الراجل بيرفض تدخلات الأهل، وده شيء هايل فعلاً، بس المشكلة إن فيه نسبة كبيرة من الرجالة بيتخيلوا دايمًا إن السبب في المشاكل بينه وبين مراته إنها بتسمع كلام مامتها أو أصحابها، ويبتدي يتهمها إنها بتسمع كلامهم وسايباهم يتحكموا في وجهات نظرها.
مش هننكر إن ده بيحصل في حالات مش قليلة، لكن لو مراتك مش من الحالات دي هتحس بإهانة عظيمة لو حسستها إنها مسلِّمة دماغها لحد تاني، ولو هي من الحالات دي وإنت ابتديت تهاجم الأطراف التانية ده هيكون مدخل هايل إنها تحس إنك مش بتحبها وإنهم بيحبوها أكتر، الأفضل إنكم تركزوا في المشكلة نفسها وفي حلها، ومفيش أي داعي لذكر أي أطراف تانية في الموضوع، لأن ده هيخلي المشكلة تتفاقم، وبدل ما تحلوا المشكلة هتبتدي هي تدافع عن أصحابها أو عن مامتها والموضوع يكبر.
اتزوقلها
المجتمع طول الوقت بيطلب من الست إنها تهتم بنفسها وشكلها، وتتزوق وتكون جميلة جوة البيت، ده مفهوم طبعًا، بس المشكلة إن في الغالب محدش بيطلب ده من الراجل رغم إنه مطلوب، وحق من حقوق الست. مفيش أي مشكلة إن زي ما هي بتجدد في شكلها وبرفانها وقصة شعرها، إنت كمان تعمل ده.
التجديد ده مش مقتصر على الستات بس، فيه طرق كتير للتجديد ممكن يعملها الزوج، حتى لو كانت اقتراحات للتغيير في العلاقة والمظهر والروتين، كل زوجين أدرى بالحاجات اللي ممكن يكون ليها تأثير في مدى حميمية العلاقة بينهم، واللي في الغالب بتكون أساس السعادة الزوجية والقدرة على التغلب على المشكلات اللي أكيد بتواجه أي زوجين، كلها حاجات مفيدة في التجديد وقتل الروتين والانتصار على العادية، اللي لما بتغلف العلاقة الزوجية بتعمل مشاكل كتير.
الهزار مش كله بيضحك
الهزار بحرية ومن غير حساب كل كلمة بين الزوجين شيء مطلوب جدًا وبيدي حميمية للعلاقة، بس فيه حاجات يستحسن نبعد عنها في الهزار، ده مش معناه تقييد لحريتك في الكلام أو الهزار مع أقرب شخص ليك في الحياة واللي هي مراتك، إنما مراعاة لمشاعرها ومجهودها المبذول في حياتكم سوا.
فيه حاجات الست مبتقدرش تتقبل التهريج فيها، خصوصًا لو هي كل حياتها البيت والأولاد والمطبخ، دي الحاجة اللي بتفني فيها عمرها بشكل حرفي، فلما تحس إنك مش شايف ده أو إن سهل إنك تهزر في الحاجات اللي بتبذل فيها مجهود كبير وإنك تسخر منها أو تقلل من تعبها فيها، حتى لو هي عارفة إن ده هزار الشك بيدخل قلبها وبتفكر إنك ممكن فعلاً تكون شايفها فاشلة أو مش كفاية، ده بيخليها تغضب بشكل حقيقي مفيهوش أي اصطناع، لأنها بتحس إن مجهودها كله راح على الأرض.
طبعًا فيه اختلافات تانية كتير بين الراجل والست، ودي كانت محاولة لتقريب وجهات النظر والاستفادة من الكلام اللي بيتم طرحه دايمًا في قعدات الستات بعيدًا عن مجتمع الرجالة. الحياة كلها مشاركة وحياتنا في الوقت ده أسرع وأعقد من إن كل واحد يركز بس في وجهات نظره ومبادئه، العالم بقى مفتوح أكتر من الأول بمراحل، ولازم نستفيد من الانفتاح ده في تحسين علاقاتنا بشكل عام، وتحسين أهم وأكبر علاقة على الأخص، اللي هي العلاقة بين الزوجين.. السعادة مش سهلة بس أكيد مستاهلة.
حاجات مراتك عايزة تقولها.. بغض النظر هي ليه مبتقولهاش
