هنلعب لعبة خيال وهنسأل شوية أسئلة:
تخيل لو الـPassword بتاعة كل الناس اتعرفت ومبقاش فيه Password في الحياة!
.
.
.
.
.
.
.
.
.
الناس اللي اتخضت ع اللي عندها تيجي يمين، واللي ضحكوا ضحكة شريرة وفرحوا باللي ممكن يشوفوه عند الناس ييجوا شمال.. واللي بين البينين هيدخل الأمن المركزي!
- “أنا معنديش حاجة أخبيها”.. قلت الجملة دي كام مرة؟
- كام مرة اتأكدت إنك عملت Sign out من Facebook أو الـEmail قبل ما تقفل أو تسيبه لحد تاني؟
- مين عنده الـPassword بتاعتك؟
- كام مرة اتمنيت ميبقاش فيه last seen؟
- كام مرة استغليت فكرة الـlast seen عشان تثبت لحد إنه بيشتغلك؟
- كام مرة اتحرق دمك لما شفت حد عمل seen للي إنت كاتبهوله بس مردش؟
- عندك إيه تخبيه في الـMail أو في Facebook؟
- “لو مقلتليش تبقى مش بتحبني/ بتحبيني”.. كام مرة قلت الجملة دي؟
- إيه الـPassword بتاعتك؟ بتعكس إيه جواك؟
- إيه السر اللي لو الناس عرفوه هيتغيروا في تعاملهم معاك؟
- عندك كام account على Twitter أو Facebook باسم مستعار بتقول من خلاله كل اللي إنت متقدرش تقوله باسمك وشخصيتك الحقيقية؟
فيه ناس بتدي الـPassword بتاعها للي بيحبوهم عشان يثبتوا بيه حبهم، وأحيانًا بيصمموا إن الـPassword يكون اسم الحد ده أو تاريخ أول مرة اتقابلوا فيها أو أول مرة صرّحوا فيها لبعض بحبهم أو… أو… أو… مقدرش أحكم على صدق دوافعهم وقد إيه الموضوع جد أو “سيس”، لأن طريقتي في إظهار حبي للناس ممكن تكون غريبة أو غير منطقية أو تافهة في نظر بعض الناس، وكمان دي مشاعر فمحدش يقدر يحكم عليها.. لكن بالنسبة للناس اللي “بتشترط” ده فعندي كام تفسير.
وجهة النظر العلمية بتقول:
الموضوع له علاقة بطبيعة مجتمعنا اللي مبتدعمش فكرة الفردية، محدش فينا مستقل، كل حاجة لازم تبقى في إطار المجموعة أو الشلة أو البيت أو العلاقة دي حتى لو بين اتنين.. بعيدًا عن الحب والثقة والإحساس بالأمان، لو كلنا مش عارفين إنت بتعمل إيه يبقى بتعمل حاجة غلط، لو بتخبي يبقى أكيد اللي بتخبيه شيء ضدنا، لو منعرفش عنك كل حاجة يبقى إنت مش مننا!
أما وجهة النظر الـ(سعيد صالح)ـية بتقول:
بتخيل لو حد شرط عليّ إني أديله الـPassword بتاعي عشان أثبتله إني بحبه وهحبه ومش هحب حد تاني غيره أو مش هخبي عليه حاجة، فهقول على الشخص ده “عبيط” لأني أكيد بعد ما هديله الـPassword مش هقول أو هعمل حاجة تخليه يشك فيّ، ومن حيث هعرف أداري؟ أيوه هعرف أداري.. أكيد هعمل Email تاني أو Account تاني أقول فيه وأعمل من خلاله اللي أنا عاوزه!
لذا فأي “عبيط” شايف إن الـPassword ضمان لأي حاجة في الحياة أرجوك راجع نفسك.. الموضوع لا يمت بأي صلة لثقتك في الشخص اللي بتتعامل معاه، الموضوع عدم ثقة في نفسك، وحب امتلاك منك لشيء عمرك ما هتقدر تمسكه بإيدك.
محدش بيبقى حقيقي وهو عارف إنه متراقب.
هتعمل إيه عشان تبقى حقيقي؟
إزاي هتقول لحد إنك بتحبه فعلًا؟
إزاي هتقوله إنك بتثق فيه؟
إنت مين؟
جاوب على الأسئلة دي واللي في الأول، وخاصة اللي إنت ضحكت لما قريتها، أو محبتش تفكر في إجابة ليها.
