في علاقة الولد/ الشاب/ الرجل بجسمه، تقريبًا سبع محطات مهمين جدًا، بيميزوا أهم مراحله العمرية والتغيرات اللي بتحصل فيها:
- أول ما شنبه يخط: وشنبه “يخط” يعني تظهر شعرات خفيفة تحت مناخيره تحاول أن تبدو كما لو أنها شنب، والكلام ده بيحصل في حدود سن الـ12 أو الـ13 مثلًا، وممكن قبل كده.. والحقيقة إن الولد في المرحلة دي بيكون منظره عادة مضحك جدًا، لأن ملامحه كلها بتكون طفولية جدًا ما عدا هذا الشنب اللطيف، ولذلك يبدو في معظم الأحيان كطفل يضع شنبًا مستعارًا لأداء دور في المسرح المدرسي.. لكن عمومًا الشنب المضحك ده بيكون مصدر فخر لا نهائي للولد في المرحلة دي، لأنه بيبقى بداية تحوّله من “ولد” إلى “ذكر”.
- أول مرة يحتلم فيها: وده ممكن يحصل في سن 13، وقد يتأخر عند البعض لحد 16.. ودي بتكون مرحلة مربكة جدًا، لأنها بتكون في الأول مش مفهومة، ودي الخطوة اللي الولد/ الشاب عندها بيبدأ بسرعة كبيرة وحماسة لا توصف في تعلم واكتساب كل ما يضفيه المجتمع على كلمة “ذكر”.. يعني هو بيكون مطالب مثلًا إنه يشترك في حوار زمايله في المدرسة عن البنات اللي بيشوفوهم في منطقتهم، أو في مدرسة البنات اللي جنبهم، أو حتى في الحلم، وإن مكانش عنده حاجة يحكيها يبقى على الأقل يسمع باهتمام، لأنه لو مكانش مهتم أو مشترك في الحوار ده يبقى معنى كده إنه أكيد لسه محتلمش -زمايله هيقولوا كده- وساعتها هتبقي فضيحته بجلاجل في الفصل.
- أول مرة الحزام ميقفلش: ودي المفاجأة اللي مش بيكون فيه قبلها أي مقدمات.. فجأة الحزام مش بيقفل، مع إنه بقاله أكتر من 5 سنين معاك.. مبروك.. إنت اتجوزت وبقى عندك كرش.. بعض الرجالة بيبصوا للحدث ده على إنه حدث دمه خفيف، وبعضهم بيبصله على إنه حدث يؤكد الرجولة والنضج، بينما البعض الآخر بيبصله على إنه حدث صادم جدًا، وخصوصًا الشباب اللي كانوا طول فترة العزوبية بيتمتعوا برشاقة ووسامة وكانوا بيعتبروها رأس مالهم في الحياة.. النهارده هو بيفقد كل الجاذبية والوسامة فجأة.. والحزام مش بيقفل.
- أول آلام القطنية: العمود الفقري عمومًا والفقرات القطنية بالذات هي نقطة ضعف معظم الرجالة في مرحلة التلاتينات.. ترهل الجسم، مع عاداتنا الغذائية والجسدية، مع أعباء العمل -أيًا كان نوعه- بتخلي آلام الرجل الجسدية تبدأ عادة من عموده الفقري، وده ممكن يكون مفاجأة في يوم بتشيل فيه الكنبة مع مراتك عشان تنقل مكانها في الصالون، أو بترفع المولود الجديد وتحاول “تهشّكه” بإنك تحدفه في مروحة السقف، أو بتشيل الشنطة التقيلة لحماتك وهي مسافرة (أو الأسوأ وهي جاية تقعد عندكم كام يوم، ساعتها بتكون القطنية والمرارة مع بعض).
- أول مرة يلاقي نفسه مش عارف يقرا الجورنال: غالبًا في الخمسينات -وأحيانًا قبل كده في حالات الزواج المبكر- بتكون أمراض زي السكر والضغط وضيق الشرايين ابتدت تعبّر عن نفسها وعن شخصيتها المستقلة، وساعتها أعراضها بتبان في تناقص حدة النظر والقدرة على التركيز وعلى بذل المجهود، (وموضوع عدم القدرة على بذل المجهود ده بيكون محرج جدًا في المرحلة دي)، لكن المرة الأولى دايمًا بتبقى مفاجأة.
- أول شعرة بيضا: فيه رجالة بتفرح بالشعرة البيضا باعتبارها علامة وقار وهيبة، بس فيه رجالة تانية بتبصلها على إنها حاجة بتنتقص من ذكورتهم وفحولتهم، وبيحسوا إنهم محتاجين يحتفظوا بسواد الشعر إلى أطول فترة ممكنة، وعشان كده بعض الرجالة بتقاوم تقدم العمر في المرحلة دي بالصبغة، لكن كرمشة الجلد بتفضح الحقيقة.
- أول مرة يخرج بالعكاز: وده عادة بيكون يوم فارق في حياة الراجل، لأنه اليوم اللي بيضطر يتخلى فيه عن عنجهية الرجولة وكبريائها وبيكتشف إن مفيش أمل من المقاومة والإنكار أكتر من كده.. إنت كبرت.. وعند المرحلة دي بيتحول من “راجل” إلى “راجل بركة”، ومن “الأستاذ رجائي” إلى “الحاج رجائي”، ومن الشخص اللي “بيتخاف منه” إلى الشخص اللي “يتخاف عليه”.
أما المرحلة اللي بعد كده مع الأسف محدش حكاها عشان نعرف الراجل عندها بيحس بإيه، بس متهيألي في المرحلة دي مش هيكون فيه فرق بين راجل وست، ولا بين أي بني آدم وبني آدم تاني أساسًا، وده الدرس اللي بياخد عمرنا كله عشان نتعلمه، وأحيانًا مبنتعلموش.
