في مثل هذه الأيام من كل عام تبدأ رحلة اصطحاب الأطفال أحباب الله لشراء ملابس العيد.. الرحلة اللي أصبحت مكلفة ومرهقة جسديًا وماديًا لمعظمنا تقريبًا.
وعشان فرحة العيد تكمل، النهارده هشارككم بـ8 أماكن تقدروا تشتروا منها ملابس موفرة للعيد، أسعارها مناسبة لجودتها وتعيش فترة طويلة مع أطفالك. بالإضافة للأماكن هشاركك بنصائح تفيدك خلال شراء الملابس لمزيد من التوفير والراحة في المشاوير.
يلا نبدأ..
أولاً ملابس الخروج:
اتفقنا مسبقًا إننا مش هندور على الملابس رخيصة الثمن فقط ولكن كمان جيدة الخامة، عشان تستحمل حركة ولعب الأطفال ومتبهتش من أول غسلة.
محلMax بفروعه المختلفة بيوفرلك النوع ده من الملابس، سواء للأولاد أو البنات ومن سن حديثي الولادة حتى سن المراهقة، تشكيلة كبيرة ومتنوعة، وفيه قسم خاص للأحذية متوسطة السعر، بالإضافة لقسم تاني لأكسسوارات البنات، زي أكسسوارات الشعر والشنط والأحزمة، والأهم إن فيه تخفيضات وعروض يومية بخلاف الأسعار المقبولة للمحل في الأيام العادية.
ربما تتخيلي إن ماركة إتش آند إم غالية السعر مقارنة بالملابس في المحلات غير المشهورة، لكن المفاجأة بالنسبة لي لما نزلت أدور وأتفرج كانت إن أسعاره أرخص من محلات كتير غير معروفة وصغيرة وخامتها رديئة جدًا.
مثلاً كان فيه عروض على الفساتين والجينز بكل أنواعه قطعتين والتالتة مجانًا، التيشرتات كانت بتبدأ من 150 جنيه وتشكيلة رائعة، وملابس البنات عروض لا تنتهي.
إتش آند إم بشوفه مكان مناسب جدًا للأسرة عمومًا كتسوق وشراء ملابس في أي وقت، وخاصًة إن فروعه في كل مكان في مصر، هو فقط مش المكان المثالي لشراء الأحذية لأنها هناك غالية جدًا وخامتها مش أفضل شيء.
تعرفي على: دليل سوق العتبة للملابس في مصر
محل إل سي وايكيكي Lcwikiki
من محلاتي المفضلة بشكل عام، لأن العروض والتخفيضات مستمرة فيه طول السنة وخامته رائعة، وكمان لأن فروعه في كل مكان تقريبًا، وأسعاره مقبولة جدًا وأحيانًا بيقدم خصومات مدهشة.
فساتين الأطفال بتبدأ من 170 جنيه، التيشرتات فيه تشكيلة مميزة أقل من 100 جنيه، وتشكيلة أكبر أسعارها بتتراوح من 100 لـ200 جنيه.
أحيانًا بيعمل تخفيضات كبيرة على الأحذية والقطع اللي متوفر منها مقاسات محددة، بتكون عليها خصم أكتر من 70%.
أهم ميزة للمحل ده من وجهة نظري إنه مرن في سياسة الاستبدال والاسترجاع، وكل يوم بيعرض تشكيلة جديدة وموديلات مختلفة، وطبعًا لأنه بيناسب الأطفال من سن يوم لسن المراهقة.
بالطبع غني عن التعريف، سنتر بوينت بيشمل ماركات كتير جدًا لملابس الأطفال، ويمكن دي أكبر مميزاته، إنك تقدر تشتري الماركة والخامة والسعر المناسب لك ولميزانيتك وذوقك، وزي ما بيقولوا كل حاجة جواه “من الإبرة للصاروخ”، أسعاره رائعة جدًا في موسم التخفيضات وخامة الملابس بتعيش سنين.
محلاتOur kids بفروعه في المعادي والمهندسين ومدينة نصر، من أفضل محلات الأطفال اللي بتقدم خامة جيدة وسعر أقل من معظم الأماكن الشبيهة لها، كمان موجود قسم للملابس الداخلية وقسم للأحذية أسعاره معقولة.
يمكن عيبه الوحيد إنه يناسب الأطفال لحد سن معين مش لمرحلة المراهقة، وإن القطع بتخلص بسرعة جدًا ولكن ده بيرجع لسعرها وخامتها.
في مصر الجديدة منطقة شيراتون، لو بتدوري على موديلات كارترز وأوشكوش وGAP وغيرها من الماركات الأجنبية المستوردة، فالمول ده مبهر لأن به أكثر من محل بيبيع الماركات والقطع دي آوت ليت، بأسعار تبدأ من 40 جنيه!
أيوة متستغربيش، هتروحي وتنبهري بالمعروض والخامة وهتكتشفي إن معظم تجار الفيسبوك بيشتروا من هناك جملة ويبيعوا قطاعي بهامش ربح.
عمومًا روحي واتفرجي ومش هتخسري، لأنهم بيبيعوا قطاعي طبعًا، والمعروض بيخلص بسرعة جدًا.
ثانيًا: بيجامة العيد
العيد ميبقاش عيد من غير البيجامة الجديدة.. أنا شخصيًا لا زلت حريصة على موضوع بيجامة العيد حتى الآن.. وعشان كده برشحلك مكانين لشراء بيجامة عيد تحفة بسعر من 95 لـ180 جنيه بالكتير.
محلات الصياد في منطقة شيراتون بمصر الجديدة، محلات متخصصة في الأقطان وملابس الأطفال والكبار المنزلية، خامة قطن روعة وأسعار مناسبة جدًا، وعندهم خدمة الطلب أونلاين والتوصيل للمنزل.
طبعًا ماركة جونيور غنية عن التعريف، من أفضل محلات الأطفال بالنسبة لي، وأغلى بيجامة هناك بدون تخفيضات لا تزيد عن 180 جنيه، وبعض الأسعار والقطع بتبدأ من 95 جنيه.
الخامات كلها قطن مصري والتقفيل مفيهوش غلطة، مهما تتغسل وتستهلك بتعيش.
وأخيرًا، نصائح مهمة متنسيهاش:
1- حددي الأنواع والألوان وقطع الملابس قبل ما تشتري عشان الميزانية متخرمش.
2- من الأفضل تحديد ميزانية تقريبية، تزيد أو تنقص بنسبة بسيطة حسب المعروض.
3- اهتمي بالكيف وليس الكم، طقم واحد شيك وخامته ممتازة، أفضل من 3 يبهتوا ويتلفوا بعد أول غسلة.
4- انزلي في النهار بدري، المحلات بتكون رايقة والعمال لسة مزهقوش والمعروضات كمان مرصوصة بنظام قبل فوضى الشراء.
5- انزلي مكان واحد مجمع فيه أكثر من محل، زي المولات الكبيرة أو كارفور مثلاً.. وبكده توفري تمن مواصلات أو بنزين وتوفري وقت التنقل في الزحمة المعروفة لينا كلنا.
6- طبعًا فيه محلات متفرقة أكتر من السابق ذكرها ويمكن أرخص كمان، ولكل شخص حرية الاختيار، ده مجرد دليل سريع صغير لو حبيتي تشتري في الإنجاز الموفر.
7- سيبي لطفلك حرية الاختيار عشان يحس بفرحة العيد، ع الأقل خيَّريه بين قطعتين تلاتة عاجبينك عشان يحس إنه اشترى بنفسه، ولو أطفالك كبار شوية يا ريت تعرفيهم ميزانيتك إيه قبل النزول.
وأخيرًا، كل المحلات السابق ذكرها، روابطها مرفقة عشان لو حبيتي تشوفي عناوينهم وفروعهم عن طريق الإنترنت.
عيد سعيد ولبس جديد ليكم جميعًا.
أسعار مناسبة للجودة وتعيش فترة طويلة مع أطفالك
