بنتي دايمًا بتسألني عن طفولتي، ولما جاه رمضان سألتني كنت بعمل إيه في رمضان وأنا صغيرة، حكيتلها عن الزينة اللي كانت أيامنا من ورق الجلاد مش فروع نور بالكهربا، عن المسحراتي، واللمة، والفوازير.. استوقفتها كلمة فوازير ومفهمتهاش. حاولت أحكيلها عن نيللي وشيريهان لكن اكتشفت إن كل اللي تعرفه عنهم هو مسلسل إيمي ودنيا سمر غانم “نيللي وشيريهان”. واكتشفت إن بنتي وكل جيلها ويمكن جيل أو جيلين قبله مش عارفين حاجة عن الفوازير اللي كنا بنقعد نتفرج عليها ونجمع حلول الحلقات في كشكول عشان نبعتها آخر رمضان. عشان كده قررت أحكيلها حكاية الفوازير من الأول خالص.
قبل البداية:
يمكن يكون ارتباط ليالي رمضان بالسمر والتسلية قديم، من أيام الراوي أبو ربابة اللي الناس كانوا بيتلموا حواليه وهو بيحكي سيرة أبو زيد الهلالي.
البداية في الراديو:
بعد سنين طويلة من السير والحكايات ظهر نوع جديد من التسالي، هو الفوازير، وكانت بداية ظهورها في منتصف الخمسينيات في الراديو بصوت آمال فهمي.. حكت آمال فهمي في حوار مع جريدة الشرق الأوسط اللندنية اتنشر سنة 2010 عن بدايات الفوازير: “كان عبارة عن مسابقة للتعرف على أصوات المشاهير، فكنا نستعين بشخص مشهور مطرب أو ممثل ونطلب منه قراءة صفحة من كتاب لتكون الفزورة.. مَن صاحب الصوت؟ واستعنا بكثير من المشاهير، على رأسهم أم كلثوم التي قرأت صفحة من كتاب الأيام لطه حسين، ولم يعرفها الناس لأنهم لم يتعودوا على صوتها تتحدث، ونجحت فكرة الفوازير ولاقت إقبالاً كبيرًا من الجمهور”.
والفكرة اتطورت واتحولت لفوازير شعرية يومية، واظبت الإذاعة على تقديمها وتناوب على كتابتها شعراء كبار زي بيرم التونسي وصلاح جاهين وبهاء جاهين.
ثم تطورت الفكرة لتأخذ شكل حلقات شعرية يكتبها الشاعر بيرم التونسي، ومن بعده مفيد فوزي، ثم الشاعر صلاح جاهين، ثم نجله الشاعر بهاء جاهين.
ظهور الفوازير في التليفزيون:
بدأ بث التليفزيون المصري سنة 1960، وبعد سنة واحدة في 1961 اتنقلت الفوازير من الراديو للتليفزيون. بتحكيلي والدة أحد الأصدقاء اللي عاصرت الفترة دي، إن الفوازير كانت في البداية حلقات قصيرة بيكتبها بيرم التونسي عن الأمثال الشعبية.
الاستعراض في الفوازير:
في أواخر الستينيات ما بين 1967 و1969 بدأت الفوازير تاخد شكل أقرب للشكل المعروف لينا، خليط بين الدراما والاستعراض وقدمها وقتها ثلاثي أضواء المسرح وأخرجها أحمد سالم.
تتر فوازير رمضان لثلاثي أضواء المسرح
https://www.youtube.com/watch?v=BroAmyxTUvE
فهمي عبد الحميد ملك الفوازير:
بشكل شخصي ومع كل تقديري لتجارب المخرجين اللي سبقوه أو اللي كملوا بعده، فتجربة فهمي عبد الحميد بالنسبة ليَّ هي العصر الذهبي للفوازير. كان عنده قدرة مميزة على إنه يجدد جلده كل سنة ويقدم حاجة مختلفة ومميزة عن السنة اللي قبلها. وكان عنده شجاعة التجريب والتغيير والشغل مع نجوم مختلفين كل واحد له طعمه ولونه المميز.
الظهور الأول لنيللي في الفوازير:
بداية عمل فهمي عبد الحميد في الفوازير مع نيللي، اللي كانت مميزة في الجانب الاستعراضي من طفولتها، وكانت بتتميز بخفة دمها وحضورها القوي. بدأت نيللي مع الفوازير سنة 1975 بفوازير “صورة وفزورة”. وبعدها “صورة وفزورتين” 1976، وبعدها “صورة وتلات فوازير” 1977 وبعدها “صورة و30 فزورة 1978.
وبعدها “أنا وإنت فزورة” 1979، اللي اتعرفت بين الناس أيامها بفوازير “التمبوكا”، وجمعت بين نيللي وعبد المنعم إبراهيم وعماد رشاد.
وفضل التعاون مستمر بين نيللي وفهمي عبد الحميد، وقدمولنا فوازير “عروستي” عام 1980.
وفوازير “الخاطبة” 1981 اللي كانت بتستعرض في كل حلقة مهنة مختلفة للعريس المنتظر.
https://www.youtube.com/watch?v=u0yOQRvnU0g
والفوازير مكانتش مقتصرة على الاستعراض، لكن تميزت بظهور شخصيات كارتونية بسيطة مع نيللي.
الظهور الأول لشخصية فطوطة:
سنة 1982 وبعد 7 سنين من التعاون المستمر مع نيللي، قرر فهمي عبد الحميد يجدد دم الفوازير ويخلق لها توب جديد عن طريق شخصية “فطوطة” بشكله المميز وتسريحة شعره وبدلته وجزمته وشنطته وصوته. وكلها تفاصيل الشخصية اللي ابتكرها فهمي عبد الحميد واختار الفنان سمير غانم لأدائها بداية من عام 1982 لحد 1984، واتنوعت موضوعاتها في السنوات المختلفة، فكانت سنة عن الشخصيات وسنة عن الأفلام وسنة عن المعلومات العامة.
وشارك سمير غانم في حلقات “فطوطة” نجمات كتير، منهم مثلا سحر رامي ودلال عبد العزيز وإيمان الطوخي وهالة صدقي.
وفي حلقة من حلقات فوازير الأفلام 1983، تحديدًا حلقة فيلم “دهب” لو دققنا قي وش البنت الصغيرة اللي عاملة دور الطفلة فيروز هنكتشف إنها الفنانة نجلاء بدر في طفولتها. شوفوا كده.
ورغم ضعف الإمكانيات التقنية في الزمن ده إلا إن شخصية “فطوطة” نجحت نجاح ساحق، وكانت محبوبة من الكبار والأطفال وقتها ولحد دلوقت.
شيريهان في عالم الفوازير:
دخلت شيريهان ملعب الفوازير سنة 1985 بفوازير “ألف ليلة وليلة عروس البحور” واللي لحد دلوقت كلماتها بترن في ودان مواليد التمانينات “شهر يكلم شهر يعلم شهر يسلم شهر لما وصلنا لأجمل شهر”.
ممكن تشوفوا حلقاتها من هنا
https://www.youtube.com/watch?v=W3A3j-OskLk&list=PL9KkecclNUBQAS0EGQRmZ-EIZJlifwGoD
استمر التعاون بينهم وقدموا “وردشان وماندو” سنة 1986.
https://www.youtube.com/watch?v=kiCDx-TuSqk
وسنة1987 مسلسل “الثلاث بنات – حليمة وكريمة وفاتيما”، اللي عملت فيه شريهان تلات أدوار للإخوات التلاتة “حليمة” و”كريمة” أو “كغيمة” بلدغتها الجميلة، و”فاتيما”.
https://www.youtube.com/watch?v=E9RaP5_8n90
و”شيريهان حول العالم” 1987.
https://www.youtube.com/watch?v=FuIJh9YgatY
فوازير شيريهان كانت مميزة جدًا باستعراضاتها الجميلة والفساتين والملابس والأكسسوارات المبهرة، وبخفة دمها وحضورها القوي.
تغيير جديد:
سنة 1988 قرر فهمي عبد الحميد تقديم الثلاثي يحيى الفخراني وصابرين وهالة فؤاد في فوازير المناسبات، اللي تميزت بالكوميديا وخفة الظل.
افتكروا حلقة منها.
https://www.youtube.com/watch?v=vSkp_PNLkxA
وسنة 1989كانت الفوازير من بطولة مدحت صالح وشيرين رضا لتقديم فوازير الفنون.
https://www.youtube.com/watch?v=4jdKNW3ZUZ4
واللي صمم استعراضاتها محمود رضا لأول مرة بعد سنوات طويلة من التعاون مع مصمم الاستعراضات حسن عفيفي.
على مدار السنوات دي لحَّن الفوازير ملحنين كبار، زي سيد مكاوي ومحمد الموجي وحلمي بكر ومنير مراد وأحمد صدقي وخالد الأمير ومنير الوسيمي وسمير حبيب وهاني شنودة وإبراهيم رجب ومحمد قابيل وعمار الشريعي وعمر خورشيد وسامي الحفناوي وصلاح الشرنوبي وفاروق الشرنوبي.
وكتب كلماتها وأغانيها شعراء ومؤلفين كبار، منهم صلاح جاهين وعبد السلام أمين وعبد الرحمن شوقي ويوسف عوف.
ولحد وفاة فهمي عبد الحميد سنة 1990.
جمال عبد الحميد ومحمد عبد النبي:
في نفس السنة ظهر اسم المخرج جمال عبد الحميد على فوازير “عالم ورق” اللي رجعت بيها نيللي.
ولحد السنة دي كنت بتفرج على الفوازير على تليفزيون قديم أبيض وأسود، لحد ما كنا في يوم عند طنط سناء جارتنا الله يرحمها أمي التانية، لما اكتشفت إني بيتضحك عليَّ ولا إيه، وإن الفوازير بالألوان ونيللي بالألوان حاجة تانية خالص، وقعدت أزن كتير لحد ما دخل بيتنا التليفزيون الملون نصر جولدستار 16 بوصة الحلو ده، زي ما كان الإعلان اللي لسة فاكراه لحد دلوقت بيقول.
وزي ما كان شراء التليفزيون الملون بعد وفاة بابا بأقل من سنة مغامرة كبيرة لماما، كانت الفوازير مغامرة كبيرة لجمال عبد الحميد، المساعد السابق لفهمي عبد الحميد، واللي بدأ تصوير الفوازير قبل رمضان بحوالي 50 يوم بس، لكن كانت مدة كافية عشان تكون بداية قوية له وعودة قوية لنيللي.
https://www.youtube.com/watch?v=MwKku1b_WJ8
سنة 1991 و1992 كانت الفوازير من إخراج المخرج محمد عبد النبي، اللي قدم مع نيللي فوازير “صندوق الدنيا”، اللي كانت كل حلقة فيها عن برنامج من برامج التليفزيون.
https://www.youtube.com/watch?v=KYhzoAsCXpk
وبعدها فوازير “أم العريف” عن المهن المختلفة.
بعد كده ظهرت فوازير “قيس وليلى” في المدن العربية مع المطرب محمد الحلو وشيرين وجدي.
https://www.youtube.com/watch?v=ZZsWqoRYgOA
سنة 1993 رجع جمال عبد الحميد وشيريهان ودخل معاهم الملحن مودي الإمام عشان يقدمولنا فوازير “حاجات ومحتاجات” اللي ظهرت فيها الشخصية الكارتونية “زئردة”، ودي كانت آخر فوازير تقدمها شيريهان، وآخر فوازير يقدمها جمال عبد الحميد اللي اتجه بعد كده لمجال الدراما وقدم علامات مهمة زي “زيزينيا” و”أرابيسك”.
https://www.youtube.com/watch?v=0XKFtUS1nvc
محاولات مختلفة:
مع غياب الوجوه المعتادة عن الفوازير ظهرت محاولات مختلفة في السنوات اللي بعد كده، بدأت مع فوازير “إحنا فين” 1994 بطولة سمير صبري وحسن كامي وشيرين سيف النصر وسماح أنور، وتأليف والد الأخيرة الكاتب أنور عبد الله وإخراج محمد نبيه. كانت من الفوازير المختلفة عن المعتاد في الفوازير، وكان لها سياق درامي بيجمع بين الحلقات مع لجوء أقل للاستعراض. لكن للأسف مكانتش ناجحة قوي. يمكن لوجود مشاكل كبيرة سواء بين طاقم العمل والمخرج أو بينهم وبين شيرين سيف النصر، وكل ده أثر على جودة العمل على الشاشة أكيد.
مجلة المصور عدد رمضان 1994.
سنة1995 قدم محمد عبد النبي مع الفنانة سماح أنور ووحيد سيف فوازير “كنز الكنوز” اللي أنا شخصيًا مش فاكرة عنها أي حاجة.
https://www.youtube.com/watch?v=wxnMjjPmwoA
وفي نفس السنة رجعت النجمة نيللي مع نفس المخرج بفوازير “الدنيا لعبة” افتكروها من هنا.
وكمان قدموا سوا في1996 فوازير “زي النهارده”، اللي كانت آخر فوازير لنيللي على شاشة رمضان، لحد ما رجعت لرمضان بمسلسل “ألف ليلة وليلة – ضوء المكان وبدر التمام” في مطلع الألفية الجديدة.
بالنسبة لي ده كان آخر الفوازير، لكن الفوازير فضلت مكملة، وكمان فيه محاولات كتير لخلق فوازير جديدة بنجوم استعراض جداد ومحاولات مختلفة ﻹعادة خلق أسطورة نيللي وشيريهان أشهرهم:
“الحلو ميكملش” جيهان نصر 1997.
“جيران الهنا” وائل نور ونادين 1997.
“منستغناش” نادين 1998.
“أبيض وأسود” دينا وأشرف عبد الباقي ومحمد هنيدي 1998.
“قيمة وسيما” لوسي وأمينة رزق 1999.
للأسف مفيش محاولة منهم حققت نفس النجاح.
يمكن لأن العالم مش نفس العالم.. يمكن ﻷن خلاص مبقيناش نستنى ميعاد حلقة الفزورة اللي بتتذاع مرة واحدة في اليوم. الحلقة الواحدة بقت تتذاع بدل المرة عشرة. وبقى سهل نعرف إجابة الفزورة من جوجل بلمسة واحدة على الشاشة. عالم مختلف مبقاش أبطاله نيللي وشيريهان وبوجي وطمطم.. وجوجل مسابش فيه مكان لا لفزورة ولا حزورة.
