كواحدة بتحب حاجات محددة جدًا في الحياة، ومن ضمن الحاجات دي السينما والأكل والأنتخة. وعندي طفل صغير، الخروج بيه للمطاعم أو السينمات مش حاجة سهلة أو متاحة طول الوقت. ولأني كمان من ضمن الحاجات اللي بحبها الروتين، فأنا عندي طقوس كده لقضاء أمسيات الأجازة، مبحسش بالأجازات من غير الروتين ده، وحقيقي نفسي ناس كتير يجربوا يخلقوا لنفسهم مساحات للحرية من غير ما يتكلفوا وقت وفلوس ومواصلات وبهدلة بالعيال. ولذلك هوصفلكم روتيني لقضاء الويك إند بطريقة لطيفة، نفصل بيها من تعب الأسبوع، ونرجع فريش ومتشوقين لنهاية الأسبوع الجاي، وعشان الحياة صعبة كفاية، لازم نخلق لنفسنا متع سهلة وممكنة، مهما كانت الضغوط حوالينا.

1. السينما

الأفلام والسينما من طقوسي المفضلة في نهايات الأسبوع. افصلي دماغك من مشاوير الحضانة والمدرسة والتمرين والسوق وأي حاجة تتطلب احتكاك بالعالم الواقعي، ومفيش حاجة هتساعدك في الفصلان ده قد الأفلام. قبل نهاية الأسبوع خدي لفة في جروبات الفيسبوك المهتمة بالأفلام، واختاري كام فيلم يساعدوكي في قضاء وقت لطيف.

ممكن تتصفحي صفحات قنوات التليفزيون اللي بتعرض أفلام أجنبية، MBC2 وMix hollywood، والجروبات المهتمة بالأفلام زي هواة الأفلام الأجنبية. شوفي الأفلام اللي بيكونوا بيعلنوا عنها طول الأسبوع واختاري كام فيلم واقري ريفيوهاتهم. ادخلي على مواقع تحميل الأفلام زي إيجي بست، وفشار، وسيما فور يو، وسيما فور أب، دول من أكتر المواقع السهلة جدًا في تحميل الأفلام بجودة كويسة. اختاري الأفلام وابتدي تحميلهم وسيبي التحميل شغال وتعالي ورايا.

2. الأكل

القاسم المشترك بالنسبة لي في المتع على اختلافها هو الأكل الحلو. الوقت الحلو لازمله أكل حلو، والويك إند اللطيف لازم معاه أكل لذيذ وسهل، ومياخدش من وقت استمتاعنا بيومين الأجازة. قبل الويك إند اتأكدي إن عندك في البيت المكونات اللي تخليكي تعملي أكل وسناكس ومشروبات، بحيث متضطريش ترهقي نفسك في النزول والشرا.

البيتزا من الأكلات السهلة، ومش لازم أبدًا تلتزمي بطريقة تحضير البيتزا الإيطالي الأصلية، يعني استخدمي أي بواقي فراخ أو لحمة مفرومة، أو لحوم مصنعة أو تونة. أي يوم خلال الأسبوع هتعملي فيه فراخ بانيه أو كفتة اعملي حسابك في وجبة زيادة متجهزة ع التسوية، وفي الأجازة اعمليهم ساندوتشات، اتأكدي إن عندك درة فشار ومانجة لزوم السناكس والمشروبات، ويوم الخميس اعملي صينية كيك هتنفع في الفطار أو العشا، بحيث تقللي مجهودك في الويك إند وتستمتعي مع أسرتك بالوقت اللي مبتتحصلوش عليه مع بعض طول الأسبوع.

3. الزيارات والخروجات

أنا مبدعوش إطلاقًا للانعزال. النزول من البيت مهم والزيارات العائلية مهمة، خلي جدول الزيارات والخروجات محدد، مش كل أسبوع هننزل، لأننا لازم أجسامنا ترتاح من إرهاق أسبوع الشغل، فلو عندك زيارات ممكن تخليها أسبوع وأسبوع، ويفضل إنها تكون يوم الخميس بحيث تخلصوا الواجبات الاجتماعية أو تستمتعوا بخروجة لطيفة، وكمان ترتاحوا الجمعة والسبت، عشان تبقي حققتي أقصى استفادة ممكنة من الويك إند.

4. شغل البيت

فيه ناس كتير مش متاح ليها التنضيف والترويق وشراء الاحتياجات غير في الويك إند، طبعًا ده هياخد من وقتك وجهدك كتير، لكن لو خليتي أفراد الأسرة يساعدوكي، هتخففي على نفسك المجهود وهتخلصوا بسرعة، ولو ده مش متاح، خلي يوم الخميس مخصص لشرا مستلزمات البيت، ويوم الجمعة بالنهار مخصص للأعمال المنزلية، واستمتعي بأمسية الجمعة ويوم السبت كله في خلق جو مريح وهادي ونضيف وممتع ليكي ولأسرتك.

5. الخناقات وأشياء أخرى

طبعًا مفيش كتالوج هينفع نمشي عليه وننفذه بحذافيره، ولذلك وارد جدًا يجيلك إيميل شغل، أو تقوم خناقة في البيت، أو يجيلكم ضيوف فجأة، أو حد من أهل البيت يتعب، بس لازم نحط لنفسنا قواعد نمشي عليها، عشان نقدر نواصل حياتنا من غير ما قلوبنا تشيل الهم، متحسيش إن فتح الإيميل أو عمل مكالمات الشغل جزء من روتينك اليومي حتى في الويك إند، لو حاجة مش ضرورية مترديش، إنتي في أجازة، ووارد ميكونش عندك إنترنت أصلاً.

لو جالك ضيوف فجأة حاولي تعملي أكل سهل وفي نفس الوقت مُشرِّف، في الحالة دي السمك بيكون اختيار هايل، هتطلبيه جاهز والرز والسلطات مبياخدوش وقت ومجهود. لو خناقة يوم الجمعة قامت لأي سبب افتكري دايمًا إن دي طقوس مصرية أصيلة، وفي الغالب بتكون خلافات خفيفة وسببها إرهاق الأسبوع، وأنسب حاجة لحل الخلافات دي إننا نرتاح ونهدا، خليكي هادية واتكلمي بالراحة ومتساعديش إرادة النكد إنها تحقق هدفها، ولو حد من أهل البيت تعب فجأة روحي الطوارئ، ومتستنيش لما الدكاترة يفتحوا عشان الدور -أيًّا كان- ميتقلش ويعطلك الأسبوع.

الخمس خطوات دول ممكن يأمنولك روتين كويس لقضاء ويك إند لطيف، يخفف من حدة توتر الأيام اللي بقت صعبة وسريعة، ومبنلحقش ناخد نفسنا فيها، وهيبني ذكريات حلوة قوي لأفراد الأسرة، هتخليهم يعدوا الأوقات الصعبة وأحداث الحياة المتلاحقة، وهيعملكم رصيد من المودة والألفة، وهيفتح مواضيع مشتركة كتير بينكم، تمكنكم من إنكم تتكلموا في حاجة غير مشاكل الشغل والعيال والمصاريف، والأخبار المفزعة اللي محاوطانا في كل حتة.