الحرف اليدوية المعروفة بـ”الهاند ميد” محتاجة موهبة حقيقية عشان تنتشر وتستمر بين الناس، بس زي ما الموهبة والشطارة مطلوبين، إدارة الحرفة دي بشكل احترافي مهم جدًا برضو، ويمكن كمان أهم من الموهبة. وأهم حاجة في إدارة الموهبة دي هو تقدير قيمتها المادية.
طبعًا الشغل اليدوي الجميل المتعوب فيه لا يُقدَّر بثمن، بس لو أنا عاوزة أخلِّي موهبتي دي مصدر دخل لازم أحدد قيمتها المادية، ومع انتشار الناس اللي بتشتغل في المجال ده بقى ممكن تلاقي نفس السلعة بأسعار مختلفة.. وبين الأسعار القليلة جدًا والأسعار المبالغ فيها احتار الوافد الجديد على الحرفة وغُلب حماره.. إزاي يحدد قيمة سلعته.
الحقيقة إن تحديد قيمة شغلك المادية المناسبة هو اللي هيحدد عمرك في الشغلانة دي هيبقى قد إيه.
أنا بشتغل في الحرف اليدوية من أكتر من 14 سنة.. ابتديت بالأكسسوار وطورت نفسي لحد ما وصلت لتصميم وتنفيذ الملابس، وأخيرًا بعد 14 سنه شغل أعتقد إني حاليًا بدير عمل ناجح بدخل ثابت مش بطال أقدر أعتمد عليه في مصاريفي الشخصية وأدَّخر منه مبلغ مالي عشان أقدر أكبّر مشروعي أكتر.
في بداية شغلي اليدوي كنت بعمل أسعار قليلة جدًا، وكنت بتهم كل اللي حواليا اللي أسعارهم أعلى مني بكتير بالطمع والمغالاة في الشغل، وكنت بشوف إن أنا الشخصية الطيبة اللي مش طماعة.. لكن مع الوقت لقيت نفسي بكسب فلوس قليلة جدًا وبشتغل وقت كبير جدًا، وببيع كميات كبيرة من الشغل ومفيش أي ربح، ودايمًا مش معايا فلوس أقدر أدعم بيها شغلي عشان يكبر، ولا حتى فلوس أصرف على نفسي، وده كان بيحبطني جدًا وبيحسسني إن تعبي بيروح على الفاضي.
كان الحل إني أسأل الناس اللي بتشتغل شغل يدوي قبل مني بفترة وليهم خبرة، وأعرف منهم هم بيحسبوا سعر شغلهم إزاي.. بس الحقيقة محدش اداني عقاد نافع، وكل الناس كانت بتوهني بمتاهات حسابات يصعب عليّ إني أجاريها، وانتهى الأمر بيّ إني بقيت بخسر بعد ما كان اللي جاي على قد اللي رايح، وبطلت شغل يدوي لفترة كبيرة، وابتديت أشتغل في مؤسسات بمرتب ثابت.. وبين احتياجاتي المادية وهوايتي كنت تايهة ومش عارفة أعمل إيه، لحد ما لقيت الحل في أربع خطوات سهلة:
1- اشتغل موظف عند نفسك
أيوة، هو ده أنسب حل، إنك تعتبر نفسك موظف عند نفسك.. يعني إيه؟
أنا ليه روحت اشتغلت في شركة؟ عشان أضمن مرتب ثابت.. إذًا الحل في المرتب الثابت.
هديك مثال: إنت لو رُحت اشتغلت في شركة هتقبض مرتب كبداية مثلاً 2500 جنيه. لو إنت بتاخد خمس أيام في الشهر أجازة يبقى إنت بتشتغل 25 يوم، يعني إنت بتقبض 100 جنيه في اليوم، ويوم الشغل 8 ساعات، يبقى ساعة الشغل بـ12.5 جنيه. إنت لو بتعمل أكسسوارات مثلاً فالأسورة هتاخد منك متوسط شغل ساعتين، والساعة بـ12.5 جنيه والحسابة بتحسب، يبقى مجهودك على الأسورة دي يقدر بـ25 جنيه.
بس طبعًا ده مش كل حاجة في الحسبة، لأن فيه خامات مستخدمة في صناعة الأسورة دي مش لازم أنساها، وده ينقلنا للخطوة التانية.
2- إضافة أسعار الخامات المستخدمة
إضافة سعر الخامات مش بالبساطة اللي متخيلينها؛ إحنا لو رجعنا للأسورة تاني كمثال هنلاقي إن فيه حاجات سهل نحسب سعرها، زي الخرز المستخدم مثلاً، أو لو فيه قفل أو لعب بتتحط في الأسورة، كل الحاجات دي بيبقى سعرها بالقطعة فبيكون سهل أحسبها، لكن فيه حاجات تاني بتيجي بالكيلو، زي السلك النحاس، وبتيجي بالبكرة زي الأساتك مثلاً، الحاجات دي مش سهل إننا ندخّل تكلفتها في الحساب، فبتبقى أسهل طريقة إني أزود 10% على تكلفة الخامات بتاعة الأسورة عشان أحسب متوسط سعر الخامات الكلي.
بس برضو ده مش كل حاجة.. فيه مصروفات تاني مش مشتركة لا مع الخامات ولا مع الوقت، زي المواصلات والإيجار لو عندك مكان بتاعك، والنور وفواتير التليفون، عشان المكالمات الخاصة بالشغل، وده ينقلنا للخطوة التالتة.
3- قيّد مصروفاتك أول بأول
لازم نكتب كل حاجة بتتصرف ليها علاقة بالشغل، ونجمعها كلها لمدة تلات شهور، وناخد متوسط التلات شهور دول ونقسمه على 25 يوم، اللي هو عدد أيام الشغل في الشهر، ونقسمه على 8 ساعات زي ما عملنا فوق، ويتجمع برضو على تكلفة سعر القطعة.
هديك مثال: لو إنت مثلاً جالك فاتورة نور بـ50 جنيه وفاتورة مية بـ20 وفاتورة غاز بـ30، وبتدفع إيجار 700 جنيه، وركبت مواصلات بـ200 جنيه، بنجمع كل دول على بعض فيبقى المجموع 1000 جنيه. نقسمهم على 25 يوم يبقى اليوم بـ40 جنيه، نقسمهم على 8 ساعات يبقى الساعة 5 جنيه، تضاف لسعر ساعة الشغل بتاعك.
كده فاضل خطوة واحدة بس مهمة، وهي لو الشغل زاد عليك واحتجت تجيب حد يساعدك، تدخل مرتبه في الحسبة إزاي؟
4- إضافة أجور الناس اللي بتساعدك في الشغل
الخطوة دي بسيطة جدًا، زي ما وزعت مرتبك على سعر القطعة توزع مرتب أي حد هييجي يساعدك في الشغل، بس في الحالة دي لازم تقسم الشغل بينكم صح، عشان وجود الشخص ده يزود دخلك مياخدش منه، وده بيحتاج إنك تركز في كذا حاجة:
أولاً: إنك تعمل تخصص في الشغل، يعني إنت تركز في التصميم مثلاً والشخص اللي بيساعدك في التنفيذ.
ثانيًا: لازم يكون أجر الشخص ده أقل من الأجر اللي إنت محدده لنفسك، أو تكون سرعته أكبر من سرعتك في الشغل، عشان وجوده يضيفلك وميقللش من دخلك.
ثالثًا وأخيرًا: إنك تعمله جدول عمل يومي لازم يلتزم بيه، وتكون عارف كويس هو هيعمل إيه النهارده، وتحضرله شغله قبل ما ييجي، عشان تستفيد من كل دقيقة هو بيشتغلها معاك.
طبعًا الكلام ده لو بيقبض بالشهر، لكن لو بياخد أجره على القطعة فكده هيكون الحساب أسهل بكتير، كل اللي هتعمله إنك تضيف الرقم اللي بياخده على تكلفة القطعة نفسها.
أتمنى أكون فيدتكم، وأي حد بيفكر يحول هوايته لمصدر دخل يكون المقال ده شجعه وسهِّل عليه الخطوة الأهم، وهي حساب سعر الشغل.
