مع بداية شهر رمضان كل سنة بتكتر الشكاوى من إرهاق الوقفة في المطبخ مع الصيام. وبتبدأ تظهر النصايح والمعلومات اللي من شأنها تقلل الوقت اللي بنقضيه في المطبخ. لدرجة إن البعض بينصح بوجوب عمل وجبات جاهزة كاملة، ونجمدها في الفريزر من قبل بداية شهر رمضان.
وأنا شايفة إن الموضوع ده مبالغ فيه بشكل كبير، وإننا لازم نتعامل مع الأكل في رمضان زي ما بنتعامل معاه في الأيام العادية، بل من المفروض إننا نرشّد من الأصناف والكميات اللي بنعملها، لأن الإسراف بيتعارض مع الهدف اللي ربنا شرعلنا الصيام عشانه.
وعشان كده النهارده هنقدملكم مجموعة من النصايح اللي من شأنها تقلل من الوقت اللي بنقضيه في المطبخ.
أولًا:
اتأكدي إن كل أجهزتك الكهربائية سليمة وكفائتها عالية.
ولو فيه أي جهاز محتاج تصليح ومقدرتيش تصلّحيه قبل رمضان، يبقى من الأفضل إنك تخرّجيه من المطبخ، عشان ميعملش زحمة ويعطلك عن الشغل.
تعرفي على: استخدامات الميكرويف: 14 شيء لا توضع في الميكرويف
ثانيًا:
جهزي المطبخ ورتبيه ونضفيه، بحيث إن وقت وقوفنا فيه يقتصر على وقت الطبخ بس.
ثالثًا:
احرصي على توافر بعض الأساسيات اللازمة للطبخ في الفريزر بشكل دائم، زي مكعبات صلصة الطماطم، ومكعبات الشوربة اللي ممكن نعملها في قوالب الكب كيك.
رابعًا:
خزّني البقوليات دايمًا بعد تنقيتها وفرزها من الشوائب، عشان توفري وقت الفرز والتنقية.
خامسًا:
انقعي البقوليات من الليلة السابقة للطبخ في ماء بارد، عشان تقللي من الوقت اللي بتستهلكيه للطبخ. أما بالنسبة لسلق الدواجن واللحوم والبقول فمتضيفيش الملح عليها إلا بعد سلقها، لإن إضافة الملح بتزود وقت الطبخ.
سادسًا:
خلي غلاية المية الكهربائية صديقتك في المطبخ، واحرصي دايمًا إنه يكون عندك مية سخنة، عشان لو حبيتي تزودي الشوربة أو تسلقي مكرونة أو حتى تسقي الرز.
استخدام المية الباردة بيوقف عملية الطبخ لحد ما درجة حرارة الطبخة توصل للغليان مرة تانية.. لكن إضافة المية السخنة بتخلي الطبخة مستمرة، وبالتالي بتقلل من الوقت اللي بتاخده لحد ما تستوي، وبالتالي بتقلل من وقت وقفتنا في المطبخ.
سابعًا:
متعمليش أكل بكميات كبيرة عشان متقضيش النهار كله في المطبخ، وكمان عشان نوفر الكميات الزائدة اللي مصيرها دايمًا بيكون صندوق القمامة.
وتذكري دايمًا إن الكميات الكبيرة علامة على الإسراف، مش الكرم.
ثامنًا:
متجربيش أكلة جديدة وإنتي مش قارية تفاصيلها كويس، ومتأكدة إن كل مكوناتها متوفرة عندك. لأنه مضيع جدًا للوقت إنك توقفي الطبخة في نصها عشان تنزلي تشتري نوع صوص أو توابل مش عندك.
تاسعًا:
استخدمي السكاكين الحادة والأدوات في الهدف اللي اتعملت عشانه. ده بيخلي كفاءة كل أداة أعلى وبيقلل من وقت الاستخدام.
عاشرًا:
متنسيش تشتري الملح.. متنسيش تشتري الملح.. متنسيش تشتري الملح.. متنسيش تشتري الملح.. متنسيش تشتري الملح.. متنسيش تشتري الملح.. متنسيش تشتري الملح.. متنسيش تشتري الملح.
