أشك إن فيه ست مسؤولة عن بيت مش بتسأل نفسها كل يوم “هناكل إيه بكرة؟”، والحقيقة إنها حاجة محيّرة ومملة إننا نفضل نكرر نفس السؤال كل يوم، خصوصًا لما نتلقى إجابات زي (أي حاجة، عادي… إلخ)، عشان كده بقترح عليكي فكرة أنا شخصيًا ناوية أجربها، وهي إننا نعمل خطة لوجبات الأسبوع. وده له عدة فوائد، زي:
- توفير المال: لأننا هنشتري بناء على خطة، مش بشكل عشوائي.
- تقليل الفاقد من الأكل: لأننا هنشتري اللي محتاجينه بس.
- توفير الوقت: لأنك مش هتقعدي كل يوم تفكري هتطبخي إيه بكرة، وهتشتري حاجتك كلها مرة واحدة.
- تغذية أفضل: التخطيط هيدينا فرصة نجهز وجبات صحية ومتوازنة، بدل زنقة الوقت والتعب بتاعة كل يوم، اللي هتخلينا نفكر بس نعمل الأكل الأسرع والأسهل، بغض النظر هو صحي ولا لأ.
ودلوقت ندخل على العملي بقى:
إزاي تخططي لوجبات الأسبوع؟
- هاتي ورقة العروض من السوبر ماركت، واسألي أسرتك نفسهم ياكلوا إيه، وبناء عليه حددي الأصناف اللي ممكن تعملي منها وجبات. اكتبي قائمة بالمقادير اللازمة، وحددي منها اللي مش عندك واشتريه.
- خصصي كل يوم في الأسبوع لنوع معين من الأكلات. مثلًا، السبت: أسماك، الاثنين: مكرونة، الجمعة: بناكل برة… إلخ.
- خصصي يوم لبقايا الأكل. أحيانًا فيه أيام ممكن تطبخي زيادة شوية أو حد ياكل برة فيتبقى أكل، احتفظي بيه (ممكن في الفريزر، لو مش هيبوظ من الفريزر ولو هيتركن كام يوم) وتعالي في يوم تكوني مش قادرة تطبخي أو الميزانية خرّمت وطلعيه. وممكن تعلّقي قايمة ببقايا الأكل اللي في الفريزر على بابه، عشان متتنسيش اللي عندك.
- اعملي الأكلات السهلة في الأيام اللي تكوني مشغولة فيها في حاجات في البيت، أو هترجعي متأخر من شغلك، أو عندك مشوار… إلخ، والأكلات اللي محتاجة وقفة وشغل في يوم تكوني فاضية فيه نوعًا ما أو يوم إجازة.
- حددي نوع اللحوم اللي هتاكلوه في كل يوم من أيام الأسبوع، ولو فيه أيام هتقضوها شعبي أو “أورديحي”.
- ممكن تجربي وصفة جديدة واحدة في الأسبوع، ففي نهاية كل أسبوع تبحثي على الإنترنت عن أفكار لوصفات، وتحتفظي بها في مكان سهل ترجعيله. عن نفسي بحب أستخدم موقع pearltrees.com اللي بيتيحلك إنك تحفظي أي رابط أو معلومة أو صورة، وتصنفيهم بالطريقة المفضلة ليكي، وتقدري تفتحيه من أي مكان في البيت أو برة.
- فيه فكرة لطيفة وهي إنك تخططي أكل أسبوعين وتكرريه الأسبوعين اللي بعدهم، ده هيسهل عليكي وفي نفس الوقت مش ممل لأن الأكلة هتتكرر مرتين بس في الشهر كله.
- ممكن بعد ما تستقري على وجباتك تستعيني بأدوات التنظيم اللي بتتيحها بعض المواقع عشان توزعي الوجبات دي على أيام الأسبوع، زي Google calendar مثلًا، واللي ممكن تبعتلك على الميل لو إنتي عاوزة الوجبة المخطط لها النهارده ومكوناتها، وممكن تظبطي الإعدادات إن الوجبة تتكرر كل أسبوعين مثلًا، فكل أسبوعين يتبعتلك تذكرة على الإيميل إن الوجبة دي معادها النهارده.
- علقي قايمة وجبات الأسبوع على التلاجة، عشان تكون قدامك طول الوقت وتقدري ترجعيلها بسهولة.
- في نهاية كل يوم شوفي وجبة بكرة إيه في الخطة، عشان لو اكتشفتي مكونات ناقصة ترتبي إنك تشتريها، أو عشان لو حاجة محتاجة تطلع من الفريزر تفك للصبح.
وبكده هيكون سؤالنا الجديد: هنطبخ إيه الأسبوع الجاي؟
