فرحك قرب؟ وراكي مليون حاجة والميزانية باظت؟ حاسة إنك محتاسة؟ مش عارفة تفرحي م المشاوير والفرهدة؟ ألف مبروك وصلتي للمحطة الطبيعية لكل العرايس.
طبعًا اتحولت كل حواراتك مع صحابك وكل الـhistory search على لابتوبك بقى عن موضوع الجهاز وبس، وطبعًا طنط حشرية كل ما تشوفك تسمعك قايمة ملهاش آخر من لوازم العروسة والخمس دست اللي لازم تتجاب من كل حاجة، وحاسة إن أهلك على ما يوصلوا ليوم الفرح هيكونوا باعوا اللي وراهم واللي قدامهم.
أنا سبقتك في المطحنة دي، وأفتكر أول نزولة ليّ فضلت ألف ف الشارع وأنا تايهة وأقول أجيب الكوبايات؟ طب هو أسعار الصيني إيه؟ منين أجيب الملايات؟ السعر المناسب لطقم كاسات كام؟ هو مفروض أشتري كام فوطة؟ دخلت الجامع قعدت أعيط شوية، بعدين افتكرت إني معنديش رفاهية الاكتئاب، خرجت سريعًا اشتريت كل الإزاز اللي ممكن أحتاجه.. كوبايات مية وشاي وكاسات وطقم الجيلي وكل كل الإزاز، ومن هنا ابتدا المشوار.
ولأني حاسة بيكي ونفسي أوفّر عليكي المجهود، هساعدك ف قايمة مشترواتك وهقولك تجيبيها منين بأرخص سعر وأفضل جودة، وهكتبلك كل حاجة وإنتي اختاري منها اللي إنتي عاوزاه.
الأول لازم تعرفي ثلاث حاجات
- الأولى: مفيش واحدة ف الدنيا بتقدر تجيب كل حاجة ولا كل حاجة هتطلع زي ما بتتمنيها، مهما الوقت ساعد وهتنسي حاجات، وأولوياتك هتتغير كل ما تقربي من الفرح، وبعد الجواز هتتكيفي مع كل حاجة.
- التانية: حاولي ست الحاجة تكون معاكي أو حد ينوب عنها، عشان هما أشطر ف الفصال، خصوصًا إن الأسواق اللي هقولك عليها ممكن تنزّلي الأسعار فوق ما تتصوري.
- الثالثة: قبل ما تدفعي أي فلوس اسألي على سعرها ف محل واتنين وعشرة وأدخلي كل الممرات والزخانيق والمحلات المستخبية.
قائمة جهاز العروسة
قايمتك فيها ست فروع:
- فرش الشقة
- المطبخ
- النيش
- المفروشات
- الهدوم
- التسريحة
تعرفي على: إزاي توفري في مصاريف فرحك؟
أولاً: فرش الشقة
عفش، نجف، سجاد
العفش
الأخشاب فيها مليون نوع، ومعظم المنتجات الغالية بتبقى عشان موديلاتها مش خاماتها، فيه موديلات مبهرة بيسموها خشب صيني.. دي لو لقيتيها ف شارع امشي من شارع تاني.
أضمن خامات في مصر موجودة ف دمياط، ممكن كمان تشتري من المناصرة، بس حذاري تجيبي م المحلات اللي ع الشارع، خشي الدهاليز وهاتي من الورش نفسها مش المعارض، ويبقى فل أوي لو عندك نجار بتثقي فيه وييجي معاكي يقيّم الخشب، يا إما عمولة عند حد متجرّب. ومتزعليش لو جيتي تستلمي لقيتي حاجة متغيرة ف الموديل، ده وارد جدًا وحصل مع كل العرايس اللي أعرفهم.. تكيّفي، خلي ده شعار المرحلة.
تعرفي على: دليل شراء مفارش العروسة، قائمة مفروشات العروسة بالأسعار
النجف
فيه درب البرابرة في العتبة أول شارع الجيش، ولو جبتي حاجة م البياعين اللي ع الأرض غيّري سلوكها ودواياتها، المكان التاني سوق الكهربا برضو ف العتبة ورا مبنى المطافي وده أضمن وفيه كل لوازم الكهربا مش النجف بس.
ولو عاوزة طراز عربي فأحسن مكان شارع المعز، ابعدي عن الحسين وخان الخليلي عشان الأسعار.
السجاد
عن نفسي اتصدمت م الميزانية اللي محتاجها السجاد، الماركات في منافذ بيعها طلعت غالية، والمش ماركات خامات سيئة أوي. ممكن تشتري من المحلات العادية بيكون عندها ماركات بس بواقي أو موديلات السنة اللي فاتت بتكون بنص السعر، وبيفاصلوا كمان.
خلصنا الفرش؟ ابتدي بقى ف جهازك.
تعرفي على: استخدامات الميكرويف: 14 شيء لا توضع في الميكرويف
ثانيًا: المطبخ
هتحتاجي فيه:
طقم حلل- طقم أطباق- معالق- صواني فرن- كوبايات شاي ومية- طقم توزيع- أدوات نظافة – شوية رفايع
طبعًا قِبلة كل عرايس أبناء الطبقة المتوسطة هو حمام التلات قدّس الله ثراه، ونصيحتي ليكي هاتي حاجات بسيطة جدًا لأنها هتكون للاستخدام اليومي، خلي الحاجات الكلاسيكية لو هتجيبي نيش.
والحلل السيراميك والتيفال لو مش هتقدري تجيبي ماركة يبقى بلاش لأنها بتبوظ بسرعة جدًا وكمان خاماتها مضرّة.
أدوات النضافة متجيبيهاش من معرض خاص بماركة معينة، هتكون غالية، هاتي الماركة اللي عاوزاها م المحلات العادية.
رفايع المطبخ صعب تحصريها، إنتي هتقفي عند الناس اللي بيبيعوا الرفايع وتلمي منهم كل احتياجاتك (مقص، قطاعة، فتاحة علب، معالق خشب، مصفاة، كنكة… إلخ) ودي القايمة اللي هتكتشفي انك ناسية نصها.. عادي جداااا، ابقي اشتري حاجة بحاجة بعد الجواز.
تعرفي على: الجواز حلو ولا وحش؟ ما هو الزواج الناجح؟ ما هي مقومات الزواج الناجح؟
ثالثًا: النيش
وكما تقول كل الطنطات “هي العروسة إيه إلا نيش!”.
متجيبيش نيش إلا لو كنتي هتستعملي أدواته لأنه ميزانية لوحده.. فلو نويتي هتحتاجي الآتي:
الصيني ثم الصيني (هي العروسة إيه إلا صيني؟!)، كاسات، معالق، صواني تقديم، طقم جيلي أو خشاف
واعملي حساب إن هدايا كتير بتكون حاجات للنيش.
برضو ده من حمام التلات، وده سهل لأنه مفيهوش رفايع، بس فاصلي كتير لأن الحاجات دي بطبيعتها غالية والبياعين بيستغلوا اعتزاز العرايس بيها وبيغلّوا أكتر.. ومتنسيش وجود الحاجة هيوفرلك كتير.
رابعًا: المفروشات
ملايات، بطانية، لحاف أو مفرش سرير، كوفرتة، مفرش سفرة، ستاير، فوط
فيه أماكن كتير للحاجات دي، ممكن من حمام التلات، الغورية، الموسكي، الوكالة وهي الأفضل ف نظري، وهناك هتلاقي ناس بتخيط الستاير وكمان ممكن تجيبي ملايات قماش وتفصليها.
ومش لازم أبدًا مليون فوطة ولا ستارة درابيه ولا مفرش سرير ستان، البساطة هي الأبقى والأسهل، عشان متكتريش على نفسك شغل البيت والغسيل وزحمة الدواليب.
خامسًا: الهدوم
لبس خروج، بيت، داخلي، لانجيري، جزم وشنط
لبس البيت والخروج
عليكي وع الوكالة، شارع 26 يوليو تحت الكوبري، هتلاقي براندات تجيبي منها 5 أطقم بأقل من سعر طقم لو هتجيبي من التوكيل. تشتري طقم بـ100 جنيه؟
اللانجيري
الحاجات الغالية والمحلات المعروفة ملهاش أي 30 لازمة، ومبتفرقش حاجة ف الاستخدام، المهم الموديل، وحاولي تعرفي ذوق جوزك والموديلات والألوان اللي بيفضلها، واختاري الألوان اللي بتظهر جمالك، مش لازم تجمعي باليتة ألوان ف دولابك.
فيه كمان حارة متفرعة من الموسكي بتبع بيجامات ولانجيري بالجملة للمحلات الغالية اللي بتضاعف السعر.
الجزم والشنط
لو مش براند يبقى متجيبيش غالي لأن كله زي بعضه، ولو عايزة أرخص سوق فيه قدام جراج العتبة سوق بواقي بنص السعر، بس متنزليش يوم الأحد ولا قرب العيد مثلاً عشان بينزلوا بضاعة نص نص يخلصوها ف الزحمة. بس للأسف مبيفاصلوش إلا نادرًا.
سادسًا: التسريحة
ميك أب، برفانات، أكسسوار
كلهم من مكان واحد فيه كنوز، اسمه سوق الجملة، ده حواري وممرات متفرعة من شارع بور سعيد بعد الموسكي بشوية، إذا كنتي زي كل بنات الطبقة المتوسطة وبتجيبي مكياجك هاي كوبي فإنتي اتفتحلك مغارة على بابا.
والبرفانات التركيب برضو بنت حلال والله، بس من حد متجرب.
يعني كل مشاويرك ف حمام التلات والعتبة والموسكي والغورية (ودول كلهم جنب بعض) والوكالة. ده كده كل ما يخطر ع البال، بدون سلفة ولا تدفعي كل اللي حيلتك ولا تضطري تحرمي نفسك من حاجة مهمة ولا الناس تاكل وشك.
ومتنسيش.. مش كل حاجة هتترسم زي خيالك، مش لازم كل حاجة تتجاب، وفّري طاقتك وافرحي.. ألف مبروك.
