منار

تم نشرة في 03/19/2017

وقت القراءة : 2 دقيقة

من غير كلام كتير ومقدمات طويلة، هدخل على طول في الموضوع.

عزيزتي الفاشونيستا.. إنتي لازم يكون عندك قميص أبيض وبنطلون أسود في دولابك، حتى لو كنتي مش بتحبي الألوان دي، حتى لو مش بتلبسي قمصان، حتى لو عندك هدوم كتير ومش عارفة توديها فين. القميص الأبيض والبنطلون الأسود في الدولاب مفيش أي قطع تاني ممكن تعوض وجودهم أو تاخد مكانهم، ودي بعض الأسباب اللي مخلياني أقول الكلام ده:

أولاً: عشان متقوليش معنديش حاجة ألبسها

الأسطورة بتقول معنديش حاجة ألبسها.. المشكله إننا لما بنقول كده محدش بيصدقنا، وغالبًا السبب إن دولاب الهدوم بتاعنا مبيقفلش من كتر الحاجات اللي فيه، واللي محدش يعرفه إن إحنا لو معندناش قميص أبيض وبنطلون أسود إحنا فعلاً معندناش حاجه نلبسها، عارفين ليه؟ عشان القميص الأبيض هو بس اللي بيليق على أي بنطلون أو جيبة، والبنطلون الأسود زيه هيليق على أي بلوزة عندي، ووجودهم بيخللي عدد الحاجات اللي في الدولاب بيتضاعف مرتين.

مثلاً أنا لو عندي 30 قطعة في دولابي، هيبقى عندي 15 طقم بس، عشان كل بلوزة ليها بنطلون أو جيبة واحدة بتليق عليها، لكن بوجود القميص الأبيض والبنطلون الأسود بقوا 45 طقم.

ثانيًا: عشان المقابلات الرسمية

لو عندك مقابلة شخصية مش هتحتاجي تفكري كتير تلبسي إيه؛ القميص الأبيض مع البنطلون الأسود وأي جاكت فورمال بقيتي جاهزة، وخصوصًا إن اللونين دول مع بعض بيعكسوا مظهر جاد ورسمي، بيسيب انطباع كويس عند الشخص اللي هيعمل معاكي المقابلة.

ثالثًا: عشان متلبسيش بادي ليكرا تحت الهدوم

النقطة اللي هتكلم فيها دي كلنا متفقين عليها على ما أعتقد. البادي الليكرا حلو قوي في الشتا لو الدنيا برد، لكن في الحر صعب جدًا، وكمان شكله مش بيليق على معظم الهدوم، فأنا لو عندي قميص أبيض لطيف ممكن ألبسه تحت أي بلوزة كت أو نص كم بدل الباديهات، وأكيد شكله هيبقى أحلى، وكمان مش هيزوِّد الإحساس بالحر زي الباديهات الليكرا.

رابعًا: أيًّا كان لون بشرتك.. شعرك أو الإيشارب اللي إنتي لابساه

القميص الأبيض والبنطلون الأسود هيليقوا عليه.

خامسًا: أناقة وببلاش كده

القميص الأبيض والبنطلون الأسود شكلهم مع بعض شيك وأنيق جدًا، بشكل يخليهم مع إضافات بسيطة زي حزام دهبي، شال أحمر أو إيشارب حرير، تبقي جاهزة لعيد ميلاد صاحبتك، حفلة خطوبة على الضيق، أو كتب كتاب قرايبك من بعيد.

سادسًا: برضه مع بعض شكلهم بسيط جدًا

بسيط لدرجة إنك لو لبستي معاهم كاب على راسك، أو إيشارب قطن، أو لميتي شعرك بتوكة لطيفة، مع كوتشي في رجلك وشنطة ضهر بقيتي جاهزة لرحلة مع أصحابك، يوم طويل في شغلك، يوم العملي في كليتك، أو النادي مع عيلتك.

لو معندكيش الاتنين دول في دولابك أو فيه قطعة منهم ناقصاكي أنصحك تنزلي حالاً تشتريها، لأ ده أنا كمان أنصحك يكون عندك من كل واحدة اتنين عشان الطوارئ. عُمر القميص الأبيض والبنطلون الأسود ما هيخذلوكي.. لو صاحية من النوم مستعجلة ومش مقررة هتلبسي إيه أكيد وجودهم في دولابك هيفيدك، لو عندك أي ظرف من أي نوع ومفيش وقت أو فلوس تشتري هدوم جديدة همّ هيوفوا بالغرض.. أنا عن نفسي بسميهم الإسعافات الأولية للدولاب.