هبه
الباستا من أكتر الأكلات شهرة على مستوى العالم عشان سهلة ومكوناتها دايما متاحة في البيت وكمان سريعة التحضير، بشكل عام كلمة باستا كلمة عامة تشمل نوع المعجنات اللي مصنوع بالأساس من دقيق وبيض.
والباستا نوعين، نوع منها ناشف وده اللي كلنا نعرفه باسم المكرونة، ومنها النوع الطازه اللي بنعمله في البيت.
الباستا الناشفة
ميزتها إنها سهلة الإعداد وسهلة التخزين ورخيصة جدا ومتوفرة في كل مكان.
أهم حاجة لازم نراعيها لما نطبخ الباستا الناشفة إننا نطبخها لدرجة “الألدنتي Aldente”.
الألدنتي هي الدرجة اللي بتكون فيها الباستا مستوية بس مش أكثر من كدا، يعني مافيهاش طعم النشا زي الباستا النية بس في نفس الوقت لسه محافظة على قوامهما. أكبر خطأ ممكن نعمله هو إننا نطبخ الباستا أكثر من اللازم ونسيبها تعجن. وقت الطبخ اللي مكتوب على العلبة هو وقت إرشادي لكن أهم شي نعرف بيه إنها استوت بإننا ندوق حبه بعد نص الوقت تقريبا أول ما توصل لدرجة الألدنتي نطفي النار ونصفيها على طول.
الشيء الثاني هو إن الباستا تتسلق في حلة كبيرة فيها ميه كثيرة مملحة ونظيفه وبدون أي إضافات ثانيه على أقوى غلية ممكنة. حركة الغليان مهمة إنها تخلي الباستا تتحرك في الحلة وما تلزقش في بعض وعشان كدا بنستخدم حلة كبيرة للسلق. المية المستخدمة تكون نظيفة تماما وماتكونش مية من السخان مثلا أو سبق استخدامها في سلق أي نوع من الخضار.
ملحوظات مهمة..
(1)
البعض بيضيف الزيت لمية سلق الباستا ظنًا إن ده مش هايخليها تلزق في بعضها. الزيت مابيمنعش إن الباستا تلزق في بعض بس هو هايمنع إن الصوص يلزق عليها بعد كده.
(2)
بعد ما نصفي الباستا فيه ناس بتغسل الباستا بميه باردة! ده برضه خطأ شائع.. غسل الباستا بيغسل النشا اللي فيها واللي يساعد الصوص يلزق عليها!! الحالة الوحيدة اللي ممكن نغسل الباستا فيها هو إذا كانت لسلطة باستا لأننا مش هانحتاج النشا اللي على الوش. غير كده ماتغسلوهاش أبدا.
(3)
الباستا والصوص لازم يجهزوا في نفس الوقت. ما ينفعش الباستا تنسلق وبعدين تتصفى وتقعد لحد ما يخلص الصوص، ده بيخليها تلزق على بعض.. الباستا تتصفى وتنحط على الصوص على طول. الصوص في الغالب عادي تطفى عليه النار ويقعد بس الباستا لأ، عشان كده لو مش بتعرفوا تعملوا حاجتين في نفس الوقت، يبقى تعملوا الصوص الأول وبعدين الباستا مش العكس.
دي كانت ملاحظات عامة في تسوية الباستا ولو راعينا الملاحظات دي هانحصل على باستا مختلفة تماما عن اللي متعودين عليها دايما، لأننا هانتجنب أهم الأخطاء الشائعة في تسوية الباستا.
