هبه
الستيتك من الأكلات اللي مفيش عليها أي خلاف.. كلنا بنحبها وممكن نروح مطاعم غالية جدا بس عشان خاطر طبق الستيك بتاعها مش ممكن نلاقيه في مكان تاني.
أول حاجة لازم نعرفها عشان نعمل ستيك مميز هي قطعة اللحم اللي هانعملها ستيك.. وأفضل قطعتين هما الـ T bone steak (الستيك اللي فيه عضمة على شكل حرف T) والـRib eye steak (الستيك المتاخد من منطقة الضلع).
تاني حاجة هي صلصة الشواء أو صوص البار بي كيو.
أولا تجهيز الصوص
المقادير:
بصلة صغيرة مفرومة ناعم و3 فصوص توم مفرومين ناعم قوي وزيت زيتون
معلقة صغيرة بودرة مستردة (لو مش متوفر ممكن استخدام معلقة صغيرة مستردة عادية) ومعلقتين كبار سكر بني (لو مش متوفر ممكن استخدام سكر أبيض) ومعلقة صغيرة شطة
نص كباية كاتشاب ومعلقتين ورشستر صوص ومعلقة خل تفاح (لو مش متوفر ممكن استخدام أي نوع خل) وربع كوباية دبس رمان.
رشة ملح ورشة فلفل إسود.
تعرفي على: افضل انواع الشوايات واسعارها؟
الطريقة:
نحمر البصل والتوم في زيت الزيتون لحد ما يدبلوا، ونضيف باقي المكونات كلها ونسيبها تغلي لمدة دقيقتين على النار.
ملحوظة:
الصلصة دي من الممكن إضافتها لأي نوع مشويات ومن الممكن حفظها في برطمان معقم نضيف لمدة إسبوع في التلاجة أو لمدة شهرين في الفريزر.
ثانيا تجهيز الستيك
المقادير:
قطعة ستيك (القطعة تقدم لشخص واحد) وملح وفلفل إسود وورق ألمونيوم.
الطريقة:
هانتبل قطعة الستيك بملح وفلفل إسود ونلفها في ورق ألمونيوم وندخلها الفرن لمدة تلت ساعة، ولما تخرج من الفرن هاندهنها بصلصة الشواء اللي عملناها ونشويها على الجريل، أو لو مش عندنا جريل هانشويها في طاسة تيفال أو نحطها على شبكة الشواية الفحم.
التقديم
الستيك لازم يتقدم سخن، وممكن نضيف معاه بطاطس بيوريه وخضار سوتيه أو مع مكرونة بأي نوع صلصة نحبه.
