من الحاجات اللي موجودة في قايمة أمنيات ستات كتير إنها تقضي يوم في spa. لكن للأسف الأمنية دي مش سهل دايمًا تتحقق، إما عشان الفلوس أو عشان الوقت، أو ساعات الاتنين مع بعض. بس مين قال إن إحنا هنيأس؟
لا يأس مع الدلع، عشان كده دوّرنا وفكرنا لحد ما لقينا طريقة نعمل بيها home spa أو منتجع منزلي.
في البداية استقطعي وقت لنفسك
أينعم مش هتحتاجي وقت كبير زي الوقت اللي بتحتاجيه لو رحتي مكان برة، بس على الأقل هتحتاجي من ساعة ونص لساعتين، ممكن تصحي بدري وباقي اللي في البيت نايمين، أو تنبهي عليهم إن الوقت ده بتاعك ومحدش يخبط على الحمام كل شوية.
جهزي الحمام
جهزي فوط نضيفة وريحتها حلوة، خدي كل أدواتك معاكي عشان متحتاجيش تخرجي من الحمام. دلعي الحمام بقى، يعني لو عندك شموع معطرة يا سلام. اعملي قايمة أغاني وموسيقى هادية تساعدك على الاسترخاء وشغليها من الموبايل. وبمجرد ما تدخلي الحمام افتحي المية السخنة عشان البخار يملاه. وخدي معاكي مشروب الديتوكس اللي هتكوني محضراه من قبلها في التلاجة (فيه وصفات كتير مثلاً: ليمون ونعناع وخيار ومية. أو ليمون وفراولة ونعناع ومية. وغيرها كتير).
المشروب ده هيساعدك على الانتعاش ويعوض المية اللي بتفقديها مع البخار والحمام السخن، وهيساعد بشرتك وجهازك الهضمي، اشربي منه طول ما إنتي في الحمام.
ماسك الوش:
لفي شعرك بفوطة، وعرّضي وشك للبخار، سواء هتستخدمي جهاز البخار لو عندك، أو حلة عميقة فيها مية مغلية. البخار هيساعد المسام على التفتح فهتستقبل الماسك بشكل أفضل.
جهزي الماسك ده ووزعيه على وشك:
المكونات: موزة مهروسة.
معلقة عسل نحل.
معلقة لبن.
نص معلقة جيل صبار.
الطريقة: اخلطي المكونات كلها مع بعض، وافرديها على بشرتك. وسيبيها 15 دقيقة وبعدين اشطفيها.
ماسك الشعر:
ادهني الشعر وفروة الرأس بزيوت طبيعية، ممكن تستخدمي زيت الزيتون أو جوز الهند أو الجوجوبا، وغيرها من الزيوت المفيدة لشعرك. أو ممكن تستخدمي حمام كريم بس تدهنيه على الشعر مش على فروة الراس، ولفي شعرك بفوطة سخنة أو بونيه بلاستيك.
الباديكير:
انقعي إيديكي ورجليكي في خليط المية الدافية والخل، وممكن تضيفي عليهم غسول الفم لمدة تلت ساعة تقريبًا. وابدئي بعدها في إزالة الجلد الميت من الكعبين. واستخدمي عود خشب ملفوف بقطعة قطن عشان ترجعي الجلد الزائد حوالين الضوافر لورا. أو استخدمي أداة إزالة الجلد الزائد. ابردي ضوافرك بالشكل اللي تحبيه.
اشطفي بعدها شعرك ووشك عشان نتنقل للخطوة اللي بعد كده.
وقت الاستحمام:
فيه خيارات كتير قوي، اختاري المناسب منها، ممكن مثلاً تدهني جسمك بصابون مغربي وتسيبيه شوية، وبعدين تشطفيه وتدعكي جسمك بليفة مغربية بحركات دائرية.
ممكن تستخدمي Bath bomb، وهتلاقيها متوافرة في أغلب محلات منتجات العناية بالجسم، وكمان فيه صفحات أون لاين بتبيعها أو ممكن تعمليها بنفسك.
طريقة عمل كرات الحمام الفوارة Bath bomb:
المكونات: 5 معالق كبيرة ملح الليمون (مطحون ناعم).
معلقة متوسطة بيكربونات الصوديوم.
معلقة كبيرة نشا أو بودرة تلك.
معلقة صغيرة زيت مرطب (زيتون أو جوز هند أو أي زيت بتحبيه).
قطرات من زيت عطري اختياري.
الطريقة: اخلطي المكونات كلها بسرعة جدًا، وضيفي المية نقطة نقطة لحد ما توصلي للقوام المناسب. اضغطيها في قوالب تلج لحد ما تنشف وبعدين طلعيها واستخدميها.
ممكن تعملي صنفرة أو سكراب لجسمك سواء بسكراب جاهز أو تستخدمي خليط السكر وزيت الزيتون. أو زيت الزيتون وبواقي تفل القهوة (البن الخشن).
ممكن تملي البانيو بالمية الدافية والزيوت العطرية المفضلة ليكي.
بعد ما تخلصي الخطوة دي نشفي جسمك وشعرك كويس وادهني جسمك بلوشن مرطب أو زيت زيتون أو جوز هند.
البسي لبس مريح بتحبي شكلك فيه. وحطي البارفان اللي بتحبيه.
وأخيرًا كده خلصتي السبا بتاعك، ممكن عشان نكمل اليوم الحلو ده نشغل فيلم رايق، ونعمل حبة فشار بالكراميل ونقعد نتفرج.
ومتنسيش تكرري التجربة مرة كل شهر على الأقل.
