بقلم: روكسان رأفت
“مشكلة الكتابات والبوستس إنها سلاح ذو حدين ممكن تخلي البنات يبقى عندها وعي وتختار كويس، لكن كمان بتخليها تاخد صورة مبالغ فيها وتخوف عن الرجالة“. الجملة دي بالظبط قالهالي جوزي، في مرة كنت بحكي معاه عن مشكلة قريتها في إحدى الصفحات علي السوشيال ميديا، الخاصة بواحدة من أكبر أخصائيين العلاقات الزوجية. واللي كانت بترويها إحدى الزوجات، من وجهة نظرها طبعًا، وكان الواضح من المشكلة دي إنها بتأرق حياتها لدرجة إنها بتفكر تنهي الجواز وتنفصل.
والحقيقة إن أنا نفسي لما قريتها حسيت إني كرهت الرجالة وغضبانة منهم، بالرغم من إني برة المشكلة دي. واللي حصل إن الجملة اللي اتقالتلي دي علقت معايا جدًا، يمكن لأني بحب أقرأ وأتعلم، وطبعًا بتأثر باللي بقرؤه، وكمان عشان بحب الكتابة وأتمنى إني أكون مؤثرة بشكل إيجابي.
لكن برضو عشان أنا ست، ولما بأقرأ حاجات زي كده طبعًا بتحيز للستات جدًا، وبحس بمشاعرهم، لدرجة إني ببقي عايزة آخد بتارهم من جوزي شخصيًا. وأول لما بفكر كده بتخيل مشاعر ورد فعل البنات اللي لسة مرتبطوش، بتخيل خوفهم وحيرتهم وهما بيختاروا وبيقربوا على الجواز. لدرجة إن فيه بنات كتير شابة حلوة بترفض الارتباط عمومًا، من كتر اللي بتسمعه وتقراه وتشوفه أحيانًا.
وطبعًا بسبب التجارب السلبية دي الموضوع بقى فعلاً يخوف، لدرجة إننا لما بنسمع عن حالة إيجابية بنقعد نتريق ونحس إن ده مش حقيقي، وكأن العادي والطبيعي هو السلبي مش العكس. حتي أنا شخصيًا بتأثر بالكلام اللي بقرؤه، حتى لو مفيش في حياتي حاجة معينة بتزعلني، لكن مجرد تفكيري إن فيه مشاكل بالحجم ده سببها شخص، بنسيب كل حياتنا عشان نختار نعيش معاه، بيخليني ناقمة جدًا وغضبانة.
بس بالرغم من كده اللي يعرفني عن قرب يعرف إني بحب الجواز، مش بشتم فيه، مش بقول إنه هم، لكن ببصله بنظرة حيادية مايلة للإيجابية. وطبعا ممكن حد يتخيل إن حياتي تخلو من الاختلافات، عشان كده أنا بتكلم بثقة.
والحقيقة لأ..
مفيش جوازة مثالية تمامًا خالية من أي اختلافات، أنا بختلف وبعيط وبنبسط وأحب عادي خالص زي أي ست. وأكاد أجزم إن مفيش جوازة سواء كانت عن حب أو أي طريقة تانية مفيهاش اختلافات، لدرجة إن في وقت من الأوقات كنت شبه متأكدة إن كل زوج وزوجة فيه في حياتهم نوع معين من المشاكل متكرر، وهو ده اللي سايد بصورة كبيرة.
ولأن الجواز زي أي حاجة “له ما له وعليه ما عليه”، وعشان نكون حياديين، فيه بعض النقط المهمة عايزة أقولها:
* الجواز واحد من التحديات الكبيرة اللي بتواجهنا في الحياة، يعني حتى لو اخترتي متتجوزيش هيكون عندك تحديات، زي: شغلك، هتعيشي فين، علاقتك بأهلك، ربما يكون الجواز أصعب لكنه تحدي في الحياة.
* الجواز مسؤولية مشتركة على الطرفين، يعني زي ما فيه مشاكل بيبقى سببها عدم فهم الراجل لطبيعة الست، أو ربما احتياجه للتغيير، فيه مشاكل سببها العكس، إن الست محتاجة تفهم طبيعة الراجل وتتغير، وطبعًا لأننا مشبعين بالصورة السلبية عن الرجالة فمش قادرين نصدق كده.
* الاختيار الصح عليه دور؟ طبعًا عليه دور، لكن كمان الشغل المستمر على علاقة الزوجين وصيانة العلاقة والتغيير الشخصي زي ما قلنا عليه دور كبير متستهونوش بيه، وفي أوقات كتير بينقذ جوازات كتير.
* الجواز للمستقرين، ودي مش جملتي، دي جملة أنا سمعتها وكانت نور في الطريق، أيوة الجواز محتاج إني أكون كبرت، اتعلمت، عرفت نفسي، ليَّ علاقات متزنة بناس كتير، وعلاقتي بنفسي متزنة، لأن غير كده هتعب، هأحبط وكمان هتعب شريكي.
* شوف وشوفي إنت متأثر بمين، لو كل اللي حواليك أمثلة سلبية، أو ناس كلامها سلبي، هتتأثر وتتعب وتخاف وربما تنسحب.
النظرة دي ربما احتاجت مني سنين عشان تتكون، ورغم كده أنا عارفة إن فيه أوقات هختلف، ويمكن أعيط، لكن مش هنسحب، هكمل وأتغير وأحاول وأسأل، لحد الرحلة عمومًا ما تنتهي.
اقرأ أيضًا: التغيير بعد الجواز بين الطبيعي والمرفوض
