بقلم: ش
أنا حصلي ختان فعلاً؟! ده السؤال اللي عقلي بيسأله كل يوم، ومش قادر يستوعب إنه حصل. أنا عمري تلاتين سنة، حصلي ختان من وأنا في تانية إعدادي، بس أنا لحد اللحظة دي عقلي مش متقبل إن أنا حصلي أكبر جرح في عمري كله على إيد أمي. بيتهيألي مهما حصل مصايب في حياتي مش هتبقى قد المصيبة دي.
كل حاجة في اليوم ده فاكراها بتفاصيلها
أمي اللي المفروض مصدر الأمان بالنسبة ليَّ، تبقى السبب في أكتر وجع وقهرة بحس بيها في حياتي كلها. عشان إيه؟! وعشان خاطر مين ضحيتي بيَّ وكشفتيني وبترتي حتة من جسمي ربنا خالقني بيها؟! بأي حق؟! أنا مش شايفة غير شوية مرضى نفسيين بيتجمعوا في حفلة خفية لممارسة السّادية، على بنت لا حول لها ولا قوة، ومش قادرة تدافع عن نفسها. اللي يقدر يقف ويشوف إنسان بيتأذى من غير ما جفنه يرف يبقى مريض نفسي، لا وكمان ده حتة منه بتتعذب قدامه! أنا بجد مش متخيلة التركيبة النفسية اللي تعمل كده وتعيش بعد كده من غير حتى شعور بالذنب! دول بشر؟!
يكشفوا عورتها بمنتهى بالبجاحة وسط الناس، في حضور الأم والخالات، واللي معدي يبص مش مشكلة. إزاي الأم اللي بتقولي داري جسمك والبسي ده واقعدي قافلة رجليكي طول الوقت، هي نفس الأم اللي بتسمح بتعريتي قدام الناس، في سن أكاد أكون فيه هبلغ.
تعرفي على: زوجتي مختونه ماذا أفعل ؟ هل الختان ضروري؟ الختان والبرود الجنسي
صدمة نفسية ملهاش حدود وتصرفات جنونية صارخة
إزاي بيشتروا العفة والنظافة اللي بيقولوا عليها عن طريق التعرية والكشف والبتر؟! إزاي بيقرروا عني قطع جزء من جسمي بالطريقة البشعة دي؟! إيه كمية القسوة ضد البنات دي؟! عقاب نفسي جسدي جنسي مركب مدى الحياة. عقاب أكثر تعقيدًا مما حد يتخيل، لأنه جاي من الأهل اللي المفروض يحموا مش يعرُّوا ويقطعوا. مفيش أسوأ من الإحساس اللي أنا حاساه، بقالي سنين، بحتقر نفسي وبكرهها ومش قابلاها، وحاسة إن هى عار. الأم اللي غلبت قسوتها رحمتها اللي ربنا وضعها فيها اللي سمعت كلام مجتمع جاهل على حساب أدنى درجات الرحمة والإغنسانية متستاهلش تبقى أم.
مين المستفيد؟!
لما واجهتها بعد ما كبرت وقلتلها عملتي فيَّ كده ليه، وليه عملتيلي ختان قالتلي عشان لما تتجوزي متحسيش. تخيلوا بتعترف إنها عملتلي عاهة عشان محسش! وزعقتلي وسابت الأوضة ومشيت. قلتلها أنا كرهت نفسي بدل ما أكرهك، عشان إنتي أمي. قالتلي عايزة تكرهيني اكرهيني! حد شاف كده؟!
إزاي أعيش وأنا أصلاً مكسورة ومش حاسة بالأمان، وحاسة بالنقص والإهانة اللي جرحها مبيروحش؟! أنا بمشي أبص على البنات الصغيرين في الشارع، وأقول جوة نفسي يا رب ارحمهم واحميهم ومحدش من أهلهم يعمل فيهم حاجة.
شكل البنت والأنوثة جوايا متكسر مليون حتة، أنا بتألم حرفيًا كل يوم ألم نفسي رهيب، وبعيط بالساعات، كل ده عشان مين؟! مين المستفيد؟!
اقرأ أيضًا: إزاي تتعافي من ألم الختان؟
