بقلم/ روان مصطفى قاسم
أيام قليلة متبقية على بداية سنة جديدة، بأحداث جديدة ويمكن ناس جديدة كمان، وعشان تبقى السنة اللي جاية أحلى من اللي فاتت، لازم نواجه أخطاء السنة دي ونتجنبها بعد كده.
1- خدعوك فقالوا ثالث المستحيلات صديق وفي
اكتشفت إن فيه صداقة حقيقية، وأصدقاء ممكن يبقولك في قرب إخواتك. المهم بلاش تسرع في الحكم على حد واعتباره صديق بدون مواقف حقيقية تثبت ده وتأكده، ولأن الصداقة نعمة من ربنا ومش حاجة نلاقيها كل يوم، طبيعي تكون نادرة وصعب نلاقيها. لكن أسطورة استحالة وجود صديق حقيقي انتهت بالنسبة لي.
2- نظرية القطارات
الجواز- الشغل- تعلم أي مهارة جديدة أو لغة، كل دي حاجات ملهاش تاريخ صلاحية، من حقنا نختار الوقت المناسب ليها. حياتك ملك ليكي لوحدك، نظميها بالطريقة والترتيب اللي يعجبك.
3- اختاري شريك حياتك بعقلك
إزاي طيب؟! الجواز علاقة عاطفية مقدسة من الدرجة الأولى، يعني لو كنت هفكر فيها بعقلي تمامًا يبقى هستخدم مشاعري إمتى؟!
4- فارس الأحلام مكانه الأحلام وبس
لأ.. وألف لأ كمان! فارس أحلامك موجود وهتقابليه لو استنيتيه وصبرتي ومقبلتيش بأي حاجة وخلاص، ولما تشوفيه هتعرفي ليه انتظارك مهما طال كان يستاهل.
5- لازم تبقي… أصل الرجالة بيحبوا كده
املي الفراغ بأي كلمة أو صفة، وبعدين امسحي القاعدة دي من دماغك نهائي. إنتي على طبيعتك هيحبك الشخص المناسب ليكي واللي لايق عليكي، إنما التصنّع والادّعاء طبيعي يوصلوكي لحد مش شبهك.
6- إنتي كبنت قدراتك محدودة
يوم ما تشكّي في قدراتك متستنيش حد يؤمن بيها. يوم ما تحسي إنك متقدريش، افتكري كام واحدة قدرت تحفر اسمها في التاريخ برغم إنكار كل اللي حواليها لقدراتها.
7- مينفعش تعملي “كذا”.. أصل مفيش حد في الدنيا بيعمل كده
مفيش حد بيعمل كده؟ ماشي مش مشكلة، خليكي إنتي أول واحدة تعمل كده عشان الناس اللي بعدك اللي بيحبوا يقلدوا يلاقوا حد يعملوا زيه.
8- إشمعنى بنت خالتك/ بنت عمك/ أختك أو أي واحدة في الدنيا تعمل كذا وإنتس لأ؟!
إحنا مش في مسابقة، كل واحد له حياته وظروفه اللي مهما تشابهت مش هتبقى متطابقة مهما حصل، ده غير إن ردود أفعالنا وأرواحنا مختلفة عن بعض، عشان كده وقّفي أي مقارنة بينك وبين أي حد بتحصل جواكي أو من اللي حواليكي، عيشي حياتك إنتي مش حياة اللي جنبك.
9- شكلك كده مش حلو، حاولي تخسي/ تتخني/ تحطي ماكياج/ تقلعي الحجاب…
طول ما إنتي مبسوطة بشكلك وراضية عنه متسمحيش لحد يهز ثقتك في نفسك، لو عايزة تعملي أي تغيير يبقى عشانك إنتي، مش عشان ترضي الناس اللي مفيش حاجة بترضيهم.
10- اعتذري وخلاص عشان الموقف يعدي
الجملة دي أنا بسمعها كده “اتنازلي عن كرامتك دلوقتي عشان ترضي غرور شخص تاني والموقف يعدي”؛ متعتذريش عن غلطة معملتيهاش، متكسريش نفسك عشان ترضي حد، وده مش معناه إنك متكبرة أو بتعقّدي الدنيا. فيه حاجات كتير ممكن تحل المشاكل بدون ما تعتذري (لو مش غلطانة طبعًا).
11- إنتي طيبة وهبلة
لو إنتي طيبة تبقى دي حاجة جميلة ومن أحلى صفاتك، ومش معنى إن بعض اللي حواليكي مش مقدرين ده تبقي إنتي غلطانة. آه صحيح فيه ناس بتستغل طيبة اللي قدامها بس لما يكون فيه حد طيب وقلبه أبيض بجد بيبقى حابب الناس وحابب يساعدهم بدون مقابل، ودي من صفات الأتقياء مش من صفات الهُبل.
12- الحب الأول مفيش زيه
آه مفيش زيه فعلاً، عشان فيه أحلى بكتير.. الحب الأول غالبًا هو حب غير ناضج مصحوب بدهشة طفولية تجاه نوع جديد من المشاعر اللي بنجربها لأول مرة، وبالتالي غالبًا اختيارنا للشخص مش بيبقى مظبوط خالص.
13- مين فات قديمه تاه/ من خاف سلم/ اللي يمشي على الأصول ميتعابش
مش كفاية بقى الوقت والفرص اللي ضاعوا بسبب الخوف من أي حاجة جديدة؟!
14- استني العريس الجاهز الغني اللي هيريحك
لأ طبعًا.. لو قابلتي الراجل اللي طول عمرك بتحلمي بيه وسبتيه عشان مش جاهز ابقي احكيلنا عن حياتك لو عيشتي تعيسة مع العريس الغني اللي كان مفروض يريحك.
15- لو سيبتي خطيبك مش هتلاقي غيره/ لو اتطلقتي الناس هتشمت فيكي وولادك هيعيشوا مشتتين بينكم
انهي أي علاقة بتطفي روحك بدون تردد، وولادك لو عاشوا في بيت كله مشاحنات وأب وأم بيجرحوا في بعض كل يوم أكيد مش هيبقوا مبسوطين.
