بقلم/ تغريد عبد الجواد
1- متدورش على الزرار الناقص في جاكت حد، الناس هيفضلوا زي ما همّ، نفس الآي كيو، نفس التسكع في الطريق في عز الزحمة، نفس الهذيان واستخدام القفا بدلاً من العين عشان يبصوا قدامهم، عشان كده لازم تتكيف على إن مهما كانت شياكة الجاكيت غالبًا هيبقى ناقصه زرار.
2- بلاش يبقي الديد لاين هو الوحش الكاسر، وفي نفس الوقت الملاذ الأخير، مش لازم جسمك يخلص كل الأدرينالين اللي حيلته قبيل الديد لاين، ممكن يشتغل سيمباثتيك وباراسيمباثتيك بالمعدل الطبيعي.
3- بطّل تلبس خفيف في عز الشتا وبعدين تشتكي من البرد وتضطر تستسلم لحتة فيروس ميسواش، وبعدين تاخدله أنتي بيوتك يموت النورمال فلورا ويفضل هو عايش بالعند فيك، وحتي لما يمشي هيبقى بمزاجه هو مش بمزاجك إنت.
4- بلاش تتفنن في تكرار نفس الأخطاء بنفس الآلية وتشوف نفس النتيجة.! مش هقولك اتعلم من أخطائك. كررها واتأكد براحتك، بس على الأقل غيّر أي حاجة، ترتيب الاحداث مثلاً، الطريقة، أي حاجة. المهم متكررش نفسك بدل ما تزهق وتكتشف فجأة إن سنين عمرك كلها عبارة عن سنة واحدة بس مكررة.
5- الحنية مش بتتباع ولا بتتشري، متستناش حاجة من حد، خليك حنين عليك وكفّي نفسك بنفسك بدل ما تشحت من الدول التانية اللي معندهمش تاريخ ولا جغرافيا أصلاً لأنهم هينسوا نفسهم وهيتنططوا عليك ومش هينوبك منهم لا حنية ولا يحزنون.
6- متدخلش في ريليشن إلا وإنت عارف إنت عايز منها إيه.. أولها إيه وآخرها إيه، وخلي بالك مفيش حد بيتغير عشان حد، ممكن يتغير عشان نفسه، ودي كمان نسبتها بسيطة، عشان كده لازم تقبل الصفقة زي ما هي بعبلها أو ترفضها.
7- متصاحبش حد بيعرفك عشان حاجة إنت مختارتهاش، زي بلدك أو شكلك أو أهلك.. صدقني ده ديكور، بلاش تحتفظ بيه إلا لو بيتك فيه كل اللي إنت محتاجه ومش ناقصه غير الديكور.
8- لو مش مرتاح في شغلك سيبه، متكملش لمجرد إنك محتاج فلوس لأنه هيستنزف منك طاقة أهم بكتير من الفلوس اللي بتاخدها.. اشتغل على نفسك وسيبها على ربنا، هو الرزاق مش مديرك.
9- متخليش ذكرياتك تاخدك منك، ومتخليش خوفك من بكرة ينسيك إنه لسه مجاش، عيش اللحظة وسيب لكل يوم شخصيته المستقلة.
10- اوعي تحطي آيلاينر وإنتي متأخرة لأن يومك هيبوظ وشكلك هيبوظ وهتفقدي الثقة في نفسك، وهتلعني الآيلاينر علي اللي اخترعه (نصيحة فمنيني).
11- لما تزعل من حاجة عبّر عن غضبك بالطريقة اللي تعجبك بشرط عدم الإضرار بالآخرين طبعًا.. ابكي.. اصرخ.. انعزل.. اعمل اللي إنت عايزه، لحد ما تلاقي نفسك خلاص زهقت من الحالة دي.
خلاص بقى إنت زعلت وأخدت راحتك في الزعل.
ارمي كله في الزبالة وقول بسم الله الرحمن الرحيم وابدأ من تاني.
12- كل يوم فكّر في نعم ربنا عليك وقول شكرًا يا رب عليها، وإنت بتفكر هتلاقي نفسك اتلهيت في حاجات يومية تانية من غير ما تخلص عد ولا تفكير في نعمه، وهتلاقي نفسك كمان بقى عندك طاقة إيجابية ودي طبعًا وقود كويس يخليك تكمل معافرة من غير ما تحس بالتعب.
13- الحب حلو بكل صوره وأشكاله وشخوصه وحواراته، متحرمش نفسك منه ومتخبيهوش، افتخر بحبك للي حواليك وفكرهم من حين لآخر إنهم هدايا القدر، هتلاقي نفسك احلويت وهمّ كمان.
14- متحلمش إن السنة الجاية هتبقي أحسن، كلها أيام سودا، بس في النهاية لازم نكمل لأن الحياة تجربة مثيرة تستاهل إنها تتعاش، متنساش بس تجيب كل الحاجات الحلوة من قفاها وتمسك فيها بإيديك وسنانك.
إرادتك هي اللي هتغير لون الأيام من الأسود لأي لون تاني مشرق.
15- فكك من النصايح والكلام الفاضي ده، أنا أشطر واحدة بتقول نصايح لنفسها وللناس وعمرها ما نفذت حاجة.
خليك شبهك وخلاص.
