بقلم/ ابتسام ناصر
اتعودت في نهاية كل سنة أكتب خططي وأحلامي للعام الجديد، ودايمًا الورق بيضيع والسنة تعدي. فكرة الحملة خلتني أحس إني محتاجة السنة دي أقف وأشوف هي كانت شكلها إزاي، وأنا كنت عاملة فيها إيه. مكدبتش خبر، حضّرت مج الشاي والورق والقلم وشغلت الراديو على حفلة أم كلثوم، غمضت عينيّ ولقيت 2015 ضفيرة من شوية حكاوي، هقولكم أكتر 15 أثروا فيّ.
1- حكاية رؤية
أنا صعيدية من بلد المواويل بسافر كتير القاهرة للدراسة والشغل، وبحضر صالونات ثقافية، حلمت مرة بصالون ثقافي في سوهاج، وحصل في يناير 2015. بداية كيان الصالون سميناه رؤية وترجمة الاسم جوايا “نور وفكر”. بدأنا بفاعلية كبيرة في يناير وواحدة في أبريل ومكملين.
2- حكاية ماريمبا
في إحدى المجموعات العلاجية والتدريبية اقترحوا عليّ تربية قطة، وعشان التجارب الجديدة بتستهويني بقى عندي قطة سميتها ماريمبا، هي بصراحة معايا من أواخر 2014 بس سنتها الأولى من عمرها كملتها في 2015، معايا على الحلوة والمرة ووجودها فارق.
3- حكاية أستاذي
الحمد لله وفقت للتدريب مع أ.د/ رفعت محفوظ أستاذ الطب النفسي، وزي ما وصفته إحدى الزميلات إن كل دقيقة معاه حياة. ممتنة جدًا لأستاذي اللي نوّر وجداني بعلمه في آخر شهور 2015.
4- حكاية قرار
السنة دي قررت أرتبط بزواج وأنجب طفلين، واكتشفت إن السنين اللي فاتت كنت لسه مش مقررة حاجة كده كلام أي كلام. قراري واضح بمواصفات ارتباطي والتزاماتي في زواج يفرح ويكبر. ومش بخجل أعلن قراري قدام العالم كله.
5- حكاية كتاب
بالصدفة شفت كتاب في سور الأزبكية بمعرض الكتاب اسمه: “ Daily meditations for women who love toomuch”، اسمه جذبني؛ اشتريته ونسيته وعلى نص السنة احتاجته، الكتاب ساعدني جدًا وفاق كل توقعاتي. حطيته تحت مخدتي وكل ليلة أقرأ منه كام صفحة وأنفّذها على قد ما أقدر.
6- حكاية علاقة
علاقتي بربنا السنة دي اتغيرت، شايفة الله الرحيم الودود الجميل الغفور القريب مني، عرفت الله من خلال الدعاء والحب والأشياء الجميلة، مبقيتش خايفة بقيت مُحبة.
7- حكاية وجع
أول مرة أدوق الوجع وأصبر عليه وأاغطس جواه وألمس روحي. عرفت إني إنسانة من حقي أتوجع، مخوفتش يبان ولا استكبرت أطلب المساعدة، بكيت بحرقة وانهارت وفهمت إن وراء كل وجع وصبر ولادة أمل جديد.
8- حكاية بوسة
بحركة تلقائية مباغتة قربت منه وبوسته، ومية الوضوء على وشه ليها إحساس الندى، والدي اتفاجئ، بنتي اتغيرت وشفت في عينيه الحمد على سلامتي، أصلي كنت نادرًا ما ببوسه.
9- حكاية أسوان
سافرت أسوان للمرة الأولى في شهر أبريل. حكاية تانية، النيل والسحر والجمال والبيت النوبي وركوب الجمال والحنة والجلابية والبنوتة الحلوة اللي كفها جميل وصغير.
10- حكاية عنوان
قررت أستقل ومترددتش؛ بقى عندي عنوان من شارع وعمارة وشقة، ولقيت العنوان عفش بيتجاب واحدة واحدة، مرتبة وسرير ولسه الدولاب، حساب لكل قرش وترتيب أولويات، لكن العنوان يستاهل ده.
11- حكاية فرحة
سافرت من سوهاج لقنا عشان أزور صديقة. فرحة صديقتي بوجودي قربت بيننا سنين، كنت هزعل من نفسي لو المشاغل أو الكسل حرموني من الفرحة دي.
12- حكاية عيد ميلادي
شهرين بتخيل عيد ميلادي وبرتب فيه، وكل حاجة تخيلتها عملتها. عيد ميلادي كان مختلف مخذلنيش زي كل سنة، وجاني ورد وأصحابي ونسوني فيه.
13- حكاية نجاح
في آخر ديسمبر ظهرت نتيجة الامتحان ونجحت، وكلها شهر وهبقى طبيبة نفسية رسميًا قد الدنيا. مشوار تغيير طويل مش سهل، كلام محبط ونفس بتكل وناس بتدعم. وأهو نفعت.
14- حكاية أسف
فهمت إني عندي مشكلة مع الاعتذار. بعتذر عن أخطاء وهمية عمال على بطال، بعتذر للي بيدوس على رجلي ولكل حد بيخبطني، كأني بعتذر عن وجودي أصلاً في الحياة.
15- حكاية ناس
2015 كانت أكتر سنة ناس دخلت حياتي وناس خرجت منها للأبد. ناس علاقتي بيهم سطحية ووجودهم بقى أصدق ومجموعة اختفت في كواليس غير معلومة. الناس بتاخد من روحي أو بتضيفلها والعبرة بالنهايات.
توتة توتة خلصت الحدوتة.
