بقلم/ شروق عبد النعيم
1- إنت حاليًا مسؤول عن نفسك من الألف للياء.. محدش هيراقب تصرفاتك وطريقة حياتك أو يخنق عليك زي ما كنت بتقول على أهلك.. فإن مكنتش قد المسؤولية وقد الثقة.. بلاش أحسن.
2- متخافش.. أهلك هيوحشوك، هتحس أوقات كتير إنك غريب، مفيش أصحاب زمان ولا الشوارع اللي إنت متعود عليها.. بس متخافش.. عيش التجربة بكل ما فيها من حلو ووحش، جمد قلبك ودوس.
3- مهم جدًا تتعلم إزاي تتعامل مع الفلوس.. اعمل لنفسك ميزانية، فكّر قبل ما تجيب أي حاجة.. خلي دايمًا فلوس على جنب متقربلهاش، لأنك متعرفش إيه ممكن يحصل.
4- بلاش ثقة مبالغ فيها في أي حد.. إنت داخل مجتمع جديد عليك متعرفش حد فيه والناس مش ملايكة.. وأيوة مش شياطين بس الحرص مطلوب.. جدًا.
5- حاول متكونش انطوائي وخايف بزيادة من التعامل مع الدنيا الجديدة.. أيوة كل شيء في أوله صعب ويمكن رخم، بس إنت تقدر بمجهودك وشطارتك تطلع أحسن ما في الدنيا دي.
6- اعمل كل حاجة نفسك فيها.. اخرج وروح أماكن جديدة وجرب كل حاجة (طول ما هي مش غلط) متفضلش طول الوقت حابس نفسك في أوضة أو مع الكتب.. الانبساط مهم وهيساعدك.
7- ابدأ اتعلم حاجات جديدة.. اطبخ لنفسك، اتعلم إزاي تغسل هدومك، تكوي، تنضف.. بلاش تعتمد دايمًا على حد يعملك كل ده، عيش التجربة من أولها لآخرها، لأنك ببساطة لو متعلمتش ده دلوقتي لازم برضو هيجي وقت وتتعلمه.
8- نظّم وقتك، بين نوم ومذاكرة وجامعة وخروج، متخليش الدنيا سايحة على بعضها عشان متجيش تحتاس في الآخر.
9- اعرف ناس جديدة على قد ما تقدر.. المعارف مش بتخسّر أبدًا طول ما هي في إطار محدود.
10- حاول تدخل في أنشطة الجامعة، هتفرق جدًا في شخصيتك ومعارفك وطريقة تعاملك مع الكون حواليك.
11- بلاش طول الوقت تشتكي.. إنت مش أول ولا آخر واحد عاش في مكان بعيد عن أهله، وفي الواقع ده أصلاً شيء طبيعي ومفروض.
12- اعرف قيمة أهلك جدًا.. عرفتها؟ عاملهم بقى على أساس قيمتهم اللي عرفتها لما بعدت عنهم.
13- متخليش الدنيا تبعدك عن أصحاب زمان.. اليوم فيه 24 ساعة وعندك 7 أيام في الأسبوع.. مش الخمس دقايق اللي هتسأل عليهم فيها هتخسرك الدنيا وما فيها.
14- سيب انطباع حلو وإيجابي عند الناس اللي حواليك.. متخليش حد لما يجيب سيرتك يقول “ده جايلنا من أنهي مُصيبة؟!”.
15- اطلع شخص مُختلف من التجربة.. هتعدي عليك أوقات ضلمة وكآبة كتير بس اتعلم إزاي تفرح.. إزاي تكافئ نفسك.. اعرف نفسك أكتر وكوّن شخصيتك اللي حاول تخليها مميزة على قد ما تقدر.. العالم فيه نُسَخ مكررة بما يكفي.
