بقلم/ ياسمين ناجي
ربنا سبحانه وتعالى رزقكم بولادكم وهما أغلى كنز في الدنيا، فاشكروه على أحلى وأجمل نعمة في حياتكم، أعطوهم حب وحنية وحضن دافئ من أول يوم عينيكم تشوفهم، لأن ده أول حاجة هيحسوا بيها، من أول لحظة خروجهم للدنيا، عشان كده أول ما الأم بتولد ويجيبولها ابنها أو بنتها بتاخدهم في حضنها، هي بتعمل كده بطبيعتها لفرحتها إن ربنا قر عينيها بنعمة غالية، بس لو تلاحظوا إنهم لو كانوا بيعيطوا بيهدوا أول لما تاخدهم في حضنها.
علموهم أول وأهم حاجة في حياتهم لما يكبروا شوية، وهي الصلاة، دي اللي هتخليكم متطمنين عليهم في كل حياتهم، علموهم الصلاة بحب مش بعنف وإجبار، ده بس لو قولتولهم مثال “هو إنتو مش لما بتحتاجوا مننا أي حاجة بتنادوا علينا وبتطلبوها مننا ولو عايزين تتكلموا معانا بتيجوا تتكلموا، طيب برضو الصلاة دي ربنا بينده عليكم وعايزكم تطلبوا منه أي حاجة عشان يحققهالكم وعايز يسمع صوتكم وإنتو بتكلموه”، حببوهم في الصلاة، دي أول حاجة هنتحاسب عليها يوم الحساب.
حافظوا عليهم بإنكم تبعدوهم عن مشاكلكم ومشاكل عائلتكم، بلاش تخلوهم يشوفوا الواقع وهما لسة صغيرين، هما والله هيشوفوه بس يكونوا كبروا وفهموا الدنيا وعرفوا إزاي يتصرفوا مع المشاكل، بلاش تشيلوهم همكم وهم الدنيا وهما لسة زهور صغيرة فاتحين دراعاتهم للحياة وملياهم ضحكتهم البريئة اللي لسة بخيرها.
علموهم صح ومتقولوش إحنا دخلناهم مدارس أجنبي ومش عارف إيه والمدرسة هتعلمهم. معادش فيه مدارس بتعلم خلاص، الزمن ده خلص من زمان، دوركم في البيت الأول والأكبر والأهم، خلوهم يتعلموا ويجربوا كل حاجة ولو غلطوا أكيد هيتعلموا من غلطهم. بلاش كلمة غلط وعيب على كل حاجة، عمرهم ما هيتعلموا، سيبوهم يعبروا عن نفسهم بكل حرية، عايزين تعلموهم حاجة خلوها بطريقة غير مباشرة تجذبهم ويحبوا يجربوها.
خلوا حياتهم سهلة وبسيطة بلاش تصعبوها عليهم، هما كده كده هيشوفوا كل حاجة بعينيهم، حببوهم في الدنيا عشان يقدروا يكملوا فيها، خلوكم في دهرهم بس من غير ما يحسوا، عشان يقدروا يبنوا شخصيتهم.
خلوهم يستثمروا وقتهم وطاقتهم صح، بلاش كل حاجة مذاكرة وبس، الحياة مش كلها مذاكرة اللي في الكتب، خلوهم يجربوا الأنشطة اللي بيحبوها، والأنشطة كتير والله حوالينا، إحنا اللي اتعودنا على طريقة بتتورث من جيل لجيل، ده حاجة بسيطة، بس لو حكيتولهم حدوتة قبل النوم من وهما صغيرين ويتعودوا يناموا عليها ويصحوا الصبح يسألوا عن باقي الحدوتة، دي هتحببهم في حاجة اسمها القراءة، وغيره وغيره من الهوايات اللي عند كل واحد مننا، ربنا قسمها علينا ورزقنا بيها.
متخلوهمش يبقوا عارفين الدنيا من التليفزيون والفيس والإنستجرام وتويتر وغيره وغيره من وسائل الاتصال اللي عملت فراغ كبير في حياتهم من وهما صغيرين، كفاية إنهم منعزلين عن العالم اللي حواليهم. على فكرة وسائل التواصل دي كلها عمرها ما هتخليهم منفتحين، بالعكس ده هتضرهم أكتر ما هتنفعهم، مش بقول إنكم تخلوهم متخلفين ميعرفوش الحاجات دي كلها.. بالعكس عرفوهم كل ده وإزاي يستخدموها صح، بس برضو مش تخلوها كل حياتهم، مفيش مانع يبقى عندهم أحدث موبايل وعليه كل البرامج ومواقع التواصل وبيستخدموها، بس برضو يكونوا عارفين إن كل حاجة ليها وقتها.
حببوهم في تكوين علاقات مع الناس إللي حواليهم بداية من المدرسة، خلوهم يصاحبوا ويختاروا صحابهم بنفسهم، مش إنتو اللي تقولولهم ده حلو وده وحش. هما برضو عندهم عقل وبيفكروا وهيعرفوا يقرروا مين هيكونوا صحابهم ومين لأ. خلوهم يتعاملوا مع الكل واطمنوا إن تربيتكم ليهم هتخليهم يختاروا صحابهم.
خلوهم يخرجوا للدنيا وميخافوش منها، فيها إيه يعني لو فيه رحلة في المدرسة؟ وماله لما يروحوا مع زمايلهم؟ ما هيكون أكيد فيه إشراف عليهم، وبعدين بلاش تخافوا عليهم قوي كده هما مش هيفضلوا جنبكم طول العمر، في الرحلة البسيطة دي هيجربوا ويشوفوا ويتعاملوا مع الناس، وهيكونوا على حريتهم. الطفل بطبيعته لما يكون لوحده بيتصرف بحرية من غير ما يحس إن أمه وأبوه بيراقبوه، بيخرَّج كل اللي جواه وبتظهر شخصيته لنفسه وللناس اللي حواليه، وبيعرف نفسه أكتر واللي حواليه بيعرفوه، وبيعرف إزاي يتصرف لو حصل حاجة وهو لوحده، ولو احتاج لنصايحكم أكيد هيرجعلكم، لأنه هيكون بإرادته مش بالإجبار والسيطرة.
معادش فيه مدارس بتعلم.. الزمن ده خلص من زمان
