بقلم/ ريهام فوزي
بتخيل نفسي لو كنت راجل إيه اللي كنت هعمله!
مبدئيًا السمعة والسيرة الطيبة هي اللي باقية طول الحياة، ومجتمعنا الذكوري عمره ما بيعيب تصرفات الراجل لو غلط أو عمل حاجة ميصحش إنها تتعمل، الكل يقول ده راجل يعمل اللي عاوزه. طيب يا جماعة ما الإنسان عمومًا سيرة، ليه دايمًا الراجل شايفينه صح في أي حاجة يعملها؟!
لو كنت راجل كانت سيرتي بين الناس هتكون دايمًا بالخير، مكنتش هغلط وأقول أنا راجل عادي.
لو كنت راجل كنت هسافر مع أصحابي.
كنت هلبس براحتي محدش كان هيضايقني مهما كنت لابسة.
لو كنت راجل كنت هحب بجد وأخلِص للي هحبها وأراعي ربنا فيها.
لو كنت راجل كانت معاملتي للبنت هتكون بكل احترام، مكنتش هستغل إنها ضعيفة بطبعها.. أيوة.. كل البنات ضعيفة، لكن في وقت اللزوم لازم تقوى، وتخبي قوتها لأننا عايشين في مجتمع ذكوري.
لو كنت راجل كنت هركب عجل وأمشي في الشارع من غير مضايقة من حد.
لو كنت راجل كنت هخرج مع أصحابي في آخر الليل ونقعد على القهوة ونلعب بلاي ستيشن. كنت هرجع متأخر البيت ومحدش كان هيقولي اتأخرت ليه.
لو كنت راجل كنت هبقى ناجح في شغلي وأثبِت مكانتي في أي مكان.
لو كنت راجل كنت هنزل المسجد أصلي كل فرض.
لو كنت راجل كنت هسافر أعيش برة مصر، ودي حقيقي أمنيتي المستحيلة، لأني بنت في مجتمع شرقي.
لو كنت راجل كنت هعامل إخواتي البنات إني صاحبهم قبل ما أكون أخوهم.. كنت هخليهم يحكولي أسرارهم ومشاكلهم، مكنتش هعيشلهم دور سي السيد.
لو كنت راجل كنت هعامل زوجتي إني أبوها وأخوها وسندها، مكنتش هبقى راجل يفرض رأيه وياخد قرارات لوحده من غير ما يسمع لشريكة حياته.
أخيرًا أنا بدور على راجل يكون ليَّ صاحب وأب وأخ قبل ما يكون زوجي. دوّروا على شخص يكون قريب من ربنا ويقربك لربنا أكتر، الشخص اللي بيراعي ربنا في حياته ده أكتر شخص تكوني مَسلِّمة نفسك له وتكوني مطمنة على ولادك وتربيتهم اللي هتكون على إيده.
البنات حلمها بسيط في شريك حياتها، حلمها راجل يراعي ربنا.. راجل خلوق.. راجل تربيته وأخلاقه عنوان له.. متقبليش بأي شخص والسلام، متقبليش بشخص بعيد عن ربنا وتقولي بكرة هيقرب من ربنا. استني الراجل المتدين والخلوق حتى لو هتستني كتير بس تأكدي إن ربنا كاتبلك نصيبك.. {الطَّيِّبُونَ لِلطيِّبَاتِ}.
زوجتي وأختي وكل البنات
