بقلم/ ريمون سامح
إزيك؟ عاملة إيه؟ إيه الأخبار؟
آخر مرة اتكلمنا كان امبارح، بس حاسس إن فيه وقت طويل قوي عدا.
امبارح وقفنا عند سؤالك عن أشعاري وعلاقاتي اللي قبلك.
أشعاري حكايتها سهلة، تقدري تقولي بكتب بقالي سنين أشعار على أمل يوم اللقا.
أما عن علاقاتي اللي قبلك فكلهم اتنين، بس عارفة؟ أنا عندي صندوق ذكريات بشيل فيه كل حاجة ممكن تكون ذكرى تفكرني بحكاية عشتها.
في صندوق ذكرياتي ليكي علبة جواها سلسلة وخاتم، هدايا ليكي.
اللي دخّلني علاقات قبلك هو إني اتخبطت واتلخبطت كذا مرة بين الاحتياج والحب. الارتباط على أساس الاحتياج وحش قوي، عشان كده الهدايا دي مطلعتش لغاية النهارده لحد.
عارف بتفكري في إيه؟ الحاجات دي لسه مطلعتش ليكي إنتي حتى.
أنا عارف.. أنا عندي مشكلة ثقة.. معلش، بس أنا مطمنلك، همّ حتى مسمعوش عن الهدايا دي، بس إنتي سمعتي وأكيد هتاخديها في يوم.
المهم..
أنا جاي النهارده أقولك كلام جوايا.. كلام مهم أنا محتاج أقوله دلوقتي.
بصي يا ستي ببساطة:
العمر قصير.. قصير قوي.. حرام يكون بيضيع مع إحساس بالملل، عدم التفهم، عدم الرضا والكتم.
أنا مش بتكلم عنك متخافيش، سيبيني أكمل فكرتي.
حرام نضيع وقت إحنا فيه مش مبسوطين مع بعض.
وإحنا مش بنكبّر بعض.. وإحنا مش بنتجنن مع بعض.
وإحنا خايفين نقرّب من بعض ونكون واحد بجد.
وإحنا عايشين مع بعض بالخوف مش بالحب.. خايفين نخسر بعض.. خايفين نبان على حقيقتنا قدام بعض.. خايفين نستنى مع بعض.. عايشين بس مش عايشين.
وعايشين بس مش سامعين بعض، ولا شايفين بعض، حتى وإحنا مع بعض.
لذلك.. إحم إحم.. لذلك أنا عايز أقولك:
كويس إننا لسه متقابلناش.. كويس إنك لسه لوحدك وأنا كمان، وخلي الكلام ده كله في بالك.
أنا مش عايز حبيبتي تكون عايشة بتقل بسببي أو العكس.
الارتباط مش كل حاجة، الجواز مش الحياة.
فيه جوازات جواها حياة، وفيه جوازات كانت نهاية.
وأنا عايزك بداية. حبي نفسك.. حبي الناس.. حبي الحياة.. انبسطي.. خلي لوجودك معنى.
اتقابلنا بقى ولا متقابلناش.. إنتي إنسان كامل وأنا زيك. تعالي نكون فرق ونستمتع بعمرنا.
والهدايا اللي معايا، متشيليش همّها، يمكن تاخديها مني في يوم، ولو محصلش عادي، تقدري تشتريها لنفسك، أو تجيلك من صديق.
إنتي أغلى بكتير من إنك تبيعي نفسك عشان سلسلة وخاتم.
