بقلم/ دينا جمال بدر
الشتا قرب أوي أخيرًا، وألوانه واحتياجاته واحتياجاتك إنتي اللي لازم تكونى مجهزاها من دلوقتي.
كتير بالصدفة بتلاقي إن فيه حد في شغلك أو البيت أو خروجاتك أو زيارات.. عامةً أي مكان بتبقي فيه، يقولك “إنتي حلوة النهارده”، ده بيحصل لما بيبقى جوة مبسوط زي ما بيبقى برة جميل، وده بيحصل لأننا بنكون اخترنا هدوم مش منسجمة مع شكلنا ومظهرنا، بس لأ، فيه حاجات بتضفي علينا نور وجمال بنحسه في عيون اللي قدامنا. زي مثلاً ألوان الماكياج.. بنختارها على أساس إيه؟ بنختارها على أساس إنها مناسبة للون بشرتنا الطبيعية، وده لأن الاختيار الغلط ممكن ملاحظته من خلال طلتنا اللي هتبقى مش برّاقة في عيون الآخرين.
مكياج العيون -لأنه الأبرز- يا ريت يبقى قريب من لون الملابس، وبما إن الشتا بيحب الألوان الداكنة، فألوان الماكياج الترابية هتبقى مناسبة ليكي جدًا جدًا.
الألوان الترابية تندرج في البني.. الأسود.. الرمادي وما أشبه، يعني الفضي والدهبي بلمسات مختلفة معانا، بيتم استخدامهم بنسب معينة في كون الميكاب خفيف عشان يناسب جو العمل، أو تقيل وواضح عشان يناسب السهرات والخروجات.
* بألوان مناسبة لبشرتك وبطريقة بسيطة في حط الماكياج هتبقي زي المحترفين وهتبقى طلّتك زي النجمات. لو في شغلك، الصبح مش محتاج الميكاب الأوفر، يعني بيكفي ألوان مقاربة للون بشرتك عشان يديها نضارة وألوان خفيفة من الشادو الترابي اللي اخترتيه مسبقًا مناسب للون بشرتك وهدومك، وآي لاينر أو كحل (مع إن الآي لاينر العريض برسماته اللي أصلها من الستينات موضة، إلا إنه أرجوكي بلاش بالنهار) يفضل يكون رفيع على حافة رموشك؛ العريض له وقته. وماسكارا لإبراز الرموش، وأحمر خدود مناسب لبشرتك، وغالبًا ما يكون منحصر في لونين، الوردى والنحاسى، اختاري حسب ما ترتديه، وأحمر شفاه مقارب للون الشفايف عشان يدّي طلة طبيعية، أو ممكن نكتفي بملمّع الشفايف.
في مكياج العيون، ينصح الخبراء بالألوان الترابية، وده لأنها مناسبة لكل الأوقات صبح وليل، حيث إنها في النهار بتدي مظهر مهني جَدّي، أما بالليل في الخروجات والزيارات فالألوان الترابية لو محايدة بتخلى الأنثى واثقة من نفسها، وده شيء جميل ومحبب للنفس جدًا.
كتير من الفنانات اشتهروا بطلتهم الجميلة من خلال استعمالهم شِبه الدائم للألوان الترابية، زي إليسا مثلاً، وده لأنها حست إنه أضافلها جمال ونضارة هي حستهم، كذلك طلاء هيفاء وهبي المختلفة وكتير من نجمات برة، بيونسيه وسيلين ديون وغيرهم، وبيبقى هو الميكاب المسيطر غالبًا في الحفلات العالمية الكبيرة زي مهرجان “كان” وغيره.
عامةً جرّبي الألوان الترابية من غير إسهاب، وده عشان تحسّي بسحرها، وقوليلنا من بعدها هتحسى بإيه.
