بقلم/ مريم ظريف عيد
يوليوس قيصر يمثلني.
يوليوس قيصر هو قائد سياسي ديكتاتور، لكنه كمان صاحب أشهر قصة خيانة في التاريخ، واللي وصفها شكسبير إنها أقبح عملية اغتيال تمت، لدرجة وصل فيها استخدام عبارة “حتى أنت يا بروتوس!” لضرب مثل في غدر الأصدقاء، وهي نفسها العبارة اللي استخدمها القيصر وقت اغتياله.
اغتيال يوليوس قيصر
في الفترة الأخيرة لحياة يوليوس قيصر، مع زيادة العداء له ورجوعه لروما وتنصيب نفسه ديكتاتور مطلق، اجتمع مجلس الشيوخ واتفقوا على اغتياله. وكانت الخطة إن كل شخص يطعن القيصر بخنجره مرة عشان التهمة تكون بالتساوي على الكل، وفعلاً وقت اجتماع مجلس الشيوخ بدأ كاسيوس (وهو أشد الناس كرهًا للقيصر) بالطعنة الأولى ومن بعدها توالت الطعنات، وعند كل طعنة كان وجه القيصر جامد وخالي من المشاعر بيعبر عن ألم طفيف.
لحد ما وصل لآخر طعنة، واللي كانت من أقرب الناس لقلب القيصر، صديقه “بروتوس”، وهنا اتغيرت ملامحه، وقتها حس القيصر بالطعنات القاتلة الموجعة اللي أخدها، وقال لصديقه “حتى أنت يا بروتوس؟! إذًا فليمت قيصر!”، وبعدها مات القيصر وقلبه مليان بألم الغدر، مات من الخذل قبل ما يموت من الطعن.
مين فينا القيصر مبيمثلهوش؟!
أكيد كل شخص فينا قابل بروتوس. وارد تكون مريت بوقت شدة واحتجت مساعدة من شخص قريب وهو انشغل عنك، تكون حاطه في أولوياتك وهو مش شايفك ولا حاسس بوجودك، وارد تكون احتجت تسمع كلمة تشجيع ومقالهاش، كنت مستني من حد زعلك اعتذار ومقدمهوش، يكون وعدك ومنفذش.. خيبة الأمل بتحصلنا من مواقف صغيرة بنمر بيها ممكن تكون بالنسبة للشخص التاني مش واضحة، مشافهاش، بس هي في الحقيقة بتسيب جرح واضح فينا.
الأصعب في الوقت ده إنك بتكون بين نارين، محتار تعاتب ولا تبعد! أصلك هتعاتب مين؟! شخص اتخلى عنك! طيب ما هو لو بيحبك مكانش عمل كده.. وهكذا بتكون جوة دوامة كلها يأس، التعافي منها بيحتاج مجهود، لأنك لما بتفقد ثقتك في شخص صعب ترجع زي الأول.
طب والحل؟
رأي العلم:
– الاستشاريين النفسيين بيقولوا إن أول شخص بييجي في بالك لما تقع في مشكلة وارد يكون هو الشخص الخطأ، عشان كده بينصحوا إنك لازم تاخد وقتك في التفكير قبل ما تقرر تطلب مساعدة من حد. خلي أول حد تلجأله يكون ربنا، لأنه قادر إن يخرج من الجافي حلاوة.
– راقب نفسك وأفكارك، شوف أول حاجة جات في تفكيرك، وإيه مدى تأثرك بالأشخاص اللي حواليك، واعمل حدود لكل علاقة.
– متستناش تعاطف حد معاك، وخلّي دايمًا في تفكيرك إن مش كل الناس بروتوس، ولا إنت طول الوقت قيصر. وارد جدًا تكون في قصة شخص تاني إنت بروتوس.
– حاول تحافظ على هدوئك، لأن أكيد هتنور في عقلك فكرة تساعدك أو تقدر تستقر على شخص تطلب مساعدته، يمكن يكون هو أول شخص جه في بالك أو غيره.
– الأمل.. لأن لو مفيش أمل يبقى مفيش حياة.
في الخمسينات كان الدكتور كيرت ريتشار بيعمل تجارب نفسية على الفئران، ومن ضمن تجاربه إنه اختار إناء زجاجي كبير وملأ أكتر من نصه بالمياه عشان ميكونش فيه أي طريقة لهروب الفار، وبدأ إنه يدخل كل فار لوحده ويحسب المدة اللي بيقضيها في السباحة ومحاولة إنقاذ نفسه قبل ما يستسلم للغرق. كل فار كان له وقت مختلف عن التاني، لكن متوسط الوقت للكل كان 15 دقيقة، وبعدها يستسلم ويموت.
قرر إنه يعيد التجربة مع التغيير.. بدأ يدخل الفار جوة الإناء ويسيبه، وأول ما يلاحظ إنه هيبدأ يستسلم يخرجه وينشفه ويسيبه يرتاح، وبعدها يرجعه تاني للإناء. كرر ده مع كل الفئران، والمرة دي كان بيحسب متوسط الوقت واللي وصل فيها لـ60 ساعة!
الفئران في المرة الأولى فقدت أملها إنها تعيش، أو إن حد يساعدها لما شافت إن من مفيش مَخرج، استسلمت وماتت، لكن في المرة التانية كان عندها خبرة سابقة إن فيه إيد هتتمد بالمساعدة في الوقت المناسب، عشان كده فضلت تقاوم وعاشت فترة أطول.
ده حال الفئران، ما بالك بينا إحنا البشر اللي محتاجين الأمل عشان نعرف نعيش، اليأس بينسينا معنى الحياة.
إحنا نقدر نبذل جهد أكبر لو جوانا أمل يخلينا نوصل لأحلامنا. واتأكد ان ربنا هيبعت الإيد اللي هتتمد بالمساعدة في الوقت المناسب.. اعمل اللي عليك وخليه يكمل.
مين فينا القيصر مبيمثلهوش؟!
