أسماء نبيل عبد القادر
والله يا جدعان اللي بيزيد عن حده بينقلب ضده.. نقيس على كده بقى كل حاجة الحلو قبل الوحش كمان.. ليه بقى؟ عشان الوحش إحنا كده كده عارفين إنه وحش ومهما زاد فهو وحش في إيه أكتر من كده يعني؟
لكن الحلو بقى لما يبقى بزيادة بيبقى ماسخ.. عارفين إنتوا المشروب الدافي اللي بتحبوا تشربوه في الشتاء ده عشان تدفوا؟ تخيلوا بقى جيتوا تشربوه لقيتوه مسكر بزيادة عليه بتاع 5 أو 6 معالق سكر.. هتشربوه؟
بلاش دي.. طب عارفين أما تلاقوا قطعة جاتوه بالشيكولاتة متمرمغة في الشيكولاتة وجواها شيكولاتة، وهي أصلا معمولة بالشيكولاتة وعليها كمان صوابع كيت كات كده، وحطيت عليها من فوق صوص الشيكولاتة.. حاجة تحفة صح؟ تعالوا بقى دقوها لقيتوا إن الشيكولاتة اللي فيها تقيلة جدا ومحلية بزياااااادة.. هتاكلوها؟!
هتقولوا لا مش هناكلها.. بس أنا بقولكوا لا هتاكلوها بس مش هتقدروا عليها كلها.. هتاكلوا منها أول حتة هتحسوا بسكرها الزيادة بس الموضوع عجباكوا ودي شيكولاتة بقى وهو حد لاقي وكلام من ده.. وتكملوا هتاكلوا التانية في التالتة هتيجوا عند الرابعة وتقولوا STOP لا بقى ما هو كده أوفر أنا بحب الشيكولاتة آه بس مش كده.. نفسكوا هتجزع منها هتبقوا حاسين بقرف كده ومش قادرين تاكلوها خلاص قفلت معاكوا.
ليه بقى هيحصل كده؟ عشان اللي يزيد عن حده ينقلب ضده وخصوصا الحلو.
طب الكلام ده كله بقوله ليه أصلا أكيد مش عايزة أجري ريقكوا على الشيكولاتة.. لكن عايزة أقول حاجة صغيرة جدا لما تحبوا حد قوي متزيدوش عن الحد المسموح بيه متخلوش الموضوع يتقلب عليكوا.. لما تعملوا حاجات حلوة لحد متخليهاش تزيد عن حدها.. حتى كلامكوا الحلو لبعض متخليهوش بزيادة عشان هيفقد حلاوته ويخلي روحكوا تجزع.
لو كل حاجة في حياتنا حلوة مبقتش مظبوطة وبقت زيادة عن حدها هنتعب، إذا كنت أنت اللي بتدي أو بتاخد في الحالتين هتتعب، وممكن تخسر نفسك وتخسر كتير.
أهو بردو عشان لو خسرت الحاجة دي متخسرش كتير..
فكل حاجة بتبقى حلوة قوي لما بتبقى في حدود المعقول.. خلونا نحب بعض بالمعقول نكون جدعان بالمعقول.. نفاجئ بعض ونفرح بعض بالمعقول.. خلوا كل حاجة في حياتكوا حلوة بالمعقول عشان نفسكوا متجزعش.
Great line up. We will be linking to this great article on our site. Keep up the good writing.