اتختنت بس نجحت

بقلم/ مروة هادي

أنا مي مصرية مغتربة في كندا، واحدة من اللي تعرضوا للعنف ده، واللي تسببلي بأكبر أزمة في حياتي.

هحكيلكم حكايتي من الأول وإزاي كانت معاناتي. أنا كنت من عيلة تعتبر بسيطة، وعندهم ختان البنات عاده لا بد منها ولازم تتعمل لكل البنات، ورغم اعتراض أمي على الموضوع ده لكن أبويا أصر على عمل ده فيَّ، رغم إني كنت بنته الوحيدة على 7 ولاد رجالة.

تأثير ختان البنت النفسي والجسدي

اتختنت وأنا عندي عشر سنين. اليوم اللي نجحت في مدرستي بتفوق وأهلي كانوا بينادولي يا دكتورة. وباليوم ده كنت حاسة إني قربت من حلمي خطوة، وعلى استعداد للخطوة اللي جاية..

بس اتصدمت من اللي حصل، وإن المفاجأة اللي حضروها ليَّ كانت إنهم يقتلوني ويقتلوا حاجة حلوة ومهمة فيَّ..

لقيت ست شكلها غريب ومخيف وباصالي بشكل مرعب، قالت لأمي هي دي اللي عايزيها تبقى عروسة؟ أمي والدمعه في عينها بترد آه، وبكل وجع قلب كانت بتخرج الإجابة منها، وكنت حاسة بضربات قلبها لحد عندي.

خدتني أمي وغيرتلي هدومي وجابتني للصالة، وكانت عمتي والست دي وأبويا موجودين، قالولي متخافيش إحنا هنريحك من كل حاجة بتوجعك، قلتلهم مفيش حاجة وجعاني، قالوا إنتي لسة مش عارفة.

ولقيتهم التفوا حوالي وبدؤوا يمسكوني ويبعدوا أمي عني، والست الغريبة بتطلع حاجة من شنطتها، واتصدمت لما شوفتها طلعت حاجه شبه السكينة أو الشفرة بتاعة الحلاقة.

تعرفي على: الختان والوصم الجنسي للمرأة

توقعت هتقص شعري، غمضت عينيا وخبيت راسي بحضن أبويا ومحسيتش غير وفي حد رفع هدومي ونار نزلت عليَّ ودبحتني.

كان قلبي هيقف من كتر الوجع، ولما فتحت عيني وشفت الدم اتصدمت ووقعت، محسيتش غير وأنا في المستشفى وكلهم حوالي وأمي بتعيط، وأبويا لما شافني فتحت عيوني قالي مبروك إنتي دلوقتي في أحسن حال وزي القمر

بس أنا كنت حاسة بوجع مش مركزة مصدره منين، وبعد وقت كده عرفت الوجع منين، وسألت أمي هو إيه اللي حصل؟ لقيتها بتقولي اللي بيحصل في عيلة أبوكي حصلك.

طبعًا مفهمتش، ومش قادرة أحكي عن الوجع اللي كنت بحس بيه لشهور، وإزاي نفسيتي اتدهورت وكنت بعدي المذاكرة بكل تعب وإرهاق بس عشان أحقق حلمي وأفهم اللي أنا فيه.

تعرفي على: يوم ختان بنتي: ما معنى الختان للبنات؟ وهل الختان يسبب البرود

لحد ما في يوم كنت في ثانوية عامة، واتكلموا مجموعة بنات عن الموضوع، عرفت وفهمت إن اللي حصلي كان ختان.

بدأت أقرأ عن الموضوع وإزاي يتعالج، ولقيت مفيش أي علاج له في مصر، فأجلت الموضوع لحد ما أخلص دراستي وأشتغل.

وفعلاً حصل ده، وكملت دراستي وبقيت دكتورة قد الدنيا زي ما بيقولوا، وكنت بدور على طريقة أعالج نفسي بيها، ولكن للأسف مفيش، وخصوصًا إني تعرضت للختان الفرعوني مش أي ختان تاني.

وقتها كان اتقدملي عريس، وحسب مواصفات أهلي كان ممتاز جدًا، وممنوع الرفض، ما هو مش عشان بقيت دكتورة يبقى أتحكم برأيي، وطبعًا حصل الزواج، ولكنه اتصدم ليلة الدخلة من اللي عرفه وشافه، وقرف من أول يوم مني، وبقى يناديلي “يا ناقصة”، وده دمرني جدًا، بس مقتلش عزيمتي.

تعرفي على: زوجتي مختونة ماذا أفعل؟ الختان والزواج والبرود الجنسي

بعد معاناة لمدة سنة قررت أتطلق وأقدم على هجرة لكندا، وشرحت وضعي كله بالتفصيل مع الأدلة، وده ساعدني جدًا، واتقبلت خلال 3 شهور وهاجرت.

والحمد لله لقيت علاج لحالتي اللي تعتبر حاله تجميلية عندهم بالطب، وطورت نفسي وبقى ده مجال شغلي بعد كده، واللي خلاني أرجع مصر عشان أساعد البنات اللي زي حالتي وأخليهم يقدروا يعيشوا حياة أفضل بسهولة.

لقيت علاج لحالتي