رضوي
هل البنت السينجل حرة ومعندهاش مسؤوليات ولا هموم؟ بتعمل كل اللي هي عايزاه وعايشة حياتها بالطول والعرض ومبسوطة، ولا هي ملهوفة ع الجواز وحاطة إيدها على خدها وقاعدة مستنية ابن الحلال اللي ييجي ياخدها عشان تحس إنها زي باقي الناس وإنها تستاهل تعيش؟ هي نص عاجز ملوش قيمة غير لما يلاقي نصه التاني، ولا هي بني آدم كامل مستقل مش محتاج لحد ويقدر يعيش لوحده؟
الحقيقة هي لا كده ولا كده.. الـ2 أوفر.
البنت السينجل واحدة عايشة في وضع مختلف عن اللي الناس شايفينه الصح، ممكن يكون ده اختيارها، وممكن تكون الظروف فرضت ده عليها. ممكن تكون بتقدر ساعات تستغل ظروفها وتعيش لنفسها شوية وتنبسط، وساعات تانية تكون مش قادرة تفتح عينيها الصبح وتواجه العالم. بس الأكيد إن جواها الفطرة اللي ربنا خالقنا كلنا بيها، إنها محتاجة وليف، مهما الناس كانوا شايفينها بتخرج وتسافر وتعمل أنشطة مختلفة وتتصور ومنطلقة ومش فارق معاها، هي من جواها محتاجاه. هي بس ممكن تكون بتحاول تنبسط بالمتاح ومتشيلش هم اللي مش متاح.
أفورة الناس في الطريقة اللي شايفين بيها البنت السينجل، بتلخبطها وبتخليها ساعات تعيش حاجات مش حاساها، عشان هي مش شايفة غير قالبين بس الناس عايزينها تلبس واحد منهم، مبالغ فيهم وعكس بعض جدًا. أحكامهم ونصايحهم وتعليقاتهم بيضغطوها وممكن يخلوها هي كمان تبقى أوفر، ممكن تختار تلعب دور المستقلة اللي عارفة تعيش وتنبسط وتصدق إنها مش محتاجة شريك لحياتها، وتبتدي تهرب بشكل غير واعي من أي احتمال جواز، عشان مياخدش منها حريتها وانطلاقها اللي الناس بيحسدوها عليهم. وممكن تختار تلعب دور اللي عندها “ديدلاين” لو ملحقتش تنط في القطر قبله، هتموت لوحدها ومحدش هيعرف غير لما ريحتها تطلع، فتبتدي تدور على أي راجل تتجوزه والسلام.
في الحالتين ممكن توصل إنها تتصرف تصرفات مش شبهها، أو تكتئب وتعيش كأنها مش عايشة، وفي الحالتين هتلاقي ناس ييأيدوها قوي أو يعارضوها قوي.
الجمل دي بتضايق البنت السينجل جدًا مهما كانت بتسمعها وتضحك أو تبين عكس كده:
1- هنفرح بيكي إمتى؟
2- مفيش حاجة جاية في السكة؟
3- يلا بقى شدي حيلك خلينا نفرح.
4- إنتي لسة قاعدة لحد دلوقتي كده؟ هي الرجالة اتعمت ولا إيه؟
5- إن شاء الله ربنا يبعتلك ابن الحلال اللي يقدرك ويعرف قيمتك.
6- ما تتعلمي بقى تعملي زي البنات وتجيبي عريس!
7- عقبالك! متخافيش ربنا هيفرحك إن شاء الله ويراضيكي.
8- بكرة لما مش هتلاقي حد بيتقدملك هتقولي يا ريتني كنت قبلت بفلان.
9- متتبطريش.. متتشرطيش، إنتي بتكبري مش بتصغري، الحقي بقى.
10- انجزي عشان تلحقي تجيبيلك عيل يونسك.
11- دي ممكن تكون آخر فرصة ليكي، ولو جالك عريس بعد كده هيبقى ظروفه أوحش من اللي قبله.
12- متنسيش نفسك، أهلك مش هيفضلوا عايشينلك وأصحابك هينشغلوا بحياتهم.
13- لأ اتنازلي شوية ما إنتي مش هتاخدي واحد متفصل على مزاجك.
14- إنتي عمالة تكبري في شغلك وكده مش هترضي بأي حد.
15- اتكسري شوية عشان الرجالة مبتحبش الست القوية.
16- إنتي أصلاً مش هتفهمي اللي بنقوله عشان متجوزتيش ومعشتيش التجربة.
17- يا بختك.. معندكيش لا هم ولا مسؤولية وعايشة حياتك وبتاعة نفسك.
18- والله إنتي في نعمة.. احمدي ربنا واوعي تتجوزي.
البنت السينجل لا محتاجة إن حد يحسسها بالشفقة، ولا إنه يحسدها ع النعمة اللي هي فيها. رأي وخبرات الناس ممكن يناسبوا بعض الناس، مش شرط يناسبوكي إنتي، اعملي اللي يناسبك ويريحك، حاولي تستمتعي بالمتاح والموجود وتعيشيها بأحسن ما عندك. واعرفي إن مفيش حاجة بتفضل فوق على طول ولا تحت على طول.
