عمرك فكرتي إنك نفسك تكوني راجل؟ أو حسيتي إنك مربوطة من رجلك وشايفة الرجالة طايرين بحُرية حواليكي؟ كان نفسك تاخدي جزء من الحريات والحقوق والصلاحيات اللي هما واخدينها؟ ممكن يكون ربنا وفقك وقدرتي تاخدي جزء من ده، بس برضو فيه حاجات كتير كان ممكن تختلف في حياتك لو كنتي راجل، زي مثلاً.
1- إنك مش هتتشتمي وإنتي سايقة من غير سبب
مين فينا متشتمتش أو سمعت كلام يضايقها وهي سايقة بس عشان ست؟! حتى لو مغلطتش! لمجرد إنك واحدة سايقة، فلازم تسمعي كلام سخيف. لو كنتي راجل كنتي هتتشتمي بس لو غلطتي.
2- الناس مش هيقيسوا أخلاقك ودينك بلبسك
لو كنتي راجل الناس مكانتش هتحكم عليكي وتقيس تدينك وأخلاقك من طريقة لبسك، كانوا هيبقوا مضطرين يعرفوكي كويس قبل ما يحددوا الخانة اللي هيصنفوكي فيها، عشان اللبس مكانش هيحدد ده.
3- محدش كان هيعد عليكي العلاقات
لو حسيتي إنك محتاجة تنهي علاقة، مكنتيش هتفكري 100 مرة في الناس هيقولوا إيه عشان دخلتي في علاقة وفشلت، أو عشان دي مش أول علاقة ليكي.
4- كان ممكن تنزلي الشارع بالبيجامة والشبشب
مكانش هيفرق معاكي بصات الناس وأحكامهم عليكي، لأن أصلاً مكانش هيلفت نظرهم إنتي لابسة إيه، ضيق، واسع، لبس بيت ولا متشيكة، محدش هيركز! وأكيد مكانش هيتبصلك بصة توجعك ولا حد كان هيفكر يلمسك.
5- كنتي هتقدري تاخدي الخطوة الأولى لما يعجبك حد
مكنتيش هتفضلي قاعدة مستنية تشوفي هو هيضيفك على الفيسبوك ولا هيكلمك ولا لأ، كنتي هتقدري تبتدي إنتي وتقربي من غير كسوف.
6- كنتي هتخرجي وترجعي وتسافري براحتك
مكنتيش هتبقي خايفة وإنتي ماشية في الشارع، مكانش هيفرق معاكي لا الوقت ولا المكان اللي إنتي فيه، وأكيد محدش كان هيسمَّعك كلمتين لو اتأخرتي شوية ولا لو فكرتي تروحي مكان بعيد.
7- محدش كان هيلومك لو البيت مكركب أو مش نضيف
لو إنتي بنت وأوضتك مكركبة شوية وحد شافها، هتبقى كارثة كونية. إنتي إزاي بنت وعايشة في المنظر ده؟! لكن لو راجل.. عادي ده راجل، هما بس هيلوموا الست اللي عايشة معاه.
8- كان ممكن تتجوزي 4
حتى لو مش هتتجوزيهم يعني، كفاية إنك هتكوني حاسة إن ده حق مشروع ليكي، لو حصل غصب عنك لا قدر الله وحسيتي بالملل أو فكرتي في حد غير شريك حياتك، مش هتحسي إنك عايزة تقتلي نفسك من إحساسك بالذنب.
9- مكانش هيبقى في حياتك “مود البريود”
اضطرابات كل شهر والنرفزة والخنقة والعياط على كل كبيرة وصغيرة، الآلام الجسدية والنفسية والميكروفون اللي بيضخم مشاعرك 500 ضعف مكانش هيبقى موجود. ولا خناقات كل شهر الغير مبررة مع جوزك، مديرك، أهلك أو أصحابك.
10- مكنتيش هتاخدي معاكي شنطة وإنتي نازلة
محفظتك وموبايلك في جيبك، مفاتيحك في إيدك، وشكرًا! مكنتيش هتاخدي شنطة الحاوي اللي ممكن تطلعي منها أي حاجة تخطر على بالك دي. وكنتي هتمشي حرة من غير ما تبقي مقلقة إن شنطتك تتشد منك.
11- كنتي هتدخلي الحمام عادي في أي مكان
دخول الحمام وإنتي برة البيت مش هيبقى مشكلة خالص، نضافة الحمام غالبًا مش هتفرق معاكي.. ولا هتبقى مشكلة لو مكانش فيه حمام أصلاً.
12- لما هتكسلي تحلقي دقنك هيبقى شكلك أحلى
لو كنتي راجل، كنتي هتهتمي بحلاقة دقنك بس، ده لو جالك مزاج، لأن شكلك ممكن يكون أحلى أصلاً لو سيبتيها، مكنتيش هتبقي مضطرة تتعرضي باستمرار لعذاب إزالة الشعر الزايد من جسمك.
13- كنتي هتجهزي الصبح في 5 دقايق
ما هو مفيش ميكاب ولا تظبيط للبسك وشعرك ولا الطرحة، يا دوب هتاخدي البنطلون من على الشماعة وأي قميص من الدولاب وتبقي تقفلي الزراير على السلم.
14- مكنتيش هتدخلي تعيطي في حمام الشغل
مكنتيش هتلاقي نفسك بتجري تعيطي في حمام الشغل كل ما حاجة تضايقك. لو اتخنقتي قوي، كنتي هتنزلي تقعدي على القهوة أو تلعبي دور بلاي ستيشن وهتبقي زي الفل بعدها.
15- كنتي هتوفري الوقت والفلوس اللي بيضيعوا على اهتمامك بشكلك
هي مرة كل شهر تروحي لأي حلاق يحلقلك زيرو وخلاص. ولا كريمات ولا كوافيرات ولا روتينات.
16- كنتي هتخلفي 6 عيال عادي.. ما هو مش إنتي اللي هتولدي!
لو كنتي من اللي بيحبوا الأطفال، هتوقفي خلفة ليه؟ ما هو مش إنتي اللي هتحملي ولا تولدي ولا ترضعي ولا تصحي بالليل وتغيري وتذاكري وتأكلي وتودي تمارين، إيه المشكلة لما تخلفي 6؟! العيال عزوة والرزق على الله.
إنك تكوني راجل، ده أكيد هيديكي شوية صلاحيات وحريات أكتر، في مجتمعنا ده بالذات، لكن بالرغم من ده، إنتي برضو تقدري تمسكي في إيدك مفتاح حياتك واختياراتك وحريتك، لو بس قدرتي تثبتي للي معاهم المفتاح دلوقتي إنك قد المسؤولية دي. وربنا معاكي!
