اللي الستات عايزة تسمعه، ما فيهوش كيميا ولا ألغاز ومش محتاج كتالوجات ولا كورسات تنجيم وقدرات خارقة في قراءة الغيب، بس إن كان ولا بد، ممكن تجرب الكام جملة الجايين دول..
1- تسلم إيدك يا حبيبتي
الأكل اللي بترجع تاكله بعد الشغل، أقدر أقسم لحضرتك إنه محضرش نفسه، آه والله.. زي ما بقولك كده. ولا نزل من الحله للطبق على صورته المدهشة اللي بتاكله بيها وأنت مبسوط ومتكيف وحاسس إنك خدمت الوطن بمسح الاطباق المليانة، الأكل ده عدا على مراحل كتير جدا، نزولة للسوق/ مشوار للفرارجي أوالجزار/ جولة طويلة متمحصة ومتفحصة عند البقال/ تنضيف للمطبخ/ توضيب لكل مكون على حده إن كان تنضيف ولا تقشير ولا تقطيع/ أكوام مواعين (ما قبل الأكل على فكرة)..
وكل ده لعلمك أخد وقت ومجهود كبير، ولو في الصيف فهو أخد كمية عرق مش أقل من اللي خدتها في مشوار المترو وأنت رايح الشغل (تخيل لو أنت معاك عربية مكيفة يبقى أنت في رفاهية قد ايه!).. فلما يطلع الأكل ناقص فتفوتة ملح، أو لما يكون السفرة مش عليها مياه، أو لما يكون العيش بايت لأنها كانت شايلة كتير وهي راجعة من السوق ومقدرتش تعدي ع المخبز.. بلاش تكرهها في كل اللي فات ده، واللي هي عملته بحب على فكرة، وقولها “تسلم ايدك يا حبيبتي”،
وأوعدك برضو.. إنها هتفضل تعيد السيناريو ده، وتجاوب لوحدها كل يوم على السؤال المؤذي “ناكل ايه النهارده”، و”تسلم ايدك يا حبيبتي” هتكون كفاية جدا إنها تشحن طاقة تكمل بيها أيام ربنا اللي زي بعض في المطبخ.
2- سلامة رجلك من الوقفة يا وداد
في مشهد من مشاهد فيلم هيستيريا، العبقرية عبلة كامل قالت جملة عبقرية بتلخص حاجات كتير.. “أنا ممكن ولا آكل ولا أشرب ولا أنام، بس الراجل اللي أحبه يطبطب علي وكدهون، ويقولي سلامة رجلك من الوقفة يا وداد..”، هو كده والله، ولو عايز تسيبها واقفه بعد كده عادي، هي مش هتاخد بالها إنها واقفة اصلا.. أيوه الستات بالبساطة والسطحية والسذاجة دي على فكرة.
3- أنا هنا.. أنا جنبك
الشعور بالأمان والخوف من الفقد، من أكبر العفاريت اللي بتجري ورا الستات، حتى وهي عارفة انك بتحبها، محتاجة منك لما تجيلها حالة الذعر المفاجأة، وهيستريا البكا من غير سبب، إنك تحضنها، وتقولها أنا هنا. أنا جنبك.
4- عاملك مفاجأة
الست نانسي عجرم في أغنيتها الرهيبة “في حاجات تتحس ولا تتقالش”، بتقوله.. “مقدرش أقولك غير كل طريقة حبك لي، أو غير علي ولا فاجئني في مرة وهاتلي هدية.. واملى عيني واعمل حاجة انا مش عارفاها!”، الستات بيحبوا المفاجآت، بيحتاجوا يحسوا إنهم مش الطرف الوحيد اللي بيفكر في العلاقة دي وإزاي يحافظوا عليها ويخلوها أحلى.. ويخلوا بيها الأيام لها طعم.
هتفرح اوي لو بعتلها رسالة تقولها متعمليش غدا أنا هتصرف، حتى لو رجعتلها بساندوتشين طعمية، أو لو دخلت عليها بتذاكر سينما، أو لو قلتلها إنك فضيت الويك إند دي عشانها، أو إنك تجيبلها الشوكولاتة اللي هي بتحبها وأنت راجع، أو نزلتلها بلاي ليست ع الموبيل أو الـ mp3 عشان تسليها وهي في المطبخ أو المواصلات، أو هتقعد بالعيال أنت في يوم عشان هي تخرج مع صاحباتها.. جرب كده!
5- بغير عليكي
الغيرة شعور إنساني، مفيهوش أي وصمة ولا عيب، ولا ضعف عشان تنكره وتقاومه بشوية تصرفات عشوائية عدوانية عديمة المعنى، لما تغير على مراتك/ خطيبتك/ حبيبتك.. قول لها “أنا بغير عليكي”، دي بتفرح اوي على فكرة، بس مش عمال على بطال، ومن غير خنقة الله يسترك!
6- إنتي أحلى
لو عايز تجننها وتركبها العفاريت، قول لها “ليه مبتعمليش شعرك زي فلانة!”، أو “شايفة هي بتعمل ايه مع جوزها؟” أو “يا بخته دي معيشاه في هنا!..”، مفيش واحدة بتحب تتقارن بواحدة تانية، ومفيش واحدة بتستحمل تشوف حضرتك بتقوم بالمقارنة دي بنفسك بمنتهى التدقيق والتمحيص والتركيز، الست محتاجة دايما تحس إنها مالية عينك اوي، وإنك شايفها أحلى واحدة.. وإلا فأنت الجاني على نفسك.. أنا حذرت!
جربوا وقولولي.. 😉
