في فيلم “أحلى الأوقات” كانت عينيهم بتلمع بعد ما قابلوا بعض تاني، طاقة غريبة اتسرّبتلهم بعد ما اتلموا تاني، لمة البنات بتحصل من وقت للتاني، لكن بتفرق كتير.. لمة البنات اللي لازم يساهم كل أطرافها والأطراف المحيطة في حدوثها كل فترة، عشان أسباب كتير بتخلي الدنيا تنور من تاني.
زي إن:
- لمّة البنات علاج نفسي: لمة البنات بتعتبر علاج نفسي فعّال للعديد من المشكلات النفسية، نور بينوّر طريق البنات لما يحسوا إن مشكلاتهم ملهاش حل، مكان للبوح عن النفس والناس والحياة والأيام والأحلام.
- لمة البنات مكان استشاري: قعدة البنات ممكن تشمل جميع أنواع الاستشارات، استشارات على مستوى مجال العمل، واستشارات عاطفية وعائلية واجتماعية، لمة البنات بتجمع خليط من تجارب وآراء مختلفة، بتطلع بخلاصة ممكن تساعد في اتخاذ قرار ما، أو تشاور على طريق جديد، أو تقفل سكة مالهاش لازمة كانت ممكن تبقى سكة شر.
- لمة البنات بتحرر من الضغوط: لمة الصحاب زيها زي الرياضة كده. مع الكلام والفضفضة بيحصل نوع من التحرر من الضغوط والطاقة السلبية اللي بتقابلنا طول الوقت، التحرر ده ممكن يشمل حدوتة، نكتة، أو حتى دمعتين في وسط الكلام، بتكوني متأكدة إن همّ بس اللي هيفهموهم.
- لمة البنات بتساعد في التعبير عن النفس: لما الأيام بتاخدنا، مبيبقاش فيه وقت إننا نعبّر ونتكلم عن نفسنا، ويمكن فيه أوقات كتير مبندركش أصلًا هو إحنا عاملين إزاي، لمة البنات هي “الفسحة” للنفس عشان تعبر عن نفسها والميكروفون معاها بحُرية.
- لمة البنات هي حب غير مشروط: لمة البنات الحلوة عاملة زي الأهل اللي بيحبوك حب غير مشروط، اللي خايفين على مصلحتك بس مش هيكرهوك لو عملت حاجة غلط، هيقفوا جنبك وهم بيحبوك ويرجّعوك للطريق الصح.
- “حلم قديم كان متغطي اكمني مشتّي ولابس كم”*: لما بتكون الصحبة بين ناس عاشوا مع بعض أيام كتير واتبادلوا أفكار وخواطر وأحلام، لمتهم بتفكرهم بأحلامهم اللي غطاها الزمن، أو إحنا اللي غطيناها بإيدينا، ويمكن كمان يزيحوا غيمة الشتا اللي خلت الحلم متغطي ويساعدوكي تنوري بورود أحلامك تاني.
- لمة البنات جناحات: لمة الصحاب بتخلي البنت تفتكر جناحاتها وتفتكر إنها مرفرفتش بيها بقالها مدة، وتفكرها إنها متنساش، وتساعدها على إنها تطير تاني، ترجع لمعة الطيران في عينيها وترجع بشغف أصيل بالحياة.
- لمة البنات يعني الأكلة الحلوة: لمة البنات بتضمن عادةً أكلة حلوة سواء في البيت أو برة، مشاركة اللقمة الهنية بتكفي 100 فعلًا، ويمكن تمشية مع آيس كريم من وسط البلد، تحلي الحياة اللي تعبت من كتر المشي على قواعد الدايت المجتمعي.
- لمة البنات يعني صورة بـ1000: في خروجة البنات عادةً لازم يكون فيه صورة بتسجل اللحظة التاريخية اللي يمكن متتكررش كتير، تسجيل الضحكة اللي بتطلع من القلب معاهم بس، تسجيل الولع بالحياة معاهم، تسجيل المحبة المتبادلة بين الناس اللي فعلًا بينتمو إليكي وإنتي بتنتمي إليهم من غير أي حدود.
- لمة البنات يعني السند: لمة البنات سند حتى لو متطلبش، صاحبتك اللي بتحس بيكي من غير ما تشرحي وتقدملك سند من غير ما تطلبي، تعتبر من النعم اللي لازم نشكر عليها ربنا كل يوم.
وفي المثل بيقولوا “اللمة الحلوة متتعوضش”، أومال اللمة الأحلى إيه وضعها؟!
*من قصيدة لمصطفى إبراهيم.
