بسنت
تسمحولي أفاجئكم النهارده بمفهوم تاني للسعادة؟ الفرحة أو حتى التخلص من الزهق والملل المفاجئ، الوحدة اللي بتزور الواحد في
مواعيد مناسبة وغير مناسبة.
الأسطورة بتقول إنّ الفرحة في اللمة والسعادة بتزيد لما نـshare مع أصحابنا وحبايبنا.. ينفع أقولكم إنّ ساعات كتير ده بيكون مجرد كلام
إعلانات! وإن الوحدة والزهق والضيق بيزورونا تحديدًا في الوقت اللي كان الناس بتكون قاصدة تسيبنا وتمشي لأي سبب في الحياة؟
حظوظ بقي! بس دي الحقيقة، والحقيقة دي عوّدتني إزاي أعرف أبسط نفسي بنفسي، أفرّحني وأفرفشني وأحكيلي وأتخانق معايا، وأهدّيني
وأهاديني بحاجة بحبها، وأطبطب عليّ قبل ما أنام، ومنساش أضحكني وأتمنالي أحلام سعيدة.
بصراحة الموضوع مكانش سهل أبدًا، مش سهل إنّك تتسند على نفسك فتلاقيها سانداك، خصوصًا لو نفسك بتبان قوية للناس بس هي
موجوعة وزهقانة والوحدة مستوطنة جواها، على كلٍ ده مش موضوعنا.. أنا حبيت أشارككم أسرار "صنايعية التفاؤل" وده اللقب اللي
أصحابي قرروا يلقبوني بيه.. إزاي متخليش الزهق يزهقك وتعرفي تبسطي نفسك وتدي الدنيا بالشالوط لما تديكِ ضهرها.
• أنا لمّا بحب أتسلي مبحبش أقزقز لب، من وحي الإعلان التسعيناتي ده، بحب أنزل أتمشي لوحدي كده مع نفسي، في الهواء الطلق أو
البرد القارس أو الحر المفرهد، بنزل وبمشي ساعة.. اتنين، حسب التساهيل بقى، بتفرج ع الفتارين والناس والشارع، وبطلع بحواديت
ملهاش عدد. والأهم بروّح من غير الطاقة السلبية، بسيبها تتوه وسط زحمة الناس.
• كُلي آيس كريم وشيكولاتة أو كاب كيك، طنشي الريجيم يوم، مش هيبقى هو والملل عليكي يعني!
• روحي السينما لوحدك، ويا ريت لو فيلم كارتون أو كوميدي، هاتيلك كيس فشار كبير واختاري مكان بعيد عن الدوشة واستمتعي، اللي
مجرّبش السينما لوحده فايته كتير.
• هاتيلك هدية، أي حاجة بتحبيها ونفسك فيها هاتيها حالًا، ولو الفلوس مش مظبطة، هاتيلك أي هدية من محل 2 ونص، حتى لو توكة
جديدة ولا برواز تحطي فيه صورتك وإنتي بتضحكي.
• اتصوّري، البسي أحلى هدوم بتحبيها وأحلى مكياج بسيط بيخليكي في أحسن حالاتك، وهاتي الكاميرا أو الموبيل واتصوري صور
عبيطة أو مجنونة، واضحكي أوي على شكلك واحتفظي بيها.
• ارسمي، لونّي، خيّطي، اكتبي أو اركبي عجلة، لو عندك أي هواية بقالك فترة سايباها، ده الوقت المناسب إنّك ترجعيلها.
• انزلي اعملي شوبينج حتى لو هتشتري طرحة، اشتري حاجات ملونة الله يكرمك بلاش الاسود، ده مغناطيس للزهق والملل والكآبة، إيه
رأيك في الفوشيا؟ حلو الفوشيا.
• طلعي ألبوم صورك وإنتي صغيرة، مرحلة إعدادي وثانوي، مش هتكلم كتير.. إنتي عارفة الباقي.
• هاتي قطة أو كلب أو سلحفاة، أو زرعة، هاتي أي حاجة ملهاش علاقة بالبشر وتواصلي معاها يوميًا.
• ابعدي عن الفيسبوك وتويتر والواتساب والانستجرام وأي حاجة إلكترونية تانية لمدة 24 ساعة، سيبي الساوند كلاوك، الساوند كلاود
حلو.. بس اختاري أغاني مفرفشة.
• صلّي واحكي لربنا كل حاجة.. هيسمعك. هيطبطب على روحك. وكل حاجة هتعدي وصدقيني بتعدي فعلًا.
• غيري تسريحة شعرك أو لون شعرك أو قصة شعرك، اغسلي شعرك طيب عشان الأفكار السلبية اللي مزهقاكي تنزل مع المياه
والشامبو.
• لو مش عايزة تكلمي الناس متكلميش، بس لو ليكي واحدة من أصحابك صنايعية ضحك وتفاؤل.. هو ده وقتها.
• آه وممكن أقولك حاجة.. تعايشي مع فكرة إنّه في عز وحدتك دي هيكون "هو" بيلعب بلاي ستيشن أو بيتفرج على ماتش كورة قشطة
جدًا.. اوعي اوعي تزعلي، إحنا مش ناقصين اكتئاب.. ما هو الكلام اللي فوق ده كله أصلًا ليه؟ عشان نبسط نفسنا بنفسنا.. عشان إحنا
بنات قوية، شاطرة، وبتسند نفسها وقت الزنقة.
وأخيرًا.. تأكدي إنّ الوحدة هتزورك هتزورك.. في أي وقت مناسب ليها، وده مفيش له مهرب، الوحدة من حقها تيجي وقت ما تحب من
غير مواعيد، حتى لو إنتي في وسط الناس، صاحبيها وتعايشي معاها عشان تمشي بسرعة، كل ما هتضايقي وتحسسيها إن وجودها غير
مرغوب فيه هتطبق على نفسك زيادة. ونفَسك هو الدنيا.. مينفعش يضيق.. ينفع يبقى براح وبس.
