طول عمري محبش المطبخ، بقولها وأنا عارفة إن جملة زي دي بتخفض أنوثة قائلتها لـ50% وهي واقفة كده، بس دي حقيقة، إحنا معشر كارهي المطبخ منبوذين وسط البنات، ودايمًا فيه خلط بين كره المطبخ وكره الأكل، وهذا عزيزتي خطأ شائع.
أقولك ليه بقى، إحنا بنكره المطبخ لأنه يتصنف تحت بند “شغل البيت”، والحاجة أول ما بتتصنف “شغل” بتفقد متعتها تمامًا.. وقفة المطبخ لوحدها بتسد النفس، وحساب وقت ومجهود عمل الطبخة بيتناسب طرديًا مع مدى كرهك ليها، وعكسيًا مع عدد مرات عملها في بيتك.. متنكريش.
أما حب الأكل فده قصة تانية، مدارس.. عن نفسي الأكل دايمًا مربوط معايا بذكريات وبني آدمين، أنا بشوف الناس أكلات معظم الوقت.
كل واحد من اللي حواليكي دول لو جربتي تركزي معاه هتلاقيه شبه أكلة معينة في دماغك، أو ع الأقل مرتبط معاكي بأكلة بتفكرك بيه، حتى في تراثنا كنا بنشبّه طباع الناس بصفات الأكل، الشوام مثلاً بيقولوا على الشخص الظريف “مهضوم”، وإحنا بنقول ع الناس السخيفة “لزجة” أو “ساقعة” أو “حمضانة”.
الناس أكلات في شخصياتهم، واحد مثقف أوي و”مسبك” كده، عظيم بس مينفعش تستحمله بعمقه على غيار الريق الصبح، وناس خفيفة ع القلب زي طبق السلطة، وناس مضادات اكتئاب زي حلة ورق العنب، وناس شبه طبق الفاصوليا ع السفرة، اللي طول ما فيه بطاطس وفراخ مبتقربش منه، ولو اتفتحت حفرة في نص الترابيزة وشفطته، مش هتحس بغيابه، وناس شبه القلقاس، لا هو ملوخية ولا هو بطاطس، وطعمه استغفر الله العظيم، وناس بعيد عنك زي الفسيخ، ريحتهم بتوصلك قبل ما يدخلوا عليك الأوضة.
*ملحوظة: أكيد القلقاس هيكون له مدافعين عنه، عشان كده الناس أكلات، لأن أستاذ قلقاس اللي أنا بكرهه أكيد له محبين.
الناس أكلات.. لأن أكلة ممكن تعرّفك على حد وتقربك منه، يطلع عايش على أكل الشارع زيك من عربيات التسمم ودايس معاك في أي غسيل معدة، أو يطلع مجنون زيك وبيغمس الجبنة الحادقة بالعسل الأسود. واحد يفتح نفسك ع الأكل، ويخليك كل يوم تجرب مطعم شكل، وآخر الشهر بيفطر ويتغدى معاك مخلل عشان الإفلاس.
الناس أكلات لدرجة إن فيه ناس ريحتها أكل، جدتك ريحتها بسكويت بالقرفة والعسل، وقت ما تشمه في أي مكان بتشوف وشها وتسمع صوتها، لدرجة إن فيه ناس بتشوفها تجوع، عشان عارف إنهم أكيلة وبتشوفهم على شكل GPS مطاعم واقف بيسلم عليك.
الأكل الجديد زي الناس الجديدة.. مغامرة، مكان وريحة وطعم ونفس وصحبة، عشان كده نصيحة متجربش أكل جديد مع حد مش ناوي تفتكره كتير، لأن لو الأكل عجبك والناس سابوك، هتزعل كل ما تحب تاكله تاني، ولو قررت تعمل ذكريات جديدة بأكلات جديدة يبقى لازم تكون عارف شوية حاجات:
– المطبخ الفرنساوي بيعمل أكل شكله حلو جدًا، وكله ابتكارات، شكله بس مع الأسف.. بيفرموا الفراخ والسمك ويعملوهم كريمة.
– المطبخ المكسيكي جميل وشبهنا لدرجة إن عندهم بسلة، وبيشتغلونا بيبيعوا دوريتوس على إنه أكلة قومية عندهم اسمها ناتشوز، وبيحطوا عليه لحمة مفرومة.
– المطبخ الأسيوي أحلى ما فيه أكلات الحلو والحادق.
– خاف من اللبنانيين لو كان قولونك عصبي ميستحملش الكمون والزعتر بكميات ضخمة، غير كده شكليات.
– السوريين حلوين، ستات ورجالة ومسلسلات وأكلات.. استغفر الله العظيم.
– الكَروتة عند الصينين طبع في كل حاجة، لا منتجاتهم بتكمل معاك ولا أكلهم يتبلع معاك، يا نص سوا يا مسلوق يا ني.
– الأكل الهندي عامل زي الأفلام الهندي، عايز تبقى فاضي يوم من أول النهار كده، تقعد تفهم الطعم وتستوعبه، وتحفظ أسامي الأكلات اللي عجبتك.. أهم حاجة متسترخصش المطعم.
– الأندنوسيين بيبتسمولك ببراءة كده وهمّ بيقدموا أكلهم، متصدقهمش.
– دايمًا لما تجرب مشروبات جديدة، متدخلش بقلب جامد، خلي واحد في الشلة بس يتقدم مضحيًا، ودوقوا منه كلكم وبعدين خدوا القرار، خصوصًا المشروبات الجديدة المنعشة اللي ماك بينزلها من وقت للتاني، أغلبها طعمه بيبقى شبه شامبو الأطفال.
الأكل اللي طعمه وحش مش دايمًا مشكلة، بالعكس، استفيد بأسامي الأكلات اللي مش هتعجبك وضيف للتراث العربي الأصيل في تشبيه الناس بالأكل، والجميل إنك لما تقول لحد “إنت عيل جونكان في نفسك” مش هيبقى فاهم دي حاجة كويسة ولا وحشة.
*الجونكان: أكلة من أعشاب البحر الملفوفة وفوقها مأكولات بحرية.
