ايات

تم نشرة في 09/16/2014

كنت مرة مع مجموعة بنات، لقيتهم بيتكلموا عن إن كل واحدة مننا متميّزة بشخصيتها ونفسها، ساعتها نوّر في دماغي 3 مشاهد:

مشهد (1)

بعد ما اتخرجت من الجامعة اشتغلت في الحكومة تبع نظام أبناء العاملين، كانت مامتي هي السبب في دخولي الشغل ده، وبعد أقل من سنة كنت مقررة إني لازم أسيب المكان ده في أول فرصة تجيلي. سبب من ضمن أسباب كتيرة أوي، إني غالبًا مبيتمّش ذكر اسمي غير وبعده اسم مامتي، المهندسة آيات بنت المهندسة (ج)، أو ممكن يختصروا واسمي يتشال أصلًا من الحسبة وأبقى بنت المهندسة (ج) على طول.

مشهد (2)

كنت باخد كورس هندسي ما، وفي أول يوم المهندس المُحاضِر مسك كشف الأسماء بيقراه، ووقف عند اسمي كتير كتير كتير، وبعدين سأل فين آيات؟ رفعت إيدي، قالي إنتي تبقي أخت (أ)؟ قلتله آه، قالي ده كان زميلي في الكلية. بس بقى، ومن ساعتها بقى ينادي على الكل اللي في الكورس بأسماءهم، وييجي عندي يقولي يا أخت (أ)، ينادي يقول يا داليا ويا منى ويا ولاء، ولما ييجي يناديني يقولي يا أخت (أ).

مشهد (3)

بمجرد ما خلّفت أصبح لقبي الرئيسي عند الناس هو أم (م)، يا إخوانّا أنا اسمي آيات، يبصولي بابتسامة صفرا لزجة ويكمّلوا كلامهم عادي وهم بيقولوا أم (م).

في كل مرة كنت بشتكي من موقف من التلاتة، كنت بلاقي ردين فعل، واحد بيطبطب وبيقولي معلش هم كده بيكرموكي لما بيذكروكي بحد هم بيحبوه ويعزّوه، وناحية تانية تعقد حاجبيها هي بتستنكر مشاعري المشينة وإني إزاي أنا مش حاسة بالفخر لما حد ينادي عليّ بالألقاب دي!

وأنا في الحقيقة مش عارفة إيه الفخر أو فين الحلاوة في الموضوع! أنا بحب أمي وأخويا وبنتي، وأحب إن الناس لما تجيب سيرتهم تفتكرهم بحُب ويكرّموهم ويشيلوهم فوق راسهم كمان، بس هي النقطة ف اللي قدامي ده هيشوفني كآيات إزاي طول ما هو شايفني كائن ملتصق بكائن آخر؟ يعني إزاي هيشوف آيات دي غير إنها مش هادية زي مامتها أو مش حلوة زي مامتها أو حتى دي نسخة من مامتها، أيوه آيات فين حضرتك من المعادلة؟ واللي برضو هيشوفني من خلال أخويا ويتقالي ده زيادة احترام، على أساس إنه مش بيحترم الباقيين؟ على أساس إني من غير أخويا مسواش؟!

ويفتكروا إنهم مسكوني من إيدي اللي بتوجعني لما يقولولي طيب معقولة مش فخورة بـ(م) ومش عايزة تتندهي بأم (م)!

أيوه، ببساطة لأني حياتي منفصلة عنها، وطول ما إنت حاصرني في دور أم يبقى على طول حكمك عليّ من خلال إني أم -غالبًا فاشلة- وإزاي أشتغل وأسيب بنتي؟ يعني إيه عندك طموح؟ يعني إيه بتفكري في دراسات عليا؟! ده بدل ما تفكري تجيبيلها أخ!

عشان كده أنا مش بحب اسمي يرتبط باسم شخص تاني، مهما كنت بحبه وبقدّره وبتشرف مجرد حتى إني أعرفه. بس لأن ارتباط اسمي باسم شخص تاني، بيخلي اللي قدامي وميعرفنيش يُسقط عليّ أحكام مش حقيقية، ويقارنني مقارنات ظالمة أو حتى إنه يقدّرني تقدير أنا مستحقوش، وبيلغي شخصيتي تمامًا.

أنا مش طالبة حاجة صعبة أو غريبة، ولا رافعة شعار لن أعيش في جلابية أمي. كل اللي بطلبه إن اللي ينادي عليّ يناديني باسمي اللي أنا بعرّف نفسي بيه، لأن حتى الاسم -شئنا أو أبينا- فيه جزء كبير من شخصية وروح صاحبه. ويوم ما أقول على نفسي أم (م)، أكيد مش هزعل ولا هتضايق من اللي هيناديني باللقب ده.