هو يعني إيه تنميط أصلاً؟
التنميط هو إنك تديني نموذج (نمط) وتقنعني إن ده هو الصح ولا شيء غيره، تديني كتالوج أمشي عليه وتقنعني إن ده “النمط” السائد ولازم أتواكب معاه.
من فترة كنت قاعدة زهقانة فدخلت صفحة كلها ستات وبيتناقشوا في كل حاجة تخص حياتنا، أنا الحقيقة دخلت أتسلى ودخلت كمان عشان شوف الستات بيفكروا ف إيه.
لقيت مجموعة موضوعات بتتكلم عن معاملة الأزواج، قلت حلو أوي، أنا عروسة جديدة والخبرات مفيدة مفيش كلام، أما أدخل أستفيد.
أنا الحقيقة اتفاجئت، لقيت كل الستات بيتكلموا في نفس الحوار، كلهم بيصدرولي نفس الفكرة، لازم أبقى شيك على طول، حلوة طول الوقت، مرتبة ومنظمة وصوتي واطي وهادية والعيبة متطلعش من بوقي، طول الوقت.
لقيت كمان ستات بتحكي تجاربها وبتقول للباقيين يلا نفذوها وقولولي رأيكو وكلموني عن مفعولها. حلو إننا نقول لبعض تجاربنا، بس مش حلو أبدًا إننا نقتنع إنها قوانين منزلة وكلنا لازم نجربها، الستات مقتنعين إن “النمط” ده من الحياة والتجارب شيء مقدس وبينفذوه تنفيذ حرفي لدرجة إن واحدة فيهم بعتتلهم وقالت إنها جربت حاجة محددة وكانت هتطلق فيها.
لو ليكي علاقة بمجتمع المثقفين هتلاقي نوع تاني على النقيض من اللي حكيته ده، نوع طول الوقت بيشتم في الرجالة وفي الجواز، طول الوقت بيصدروا للي حواليهم فكرة إنك لازم تستقلي بحياتك وتكوني قوية، أي واحدة تتكلم عن ولادها أو جوزها بتكون في نظر النوع ده ضعيفة وجاهلة، أي واحدة بتتكلم عن إن حياتها اكتملت بعد ما لقت شخص تكمل معاه حياتها بيتعاملوا معاها على إنها فيروس يجب اجتنابه، أي واحدة بتتكلم عن الأمومة أو عن مسؤولياتها بتكون في نظرهم خدامة لازم يحذروا باقي الستات والبنات من التحول ليها.
الفريق ده بيشجع البنات والستات على “نمط” الست المكتفية بذاتها المستقلة الناجحة اللي مينفعش أي حاجة تعطلها عن مجدها الشخصي.
وده بيفكرني بالإفيه بتاع يمين شوية.. شمال شوية.. لحد ما العربية تلبس ف الرصيف.
هو أنا ليه لازم أبقى تبع نمط معين؟ يعني ليه لازم تدوني كتالوج أمشي عليه عشان أعجب؟ ليه أصلاً بتلعبوا في دماغ الستات وتقنعوهم إنهم لازم يبقوا قطعية واحدة؟
وإنتو يا ستات.. ليه بتسلموا دماغكو تسليم أهالي؟
يعني الست اللي في المثال الأولاني، حضرتك مش عارفة طبع جوزك يعني؟ عايزة تقنعيني إنك مكنتيش تعرفي إن رد فعله مش هيكون زي رد فعل جوز الست اللي بعتت تجربتها وقالتلك جربيها؟
والستات اللي في المثال التاني، إنتي عايزة تشتغلي وتبقي ناجحة ولا بتحبي فلان وعايزة تتجوزيه وتقعدي في البيت وبرضو تبقي ناجحة؟
هو ليه لازم تبقي شبه حد ما؟
التنميط خطر مميت يا ستات والله، إحنا مش أجهزة إلكترونية بينزلها سوفت وير كله شبه بعضه، إحنا مختلفين، ربنا خلقنا مختلفين عشان نفضل مختلفين مش عشان نوصل لمرحلة في حياتنا نتحول كلنا فيها لنفس النسخة.
الستات اللي بيحاولوا يشكلوا اللي حواليهم ويصدرولهم نمط معين، الستات دول خطرين جدًا، في رأيي أنا (واللي مش لازم أبدًا يكون رأي صح) الستات دول بيحاولوا يخلقوا لنفسهم مجتمع آمن يعيشوا فيه، وعشان كده بيحاولوا يخلوا كل اللي حواليهم شبههم، وده خطر.
الست اللي مفيش في حياتها شيء غير الطبيخ والغسيل وتربية العيال والسرير دول بيخافوا يشوفوا واحدة بتتفرج على توك شو أو بتقرا كتاب أو بتدور على شغل، بيحسوا بالتهديد إنهم يكونوا كده أقل منهم فبيحاولوا طول الوقت يقنعوا اللي حواليهم إن نمط حياتهم بس هو اللي صح وأي حاجة تانية بتعمليها برة المدار ده فهي غلط بالضرورة.
الستات اللي شغلهم واكل حياتهم الشخصية بيخافوا يشوفوا واحدة سعيدة بطريقة تانية لأن ده ممكن يأثر على نظرتهم لمدى كمال حياتهم، فبيحاولوا ينمطوا اللي حواليهم طول الوقت إن هي دي الطريقة المثلى للحياة.
في رأيي.. الست اللي بتحاول تخلق نسخ منها هي ست مش سعيدة في الأصل، مش قادرة تقتنع إن حياتها حلوة كفاية، فبتحاول تخلي كل الناس زيها عشان ميبقاش حد أحسن من حد.
الست دي خطر، لما تقابلي ست عايزة تستلم دماغك وتفرمتها وتسلمهالك مفيهاش حاجة غير مبادئها وطريقة حياتها هي ست خطر عليكي، خطر على حياتك وعلى صحتك النفسية وعلى رضاكي عن نفسك وعن حياتك.
متسيبيش حد يقنعك بطريقته في الحياة، متسيبيش واحدة تقولك إن طريقتك في عمل المكرونة بالبشاميل غلط وإنك لازم تعمليها بطريقتها وإلا هتفضلي فاشلة في المكرونة.
متسيبيش حد يقنعك بطريقته في الحياة. متسيبيش واحدة تقولك إن وجود ابنك أو بنتك في الحضانة شيء غير إنساني وإنك لازم تسيبي شغلك وتتفرغي لبيتك تمامًا وإلا مش هتكوني أم كويسة.
متسيبيش حد يقنعك بطريقته في الحياة. متسيبيش واحدة تقولك إن جوزك لازم طول الوقت يشوفك في أجمل صورة وإلا هتكوني زوجة فاشلة.
عايزة تعملي المكرونة بالبشاميل بطريقتك اثبتي عليها، إلا لو حسيتي إن الطريقة التانية أحلى، ولما تقرري تغيري الطريقة دوري بنفسك ع النت وشوفي أحسن طريقة تعجبك ومتاخديش كلامهم أمر مسلّم بيه، ولو عايزة تفضلي في شغلك دوري على حضانة كويسة لولادك، ولو عايزة تقعدي في البيت منكوشة يوم من نفسك اعملي كده بدون تردد، المهم يكون قرارك إنتي مش قرار الست اللي قررت إن هو ده الصح.
مفيش في الحياة صح وغلط مطلق، ومفيش حد عنده الحقيقة المطلقة، في حاجة اسمها نجرب لحد ما نوصل للحل الأريح لينا، الحل اللي هيخلينا راضيين عن حياتنا مش اللي هيخلي الناس راضيين عننا.
ابعدي عن الستات الخطر اللي بيحاولوا طول الوقت يشوّهوا أفكارك ويحولوكي لنسخ مكررة منهم، حتى لو إنتي مقتنعة بكلامهم دوري لحد ما تلاقي كذا مصدر يقنعك، مش كلام فلانة اللي شايفة إنها وصلت لمرحلة الحكمة النهائية.
الستات اللي من النوع ده خطر جدًا، وخاصة على البنات الصغيرين اللي لسه بيكونوا شخصياتهم، البنات اللي بينبهروا بكل وأي حاجة وبياخدوا أي حد معدي في الشارع قدوة ليهم لمجرد إنه بيعرف يزوق الكلام، الستات اللي من النوع ده قادرات إنهم يدمروا حياتك بالكامل لو سلمتيلهم دماغك.
التنميط خطر مميت، آه والله مميت.
