كاميليا حسين
رغم خروج مصر من كاس العالم بدري بدري، إلا إن أغلب الأسر هتتابع اهتمامها بالماتشات والنتايج.
ولما لاحظت السنة دي على بنتي (7سنين ونص) اهتمامها بكاس العالم ومين هيلعب مع مين والمجموعات والنقط والنتايج، قررت أستغل الاهتمام ده عشان نتعلم شوية حاجات جديدة. وبدأنا نحضر سوا كراسة كاس العالم.
الحكاية من أولها:
قبل ما نبدأ في أي حاجة كان لازم نحكي حكاية كاس العالم من أولها، وده سهل تلاقي معلومات عنه على الإنترنت. وإنتي بتحكي الحكاية مفيش مانع تمروا على شوية أحداث تاريخية أثرت على كاس العالم، زي مثلاً الحرب العالمية الثانية.
كراسة كاس العالم:
– هتحتاجي اسكتش رسم أبيض أو كراسة عادية.
– ألوان (وممكن قص ولزق).
– قلم.
– وسيلة اتصال بالإنترنت (سواء موبايل أو تابلت أو جهاز كمبيوتر).
الخطوات:
– أول صفحتين هنقسمهم ونكتب فيهم المجموعات، ومهم إن الطفل يشارك في الكتابة، ممكن تعملوه بالتصميم المناسب ليكم، أو ممكن تستعينوا بطباعة النموذج الجاهز ده.
https://drive.google.com/drive/folders/1cFygCdyZZpnN9jMFl1QGqT-qroxUiYiX
اللي جاي بقى هو المهم:
هنخصص لكل دولة مشاركة صفحة كاملة، وهتكون مهمة الطفل إنه يجمع معلومات عنها (على حسب سنه) يعني لو طفل صغير 5 سنوات مثلاً ممكن تساعديه في إنك توريله شكل العلم ويحاول يعمل زيه بالقص واللزق.
بالنسبة لبنتي كان المطلوب منها إنها تدور على المعلومات دي لكل دولة:
– العاصمة.
– شكل العلم، وترسمه.
– اسم العملة.
– القارة.
وطبعًا لو طفل أكبر ممكن نطلب منه يدور على معلومات أكتر.
الحقيقة المهم في النشاط ده أكتر من إن الطفل يعرف معلومات عامة عن كل بلد، هو إنه يتعلم إزاي يدور على الإنترنت عن المعلومة بنفسه وبأقل قدر من المساعدة.
أعلام الدول المشاركة في كاس العالم:
ده نشاط تاني، ممكن يكون مناسب للأطفال الأصغر شوية، هو عمل نماذج لأعلام الدول المشاركة بالقص واللزق وتعليقها في أوضته زي الصورة دي مثلاً:
مصدر الصورة https://www.artbarblog.com/world-flag-garland/
3- العبوا ماتش كورة:
لو مش راضيين عن نتيجة الماتش ممكن تعيدوا اللعب باستخدام اللعبة البسيطة دي:
مصدر الصورة https://www.muminthemadhouse.com/shoebox-table-football-foosball/?utm_campaign=coschedule&utm_source=pinterest&utm_medium=Jen%20Walshaw&utm_content=Shoebox%20table%20football/foosball%20table
كل اللي هتحتاجيه:
– علبة جزم قديمة.
– مقص وصمغ.
– فرخ ورق أخضر عشان الأرضية (وده ممكن تستغنوا عنه).
– كوريكتور أبيض عشان تخطيط الملعب (ممكن الاستغناء عنه برضو).
– 10 مشابك.
– أعواد الشيش طاووق الخشب.
– كورة بلاستيكية صغيرة.
الخطوات:
– أول حاجة هتخططي الملعب زي الصورة دي وتلزقيها في أرضية الصندوق. ( خطوة ممكن تستغني عنها).
– اقطعي مستطيلين في الصندوق عشان تعملي المرميين بحيث يكونوا واسعين كفاية عشان الكورة تمر منهم.
– ابدئي قيسي وحددي مكان الفتحات اللي هتمرري منها العيدان الخشب، عشان تعملي أربع فتحات على كل جانب. وخدي بالك من إن ارتفاعها يكون مناسب عشان يدي براح للمشابك تتحرك من غير ما تخبط في أرضية الصندوق.
– دخلي العيدان الخشب وثبتي المشابك فيها. وممكن تحطي على أطراف العيدان قطع صلصال صغيرة للأمان.
والعبوا واتبسطوا.
تعليم أطفالنا مش بس من خلال المدرسة أو الكتب، كل فرصة وكل يوم وكل حدث ممكن يبقى فرصة يتعلموا من خلالها حاجة جديدة. متخليش فرصة تفوتك.
كاس العالم فرصة تعليم للأطفال
