هبه
دايمًا في الشتا بيبقى نفسنا في حاجة حلوة، وبالذات إن السكريات بتدفي الجسم وتمده بطاقة سريعة، لكن أغلب التحليات بتتقدم باردة، وده بيخلينا مش مقبلين على التحليات قوي في الشتا.
النهارده هنقدملك الفواكه المشوية بصوص البرتقال، ودي ميزتها إنها خفيفة جدًا ومناسبة لكل اللي بيحبوا الحلويات ومش عايزين وزنهم يزيد، وكمان سهلة وسريعة ومكوناتها متوفرة في كل بيت.
المقادير:
فواكه الموسم (كمثرى.. فراولة.. تفاح.. برقوق.. خوخ.. مانجو) ومن الممكن الاكتفاء حتى بنوع واحد أو نوعين حسب الرغبة
عصير برتقالة واحدة.. يفضل عصير فريش مش مُعلّب
سكر حسب الرغبة
معلقة زبدة
عود قرفة
الطريقة:
تقطع الفواكه قطع كبيرة وتحلى بالسكر وعصير البرتقال، ويكسر عود القرفة نصفين ويضاف إليها.
توضع في صينية بايركس أو قالب فرن عادي وتدخل الفرن لمدة نصف ساعة.
بمجرد خروجها من الفرن تضاف إليها ملعقة زبدة وتقلب حتى تختلط الزبدة مع الفواكه.
ملاحظات:
من الممكن الاستغناء عن إضافة الزبدة للفواكه المشوية، إذا كنا نريدها خفيفة.
إذا رغبنا في حفظها في الثلاجة لا نضيف الزبدة، وتضاف فقط عند تسخينها وإعدادها للتقديم.
تحفظ الفواكه المشوية في الثلاجة لمدة أسبوع، دون أن يتغير طعمها وقوامها.
تقدم الفواكه المشوية دافئة، مع الأرز باللبن أو مع الآيس كريم أو مع الكيك.
