خاص للشباب: كيف تصالح حبيبتك في خطوة واحدة؟ حيل ذكية لكل رجل

21478

بما إني واحدة ست برضو فأقدر أقولكم -وأنا ضميري مستريح- إن مُصالحة الستات مش بالصعوبة اللي الرجالة بيصوروها لنفسهم عشان يستسهلوا ويسيبوا الست تخبط دماغها في الحيط لحد ما تزهق وتعرف إن الله حق فتبطل تتقمص من الحاجات الكتير اللي بتشوفها مستاهلة مع إنها متستاهلش.

اسمحلي أقولك عزيزي الرجل إن ع الأقل 50% من الحاجات بتكون مستاهلة فعلاً فبلاش استهبال! وعملاً بإن الواحد يلتمس لأخيه 70 عذرًا خليني أساعدكم وأقولكم إزاي تصالحوا الستات.

 

كيف تصالح حبيبتك العنيدة؟

أولاً:

حاول متزعلهاش من أصله، مش هتبقى إنت والعيال والطبيخ والغسيل والمواعين -وما أدراك ما المواعين- والمذاكرة وأمها وأمك وشغلها ومصاريف المدرسة والكهربا اللي بتقطع عمال على بطال والزمن عليها. خليك حسيس شوية يا أخي!

يعني الحاجة اللي إنت عارف إنها هتتضايق منها متعملهاش من الأول، صدقني عشان مصلحتك قبل ما يكون عشان مصلحتها، محدش بيحب يتنَكِّد عليه برضو، وحتى ساعتها مش هتحتاج تقرا باقي المقال وأبقى وفيت وعدي وقولتلك الخلاصة في خطوة الواحدة، زعلتها بقى واللي حصل حصل هتضطر تجرب حظك معانا مرة أخرى في باقي الخطوات.

ثانيًا:

 لو إنت فعلاً غلطان هات من الآخر واعترف بغلطك، مش المطلوب منك تقف قدامها متذنِّب ورافع إيديك ولا لازم تقول “أنا آسف” ولو إنك لو قولتها مش عيب، بس اعترافك إن معاها حق وإنك غلطت وضايقتها، أو إنك مكنتش تقصُد وآديك أخدت بالك ومش هتكرر اللي حصل مرة تانية، ده كافي عشان تعتبر إنك كده صالحتها وتكملوا الحياة عادي.

وطبعًا مفيش مانع لو مع اعترافك ده جبتلها أي حاجة لطيفة، مش لازم ورد على فكرة -مش كل الستات بتحب الورد- عشان تحس إنك بتراضيها إن شالله شوكولاتة.

أولاً وثانيًا فشلوا وإنت مش عارف أصلاً هي متضايقة من إيه نروح لـ ثالثًا.

اسألها، ولو قالتلك مفيش معلش يا ابني هي بتكدب أو بتتقل وعايزاك تِلِحّ عليها بالسؤال، أما لو قالتلك شوف إنت عملت إيه فمتحاولش تشوف لأن غالبًا أيًا كان السبب مش هييجي في بالك. كرر السؤال وقولّها إنك مش عايز تضيع وقت في التفكير عشان متفضلش زعلانة كتير، وهي هتصدقك متخافش. 

المهم لازم تصمم إنك تعرف، وبعد ما تعرف اتكلم معاها في اللي مضايقها وحاول تخفف من عليها، أرجوك متدوَّرش على مُبرر تطلعها بيه غلطانة، إنت كده بتلعب في عداد علاقتكم. بلاش جَو أنا مقولتلكيش الصبح صباح الخير عشان نسيتي تحطي الملح في الأكل يوم الصباحية وموديتيش الهدوم للمكوجي الأسبوع اللي فات والواد الصغير رَجَّع على قميصي المفضل وإنتي لسه مغسلتيهوش.

رابعًا.. قالتلك ع اللي مضايقها ومقتنعتش!

مش لازم تقتنع على فكرة، هي اللي متضايقة مش إنت، حاول تستوعب على أد ما تقدر. معرفتش؟! قولها “معلش” حتى لو من ورا قلبك، قولها “متزعليش وكل حاجة هتبقى أحسن”. قولها “طيب اهدي وهنلاقي حل بعدين”. قولها أي حاجة غير إنها غاوية نكد أو فاضية أو بقيت متتعاشرش.

خامسًا:

 لو إنت مش غلطان من وجهة نظرك ومش قادر تفهم هي فعلاً زعلانة ليه ومعندكش حل للمشكلة اللي هي بتواجهها معاك فأرجوك متَّفِّهش من المشكلة، متقولهاش تحمد ربنا وإنها أحسن من صاحبتها الأنتيم اللي اتجوزت ابن خالتها وبيصبحها ويمسيها كل يوم بعلقة.

وفي عز الخناقة اوعى تقولها أعملك إيه يعني! متنفُخشِ في وشها وتسيب البيت وتنزل تروح تزور مامتك أو تخرج مع صحابك وتسيبها تاكل في نفسها، متخرجشِ من الأوضة وهي بتكلمك وتروح الأوضة التانية وتقعد تلعب ع الموبايل أو تكلم حد وتضحك بصوت عالي ولا كأنك مهتم.

وأتوسل إليك متقولهاش سيبينى لوحدي أو مش عايز أتكلم دلوقتي أو أنا عايز أنام نبقى نأجل النكد لما أصحى، اعمل الحاجات دي لما تبقى إنت اللي متضايق مش هي، خصوصًا لو جت عَبَّرتلك عن غضبها ده ومسابتكش تكتشفه لوحدك.

 

عشان لو إنت ماعرفتش تحتويها الموضوع هيتطور ويدخل في سكة من اتنين:

– إما إنها هتصعب عليها روحها وتبدأ تعيط وتتشحتف وفي الحالة دي هيبقى لاااااازم عليك إنك متسيبهاش تتفلق من العياط لحد ما مناخيرها تتنفش وتسيب وعينيها تتنفخ وتحمر وبعدين تبصلها بقرف وتقولها إنتي بتعملي في نفسك كده ليه! وروحي اغسلي وشك.

لو باقي ع العلاقة متعملش كده، أنا بحذرك. لأن بعد مرحلة معينة من العياط الكلام بيبقى ماسخ وملوش أي أهمية حتى لو قولتلها هتكتب باسمها كل ممتلكاتك أو إنك آسف من هنا لحد أول الشهر الجاي. يا متخليهاش تعيط من أساسه يا من أول ما تعيط أقف على طولك واعمل ستووووب وخليها ع الأقل تبطل بُكا بأي طريقة.

– السكة التانية إن غضبها الصغير هيكبر وهتزوِّد الحاجز اللي بيتبني بينكم وهتبقى لو مكنتش مشارك فيه من الأول مشارك فيه دلوقتي برغبتك الكاملة.

طيب تعمل إيه يعني؟

احضنها

الحضن سحر مفعوله أكيد، غلطان مش غلطان احضنها وطبطب على روحها هتمتص غضبها إلى حد كبير، بس اعمل ده وإنت قاصد ومن الأول مش بعد ما تبقى خلاص قررت تنتحر ورايحة ترمي نفسها من الشباك فتحضنها جبر خواطر وإنت سادد مناخيرك.

قولها بَحِبِك

أيوه.. قولها بحبِك حتى في عز ما هي بتصوت في وشك وبتقولك إنت عمرك ما عملت عشاني أي حاجة تبسطني، متصدقهاش، وقتها هتكون بتبالغ. قولها إن أيًا كان سبب المشكلة دي فإنت بتحبها وعارف إنها بتحبك ولازم الحقيقة دي تبقى منورة فوق دماغكم عشان الغضب ميعميكوش عنها وإن المشاكل كبرت أو صغرت بتروح وتيجي.

فَسَّحها

خدها واخرجوا اقعدوا في مكان لطيف، منه تغيروا جو ومنه محدش فيكم صوته يعلى لو  الموضوع اتطور، ويُفضَّل لو تختار مكان بيفكركم بذكريات لطيفة، الحنين ساعات بيقلل المسافات. ولما مزاجها يروق حاول تراضيها.

اشتري خاطرها

لو فضلت حتى بعد ما اتكلمت معاها مش مقتنع بغضبها اوعدها إنك مش هتكرر السبب اللي ضايقها، مش عشان إنت مقتنع بيه لكن عشان زعلها يعِز عليك، اسمعها للآخر، استوعب غضبها وحزنها ومخاوفها وفي الآخر خالص اشتري خاطرها وطَمِّنها.

هاتلها هدية

مش عارف تعمل كل ده سواء عشان إنت راجل عملي ومش بتاع كلام أو عشان خُلقك ضيق وشايف كل الكلام اللي فات ده سخيف؟ هاتلها هدية عارف إنها هتحبها مع كارت صغير قولها فيه متزعليش. وابقى غَلِّف الهدية وحياة والدتك، بلاش جو تديها الهدية في كيس بلاستيك وعليها تيكيت السعر، العشم حلو بس مش أوي كده.

ناغِشها

لو أَخدِت منك جنب انكُشها بكلام لطيف أو حركات من اللي قلبك يحبها عشان تفُك شوية بشوية، بس لما تلاقيها هديت ورضيت عنك اتكلموا في اللي كان مزعلها متعملش عبيط. وإلا متبقاش تتخض لما تلاقي إن في أول خناقة المشكلة القديمة اتفتحت تاني وإنها بتزعل كل مرة على نفس الأسباب.

اكتبلها

واحدة من الطرق اللي بتجيب نتيجة مع الستات إنك تكتبلها، صالح حبيبتك برسالة، مش مهم طويلة وللا قصيرة المهم إنها تكون من القلب، الكلام الصادق بيوصل ويحقق هدفه بأقل مجهود، جرَّب وبجد مش هتندم. أما بقى لو مش ناوي تعمل أي حاجة من اللي فوق دول إنت حُر، بس مترجعش تشتكي في الآخر ولا تتقمص وتستناها هي اللي تصالحك عشان كرامتك وجعتك إنها مخاصماك والسبب إن أنت مضايقها!

 

المقالة السابقةخبز شم النسيم
المقالة القادمةعملية فصل
امرأة ثلاثينية متقلبة المزاج، أعشق الرقص على السطور كتابةً، أُحب الفن بمختلف أنواعه وأعيش عليه. والآن كبرت وصار عليّ أن ألعب في الحياة عشرات الأدوار طوال الوقت، لأستيقظ كل صباح أُعافر حتى أستطيع أن أُحاكي بهلوانات السيرك فأرمي الكُرات المُلونة بالهواء ثم ألتقطها كلها في آنٍ واحد.

ترك الرد

الرجاء إدخال تعليقك!
الرجاء إدخال اسمك هنا