أحيانًا بتحطك الظروف في محيط شخص مصاب باضطراب كرب ما بعد الصدمة، وبتختلف درجة قرب أو بعد الشخص عنك، ودرجة اهتمامك ووجود ضرورة للتعامل مع الشخص ده من عدمه، لذلك إذا كنت واحد من اللي الظروف اضطرتهم للتعامل مع شخص مكروب باضطراب ما بعد الصدمة، “نون” بتقدملك عشر نصايح تساعدك وتساعده على تخطي الأزمة، لأنها غالبًا مش هتكون أزمته لوحده.

1. التفهم

أول خطوة عشان تكون مفيد للشخص اللي قدامك وحابب تساعده، لازم تتفهم حالته، متتضايقش منه ولا تغضب من تصرفاته اللي ممكن تكون مزعجة ليك. المرض النفسي عادة بيقترن بأعراض سخيفة بتخلي الناس اللي حوالين الشخص المريض تتخنق وتبعد عنه، وبتفقده الدعم والحب، وبالتالي الحالة بتسوء والخسارة بتكون أكبر، لذلك مينفعش نستهين بفكرة التفهم، وبخطورة النظرة السلبية للمريض النفسي عمومًا، لأن النتايج بتكون أسوأ مما نتخيل، وبتعود علينا عاجلاً أو آجلاً، وفي إطار خطورة التفهم، لازم كمان نفهم يعني إيه اضطراب كرب ما بعد الصدمة كويس، الأعراض وكثافتها وإمتى لازم نلجأ لطبيب.

اقرأ أيضًا: ما هي أعراض كرب ما بعد الصدمة

2. التقدير والقبول

تقدير المريض النفسي مسألة مش سهلة، خصوصًا إنه هو شخصيًا تقديره لنفسه بيكون منخفض، وسط ضغوط الحياة وصعوبتها، التقدير والتقبل أحيانًا بيكون رفاهية، لأن الأوضاع بتكون مفروضة عليك لو كنت شخص مضطر للتعامل مع مريض كرب ما بعد الصدمة، لكن خطوة التقبل والتقدير بتقطع مسافة كبيرة عشانك إنت شخصيًا، تكون نفسيًا مرتاح وقادر على التعامل، خصوصًًا لو كان الشخص المذكور مستثار ومتنرفز طول الوقت. الموضوع مش سهل، لكن مش مستحيل، محتاج منك كشخص داعم ومحب استعداد نفسي ورغبة صادقة في المساعدة.

3. متستفزهوش

الدكتور جمال فرويز استشاري الطب النفسي وأمراض المخ والأعصاب، بينصح بإن خطوة عدم الاستفزاز مهمة جدًا، كخطوة أولى للتعامل مع مصاب الصدمة، الطبيب اللي رسالة الدكتوراة بتاعته بالكامل عن اضطراب كرب ما بعد الصدمة عند جنود حرب أكتوبر، واللي فضل متابعهم لمدة 20 سنة بعد الحرب، بيقول إن مصاب كرب ما بعد الصدمة بيفتكر الذكريات السيئة، وبيستعيدها مع كل حدث مشابه، بتبدأ تجيله ضربات قلب زيادة ورعشة شديدة في الإيد وزغللة، ومعدته تقلب ويجيله كوابيس لأيام بعد ما يشوف الحدث المشابه، وأحيانًا بيوصل الموضوع لمرحلة التبول اللا إرادي، كل دي حاجات ممكن تلافيها لما تكون فاهم كويس المثير اللي بيغضب مصاب كرب ما بعد الصدمة، متذكرهاش قدامه ولو على سبيل الهزار، كلامك عن الحادثة والحوادث المشابهة مش هيخليه يألفها، لكن هيخليه يغضب أكتر ويفتكر حاجات سيئة.

4. ابعده عن المكان المنكوب

كونك قريب من شخص عنده اضطراب كرب ما بعد الصدمة، بيخليك عارف كويس المكان اللي حصل فيه الحادثة، وبالتالي دورك إنك تبعده على قد ما تقدر عن المكان ده. الدكتور جمال فرويز بيأكد أهمية النقطة دي كحل من الحلول الأولى والأساسية، لمساعدة مريض كرب ما بعد الصدمة، على تخطي المشكلة.

لو الحدث كان عربية اتقلبت، حاول تجنبه أصوات العربيات أو إنه يكون في مكان نسبة الحوادث فيه عالية، أي احتكاك للعجل بالأرض هيرجعله الذكرى تاني، لو حد مكروب بسبب غرق صديق قدام عينه مش صح إنه تخرجه في مكان فيه مياه لأنك بتؤذيه مش بتساعده.

5. طمنه وساعده

“لا بأس.. كل شيء على ما يرام” الجمل الشهيرة في الأفلام الأجنبية اللي بنشوفها، مش مجرد كلمات عابرة الأجانب بيستخدموها وخلاص، في الحقيقة الكلام ده فعَّال وساحر، إنك تطمن شخص خايف وتكون عارف مفتاحه إيه أكتر حاجة بتريحه وتطمنه، وتحسسه إن الدنيا بخير، ده واجبك.

مشهد حلو من مسرحية قديمة بيحبها، ناس بيحترمهم وبيفرحوه نفسه يشوفهم، حضن وطبطبة وابتسامة متفارقش وشك تقوله إن الدنيا بخير. الدكتور فرويز بيأكد الخطوة دي كمان كخطوة أساسية من خطوات المساعدة، إنك تقف مع الشخص وتطمنه وتدعمه وتساعده على حل مشاكله ده بيخلي الأمور تقف عند مرحلة معينة ومتسوءش أكتر. باختصار دي فرامل، نقطة تقدر من بعدها تبدأ من أول السطر في مجموعة إضافية من الخطوات، عشان تساعد الشخص وتخرجه من حزنه وخوفه وتجربته السيئة.

6. حسسه إن مفيش زيه وخليه يتطوع

مش عيب تنفخ فيه، تحسسه إنه بيعمل حاجات رائعة عمومًا، الفكرة هنا إن التعافي من اضطراب كرب ما بعد الصدمة بيدي صاحبه إحساس إنه عاجز، ومبيقدرش يتصرف وشخص بلا فايدة، التعافي مش بيحصل بين يوم وليلة، ولحد ما يحصل الحياة بتكون صعبة ومليانة مشاعر بالعجز وقلة الحيلة. النفخ هنا مش بالكلام بس، لكن إنك توريه قد إيه بيقدر يقدم مساعدة للي حواليه وكمان للناس الغريبة. مش هتصدق الدور اللي ممكن يلعبه التطوع في العلاج، سواء التطوع بالتبرع بالدم، أو بالوقت لمؤسسة قريبة.

7. يروح الجيم

الجيم هنا مقصود بيه الحركة، سواء فعلاُ كانت في جيم أو نادي أو حتى تمشية بهمة لمسافة محترمة. الحركة بشكل صحي مش بس بتخلي الجسم يفرز إندروفين يحسن الحالة النفسية، لكن كمان بيساعد الجهاز العصبي على تخطي الحدث والتحكم في الضغط النفسي الناتج عن الحدث الصادم.

اقرأ أيضًا: أنا أخيرًا رحت الجيم

8. ساعده يتواصل

من مساوئ كرب ما بعد الصدمة، شعور الشخص المصاب إنه فقد قدرته على السيطرة، لذلك واحدة من أنسب خطوات المساعدة إنك تشجعه على التواصل مع الناس اللي بيحبهم، سواء كانوا أصدقاء أو أفراد في العائلة. أحيانًا الانضمام لمجموعة حكي بيساعد الشخص على الشعور بالتواصل وإنه مش لوحده.

9. شجعه على حياة صحية

تقدر تساعد مصاب كرب ما بعد الصدمة بإنك تخليه يبدأ يعيش حياة صحية، ويعتبر اللي حصل مجرد بداية لحياة أفضل، وده يتضمن مساعدته إنه يخصص وقت للاسترخاء، وخلينا نركز على النقطة دي كويس، لأن فيه تقنيات كتير للاسترخاء ممكن البحث عنها باستفاضة، هارفارد بتقدم 6 تقنيات منها.

زي تمرنيات التنفس، والتأمل العقلي، وغيرها من الأساليب المشهورة. كمان لازم تجنب أي شكل من أشكال تعاطي المخدرات أو الكحول، وطبعًا إنه يتبع نمط غذاء صحي، خصوصًا الأكلات الغنية بأوميجا ثري، لأنها بتلعب دور في الصحة النفسية، وينام كويس فترة تتراوح من 7لـ9 ساعات، مش أقل من كده أبدًا وكمان مش أكتر، حاجات تبدو بسيطة لكنها في الواقع بتساعد بدرجة كبيرة.

10. خده للدكتور بانتظام

الحصول على مساعدة طبية مش ترف، ومش حاجة اختيارية في الحالات الشديدة. صحيح بعض الناس نظامهم النفسي قوي بما يكفي إنهم يقدرو يعدوا التروما لوحدهم بدون مساعدة، لكن فيه ناس كتير مبيقدروش للأسف، مش لأنهم ضعفاء لكن أحيانًا الأحداث بتكون أصعب وأقسى من إننا نعديها لوحدنا.

اقرأ أيضًا: تجربتي مع الطبيب النفسي: هل تغيرت حياتي للأفضل؟

أشكال العلاج كتير، منها علاج عائلي، وعلاج دوائي، أو  غير كده، الحصول على مساعدة طبية سواء تضمنت أدوية أو لا، خطوة جيدة جدًا للمرور بأمان من كرب ما بعد الصدمة. البحث عن طبيب نفسي جيد، والانتظام في زيارته واتباع إرشاداته هيساعد مريض كرب ما بعد الصدمة إنه يعدي الأزمة بسلام، وهيساعدك إنت كمان تحس إنك فعال ومهم في مساعدة إنسان كان على وشك الانهيار، وإنك فارق مش موجود وخلاص.