كيف تخلقين حديثًا؟
في علاقاتنا القريبة جدًا، بنحتاج الأسئلة اللي بتشيل التراب من على الجواهر اللي جوانا، وتخلينا نعبر عن نفسنا ونفهم نفسنا بشكل أحسن، ونفهم شريك حياتنا ونحبه ونشاركه أكتر، ونقدر نحس إننا كشركاء في علاقة لينا قيمة فعلاً وبنأثر يوميًا في حياة بعض، بنتكلم وبنسمع بعض كويس.
الحديث اليومي مع شريك الحياة هو اللي بيخلق وينمِّي العلاقة، وبيعمل أسرة وبيت متماسكين، فلما يتحول الحديث ده لكلمتين من نوعية: “إزيك؟” أو “عاملة إيه؟” أو “إيه الأخبار؟” ويبقى ردها: “تمام.. الحمد لله” فإحنا بنقفل باب عظيم لإضافة حياة على يومنا، ومشاركة تفاصيل صغيرة جدًا مع شريك حياتنا، هيقلب الموازين لصالح العلاقة ككل وبكل أطرافها.
تطوير الأسئلة اللي بنسألها لبعض كل يوم هو جزء من تطوير علاقتنا ومشوارنا سوا للأحسن، ويخلي حديثنا وحياتنا ثرية أكتر وغنية بتفاصيل أكتر. بيخلينا نعرف أكتر عن يوم شريك حياتنا والتحديات اللي بتقابله كل يوم، ونقدر نحط نفسنا مكانه ونشوف الأمور من وجهة نظره، وساعتها هنعرفه أكتر ومشكلات كتير هتتحل من قبل ما تبدأ.
لو دورنا هنلاقي أسئلة كتير ممكن نسألها، بقترح عليكم 30 سؤال ممكن نبدأ بيهم، أسئلة تقدر تخلينا نتكلم أحسن.
1- سمعت/ي، قريت/ي، اتفرجت/ي على شيء جديد النهارده؟
2- إيه أحلى جزء في يومك انهارده بتتمنى إعادته؟
3- شربت/ي قهوة بمزاج انهارده؟
4- تفتكر/ي لو مر خمس سنين من دلوقتي وافتكرت/ي النهارده، إيه أكتر مشهد ممكن يكون ذكرى للنهارده؟
5- صورت/ي حاجة انهارده؟ صورت/ي الأولاد واتصورت/ي معاهم؟
6- إزاي أقدر أساعدك وأخلي يومك أحلى النهارده وكل يوم؟
7- لو هتروح/ي رحلة الليلة دي، تحب/ي تروح/ي فين؟
8- لو كسبت/ي مليون جنيه، هتعمل/ي بيهم إيه؟
9- لو يومك ممكن يتحول لفيلم، ممكن يكون عنوانه إيه؟
10- إيه الحاجة اللي أنجزت/يها النهارده ومكنتش متوقع/ة إنك هتعملها؟
11- إيه أكتر حاجة إنت/ي ممتن/ة لحدوثها النهارده؟
12- لو نفسك تضمن/ي وجود حاجة بكرة، إيه هي الحاجة دي؟
13- لو بدلنا الأماكن بكرة وأخدت مكانك، إيه النصيحة اللي تقدمهالي؟
14- إيه أكتر حاجة ضحَّكتك النهارده؟
15- تخيل/ي لو هتلتزم/ي بإنك تتعلم/ي حاجة واحدة لمدة سنة، هتختار/ي تتعلم/ي إيه؟
16- كان نفسك تعمل/ي إيه أكتر النهارده؟
17- كان نفسك تعمل/ي إيه أقل النهارده؟
18- إيه هي أكتر لحظة ممتعة في يومك النهارده؟
19- إيه أكتر حاجة فكرت/ي فيها النهارده؟
20- نفسك في إيه قبل ما اليوم يخلص؟
21- كلمت/ي حد النهارده؟ انبسطت/ي في الكلام معاه؟
22- نفسك تنجز/ي إيه بكرة؟
23- إيه هي القوة الخارقة اللي تتمنى لو تمتلكها النهارده؟
24- إيه أكتر حاجة فخور/ة بيها حصلت النهارده؟
25- إيه أحسن حاجة حصلت النهارده؟
26- إيه الحاجة اللي نفذتها النهارده وتحب/ي تكرارها كل يوم؟
27- إيه أصعب حاجة في يومك؟ وإزاي تم التعامل معاها؟
28- إيه أكتر شيء حسسك بالقلق النهارده؟
29- لو بتفكر/ي تغير/ي حاجة حصلت النهارده، تحب/ي تغير/ي إيه؟
30- لو توصف/ي يومك في تلات كلمات هيكونوا إيه؟
الأسئلة كتيرة وبتختلف من علاقة للتانية ومن أسلوب حياة للتاني، الفكرة كلها بتتلخص في عدم استسلامنا للسكة السهلة، اللي أحيانًا بتوصل العلاقة للملل وإحنا في إيدينا إننا ناخدها لسكة السلامة.
الكلمة نور، وبالكلام بنوصل لبعض. ولما بنسأل الأسئلة الصح بنعرف نوصل.
