مؤخرًا بقيت بهتم بالمكياج، بعد ما كنت بميل لعدم استخدامه خالص، أو يا دوب بكتفي بخط كحل بسيط وليب جلوس، بدأت أقرأ وأشوف فيديوهات على يوتيوب، وأجرب وأعرف أكتر عن شكل ملامحي ولون بشرتي وإيه اللي يناسبني وإيه لأ من نصائح المكياج.
المكياج عالم ساحر، ممكن يبقى صديق للست ووسيلة لإبراز جمالها الطبيعي، وممكن يتحول لقناع وملامح جديدة تنسيها ملامحها الحقيقية وجمالها الطبيعي، زيه زي أي حاجة، إنتي بس اللي بتختاري إنتي عايزة منه إيه.
دي شوية نصائح تجميلية للماكياج ممكن تساعدك في وضع المكياج، سواء كنتي بتفضلي الماكياج البسيط جدًا، أو بتحبي تحطي ماكياج كامل:
نصائح وضع المكياج:
cat eye أو رسمة عين القطة:
من الحاجات اللي بتبقى صعبة التطبيق شوية بالنسبة للمبتدئات، عشان تظبطيها جيبي قطعة شريط لاصق (سولوتيب) الزقيها على ضهر إيدك وفكيها مرتين أو تلاتة عشان تخففي من حدة اللصق عشان متئذيش حوالين عينيكي، وبعدين الزقيها بميل في الزاوية الخارجية للعين عشان تساعدك في رسم الكات آي، كمان لو لسه مبتدئة في استعمال الآيلاينر متستعمليش الآيلاينر السائل، فيه آيلاينر بييجي على شكل قلم وبيكون أسهل كتير في الاستخدام للمبتدئين، ولو عايزة تستخدمي آيلاينر سائل استخدمي نوع فرشته ناشفة شوية مش ناعمة عشان تسهل عليكي التحكم في الرسم.
الكونتور:
ممكن تكوني سمعتي عنه وحابة تجربيه. المساحة هنا مش كافية إني أتكلم عنه بالتفصيل، لكن اللي حابة أقوله لو لسه مبتدئة مش لازم تشتري باليت مخصص للكونتور، استخدمي كريم أساس أغمق من بشرتك بدرجة أو اتنين للكونتور وآخر أفتح بدرجة أو اتنين للهايلايت، أو ممكن تستخدمي بودرة أو كونسيلر.
تحضير البشرة للمكياج
مشكلة جفاف الشفاه:
متحطيش روج وشفايفك مقشرة، خصوصًا لو روج “مات” أو مطفي لأنه بيخلي مظهر التقشير أسوأ ، قبل ما تحطي روج اخلطي مزيج من زيت جوز الهند والسكر وادهني شفايفك وافركيه برقة وخفة شديدة بفرشاة أسنان ناعمة (يفضل لو مخصصة للأطفال) حطي بعدها مرطب الشفاه اللي تحبيه وبعده الروج.
الهالات السوداء:
قبل ما تحطي الكونسيلر اهتمي بترطيب المنطقة اللي تحت العين، استخدمي كريم العين المرطب بانتظام، هيقلل من مظهر الخطوط الدقيقة اللي تحت عينك، لو هتحطي الكونسيلر بصوابعك استخدمي الصباع البنصر لانه أخف واحد في قوة الضغط على المنطقة الحساسة دي، وادمجي الكونسيلر بطريقة التربيت مش الدعك أو الفرك عشان متعجليش بظهور التجاعيد، وكمان عشان لو فيه خطوط دقيقة تحت العين ميظهرهاش بشكل أكبر، حطي الكونسيلر على شكل مثلث تحت العين زي الصورة مش بالطريقة المعتادة ع الهالات بس. ولو الهالات ملونة استعملي (مصحح) باللون المناسب، وأخيرًا ممكن تثبتي الكونسيلر ببودرة شفافة أو بودرة لونها مايل للأصفر، هتنور المنطقة دي.
– مهم تتجنبي الخلطات التجميلية لو مش متأكدة من مدى ملائمتها لبشرتك.
نصائح لوضع المكياج اليومي:
كريم الأساس:
لو عايزة تدي للفاونديشن المطفي مظهر لامع شوية وصحي أكتر، اخلطيه بنقطتين من الهايلايتر السائل قبل استخدامه، وممكن تحطي الهايلايتر على الأماكن المخصصة ليها قبل الفاونديشن (بس يكون فاونديشن تغطيته خفيفة أو بي بي كريم) بالطريقة دي، وشكله هيبقى فيه لمعة صحية تنفع للنهار.
أحمر شفاه ثابت:
لو عايزة تحافظي على ثبات الروج ﻷطول وقت ممكن تحطي على شفايفك طبقة من كريم الأساس قبل الروج، واستخدمي محدد بنفس درجة لون الروج (متحطيش درجة مختلفة؛ التسعينات مرجعتش تاني) بعدها حطي الروج عادي جدًا، بكده تضمني ثبات الروج وتضمني إن لونه الحقيقي يظهر، لأن بعض الدرجات بتتأثر بصبغات الشفايف ولونها بيظهر متغير، التحديد كمان هيساعد إن الروج يفضل جوة حدود شفايفك وميتسربش في الخطوط الدقيقة اللي حوالين الشفايف، وبكده يبان شكله أجمل.
إخفاء عيوب البشرة:
– تجنبي استخدام الإضاءة أو الهايلايتر اللامع في أماكن العيوب في بشرتك، زي المسام الواسعة أو الخطوط الدقيقة، لأنها بتبرزها أكتر.
نصائح مكياج العين
لو عايزة عينك تبان أوسع استعملي قلم عيون بيج على خط الرموش السفلي.
– الآيشادو شكله تحفة في العلبة بس مش باين على الجفن؟ استخدمي آيشادو برايمر، بيساعد على تثبيت اللون وتوضيحه، عايزة بديل أسهل؟ هاتي قلم عيون أبيض بس يكون ناعم واستخدميه على جفن العين كقاعدة أو أساس للآيشادو، هيخلي اللون أوضح.
– لو قلم الكحل بتاعك ناشف شوية وبتلاقي صعوبة في استخدامه مرري سن القلم على شعلة كبريت أو ولاعة لثواني واستني لحد ما يبرد خالص واستعمليه بالطريقة المعتادة.
– أسهل طريقة لعمل مكياج عين سموكي وبقلم الكحل من غير آيشادو، ارسمي علامة الهاشتاج# على الزاوية الخارجية للعين زي الصورة و ادمجيها كويس جدًا.
– الحواجب من الحاجات اللي بتفرق جدًا في شكل المكياج، استعملي الطريقة اللي تفضليها سواء القلم أو البودر أو الواكس في رسم الحواجب، يفضل يكون الرسم خفيف عشان تبان طبيعي، لو شعرك غامق استخدمي لون للحواجب أفتح من لون شعرك، أما لو شعرك أشقر فاستخدمي لون أغمق للحواجب، عشان تبرزي منطقة تحت الحاجب أكتر، ممكن تستخدمي هايلايتر لامع خفيف على عضمة الحاجب تحت الحاجب بالظبط، أو لو لمظهر صباحي طبيعي أكتر استخدمي قلم عيون وردي مطفي وارمي بيه قوس تحت الحاجب على عضمة الحاجب وادمجيه كويس جدًا بطرف صباعك.
– لو عينيكي مرهقة أو مش نايمة كويس، جربي تحطي الماسكارا على الرموش العلوية بس، وتجنبي وضعها على الرموش السفلية.
– لو تحت عينك منتفخ بس ومعندكيش هالات غامقة، استخدمي درجة كونسسيلر أغمق من لون بشرتك بدرجة، اللون الغامق هيدي إيحاء إن الانتفاخ أقل، لكن الفاتح هيبرزها، ودي غلطة كتير مننا بيقع فيها.
