بقلم/ مروة محمود
1- حلم الهجرة
سعيت كتير -وخصوصًا في بداية هذا العام- للهجرة والتعليم والاستقرار في الولايات المتحدة الأمريكية، سلكت كل الطرق المشروعة، قدمت وامتحنت واترفضت، وانتظرت في قائمة انتظار لحد أغسطس وبرضه آوت.
2- حلم الوظيفة
أيوة بقالي 8 سنين متخرجة، ومستقرتش في مكان واحد، فيه هدف محدد لمكان يكبر ونكبر سوا، لشغلانة يبقى فيه حب متبادل بيننا، صحيح تخصص علاقات عامة وبحب البشر، بس في مصر ميعرفوش يعني إيه علاقات عامة ولا أي معلومة عن الفلسفة.
3- حلم الاستقرار والخصوصية
طول عمري بحلم بيها، ولا مرة حصلت، إن عادي جدًا إني أنزل في فندق لوحدي، أو أعيش في بيت لوحدي، مش اكتئاب ولا حاجة، حلم خصوصية واستقرار البنات ممنوعة منه.. هنا القاهرة.
4- حلم الكرة الأرضية
من وأنا طفلة بحلم يكون ليّ صديق من كل بلد، كنت بحب أقرأ أصدقاء المراسلة في أي مجلة وأنا صغيرة، حلم إني ألف الكرة الأرضية عمره ما سابني من صغري، ده بيكبر جوايا، بس فين المصاري؟!
5- حلم كتاب عليه اسمي
مع أول شهور السنة كان عندي فكرة حلوة لمشروع كتاب حلو، مش عارفة راحت فين، بس الفكرة لسه في دماغي.
6- حلم الأمومة
البنت بتتولد أم بالفطرة، غصب عنها بتهتم بعروستها وتحضنها وترعاها صبح وليل، وبتفضل البنت أم بالقوة إلى أن تصير أم بالفعل.
7- حلم البيت الكبير
بيت بجنينة خضرا، بيت كل طوبة فيه بتشيل حلم من أحلام السنين، خصوصية ودفا وحنية وعيلة.
8- حلم مشروع العمر
مشروع ميكونش شبهه أي مشروع اتعمل قبل كده، فكرة لن أعيش في جلباب أبي يعني، يكون وليد تصوري أنا، مشروع يكون أنا.. دكان أنتيكات زمان.
9- حلم حياة بلا حروب
دايمًا بسأل نفسي هيحصل إيه لو الدنيا من غير صراعات ونزاعات وحروب ودم! حلم السلام عمره ما فارقني، بحلم بعالم من غير لون الدم.
10– حلم السلام الداخلي
إنك تتصالح مع نفسك وتمرّنها وتروّضها كمان، أمر ليس بهيّن على الإنسان، محتاج دراسة دايمة لمعرفة نقاط السلب والنقصان.
11– حلم إلغاء وسائل التواصل الاجتماعي
صحيح جعلت العالم أصغر، لكنها جعلته ممل ومليان جحود وجمود، الحياة كانت أبسط وأحن قبل أي إنترنت وقبل وسائل الاتصال الحديثة.
12- حلم حل مشكلة الزحمة
الزحمة والتكدس مشكلة عالمية، فيه اللي قدر يحلها أو يخلق للمشكلة حلول، وفيه اللي لسه بياخد في المشوار ساعات كتير ومجهود عصبي وذهني أعظم.
13– حلم البنت زي الولد
حلم بتعيشه كل بنت في بلادنا العربية، البنت كائن زي أي كائن على الأرض، كائن عاقل مدرك واعي مسؤول، قادر يحقق أحلام مش بس يحلم، مسؤول تعمير الأرض الأول، خلق الله حواء للسكن والسكينة، ورغم كل التحضر لسه بتعتبر كمالة عدد، وفرد غير مؤثر وغير فعّال، لأنهن ناقصات عقل ودين.
14– حلم السعادة الدايمة
إنك تملك اليقين الدايم إن لا حزن دايم ولا فرح دايم، يمكن يساعدنا على السعادة الدايمة، والوجه اللي دايمًا مبتسم وراضي.
15– حلم الحفاظ على حلاوة أول مرة في كل حاجة
السؤال الأبدي: ليه لا نملك مقومات الحفاظ على حلاوة ورونق المرة الأولى؟
