سبتمبر على الأبواب، وده معناه رجوع الدراسة، بس فيه بنات هتنتقل من المرحلة المدرسية للمرحلة الجامعية، يبقى لازم تستعدي بدولاب ملابس يقدر يصمد معاكي في المرحلة دي. عشان تبدئي في تكوين دولابك من أول وجديد، فيه شوية أساسيات لازم تخلّيها في دماغك.
- الجينز
كلمة السر في اللبس العملي، لازم يكون عندك على الأقل بنطلونين جينز، واحد غامق وواحد فاتح. ولو لبسك كله جيبات يبقى الجيبة الجينز لا بديل عنها طبعًا جنب جيباتك القطنية. كمان الشيميزات والكارديجان الجينز رجعوا موضة تاني، فضروري يكون عندك منهم على الأقل واحد.
تعرفي على: أسرار جمال البنت الفلات
- الكارديجان
يكون عندك في الدولاب بألوانه الأساسية، الأبيض والأسود والبني أو البيج، لإنهم غالبا بيليقوا على أي توب عندك، سواء كان سادة أو منقوش.
- التوب والشيميز
هاتي 2 أو 3 سادة، بيتلبسوا بأكتر من طريقة على أكتر من طقم، وبتقدري بيهم تحوّلي الطقم لكاجوال أو سيمي كلاسيك.
- التوب المشجر
أكيد لازم يكون في دولابك طقمين مشجرين، والأحسن إنك تجيبي على كل واحد أكتر من إيشارب سادة يليق عليه، تغيير الإيشارب على نفس الطقم بيخليكي كأنك لابسة طقم مختلف.
اقرئي أيضًا: القميص الأبيض ينفع مع البنطلون الأسود
- المعصم
لو إنتي محجبة خلي في دولابك احتياطي معصم أبيض وأسود زيادة عن احتياجك. لإنهم بينفعوا لو لقيتي طقم عجبك وكمه قصير شوية أو واسع شويتين.
- الجزمة
أحسن حاجة للكليات -بالذات العملية- إنك تجيبي حاجة فلات ومريحة لرجلك، سواء كانت صندل أو جزمة مقفولة أو كوتشي خفيف. وبينزل منها على طول أشكال جديدة وغير تقليدية بالمرّة.
- الكلاسيك
متنسيش تضيفي لدولابك طقمين كلاسيك وفستان شيك، لإن المرحلة الجامعية معناها إنه هيطلعلك مناسبات من تحت الأرض وكلها فجائية، فكوني متحضرالها كويس.
- الألوان
لازم كمان لبسك يكون معبّر عن شخصيتك، يعني لو إنتي هادية أكيد هتميلي لستايل لبس هادي، ولو إنتي صاخبة وبتتكلمي كتير وبسرعة ومنطلقة ومحبّة للحياة، ده أكيد برضو هينعكس على ألوانك، بس المهم إزاي تختاري الألوان.
في الألوان فيه حاجتين مهمين، دايرة الألوان وأقسام الالوان
دايرة الألوان:
- متلبسيش لون مع اللون المقابل له في الدايرة، الأحسن إنك تختاري اللون اللي قبل أو بعد اللون المقابل بدرجة واحدة. يعني لو هتلبسي لبني، اللون المقابل هو البرتقالي الغامق، فأحسن لون يمشي مع اللبني هو الأحمر أو البرتقالي الصريح.
- لو لبستي 3 ألوان متتالية هيليقوا على بعض. والأحسن من كده إنك تلبسي لونين متتاليين ومعاهم لون حيادي.
أما الألوان عامة بتنقسم لـ4 أقسام:
- حيادية (أبيض وأسود).
- دافية (أحمر وأصفر وبرتقالي).
- باردة (أزرق وأخضر).
- حيادية دافية (بني ورمادي).
- يفضّل متلبسيش لونين مختلفين من نفس القسم (إلا في حالة الألوان الحيادية).
- لو لابسة طقم أسود في أسود، متلبسيش عليه بني.
- متمزجيش بين أكتر من 3 ألوان في الطقم الواحد. إلا طبعا لو كان فيه قطعة منقوشة أو مشجرة.
- متلبسيش ألوان فاتحة مع بعضها، بس البسي لون فاتح مع لون غامق.
- الألوان الحيادية الدافية بتليق أكتر مع الألوان الباردة. بس ممكن تظهريها بشكل بسيط مع الألوان الدافية.
افتكري دايمًا إن الأكسسوارات الكبيرة زي الجزمة والشنطة، ألوانهم بتكمّل الطقم بتاعك، وإنهم مش لازم أبدًا يكونوا أسود أو بيج، بالعكس التغيير في أحجامهم/ أشكالهم/ ألوانهم بيدّوا روح مختلفة للطقم. أما بقى الأكسسوارات البسيطة زي السكارف والحزام، لحد الحلق والخاتم والسلسلة، بيقدروا يشقلبوا الطقم بالكامل في كل مرة تكوني عايزة تحسي بالتجديد من غير ما تغيّري في الهدوم نفسها.
أكيد طبعًا لكل قاعدة فيه استثناءات، بتلبس ألوان مطرقعة برة دايرة الألوان أساسًا، والقواعد بتقول إنهم ميمشوش مع بعض، بس حاولي متكونيش الاستثناء ده غير لو إنتي متأكدة إنتي بتعملي إيه، وإن اللبس على بعض في الآخر طالع لايق على بعضه وشكله لطيف، حتى لو كان مظهر غير اعتيادي أو تقليدي.
وحاولي طبعًا تنزلي في أول مواسم التخفيضات، عشان تعرفي تلاقي كل المقاسات والألوان موجودة، وتقدري تشتري اللي نفسك فيه من غير ما تدفعي مبلغ كبير على الفاضي. وأهم حاجة، البسي دايما الحاجة اللي إنتي مستريحة فيها وبتحسي إنها بتعبّر عن شخصيتك، وخلّي ملابسك تحكي عنك من غير ما تتكلمي.
