كتير مننا بيحبوا يدخلوا المطبخ ويعملوا كوكيز أو بسكويت أو كيكة، لو هيّ مرة بتتكرر كل فترة طويلة غالبًا بنلاقي احتياجاتنا في الأدوات اللي حوالينا. لكن لو ناوية تُبدعي في عمايل المخبوزات والحلويات، يبقى لازم تجيبي شوية أدوات أساسية تساعدك وتسهّل عليكي الموضوع، دي أهم الأدوات الأساسية اللي لازم تكون في مطبخك لو ناوية تخبزي كتير.
- الفرن:
أولًا.. اتأكدي إن الفرن بتاعك كويس وإنه مبيطفيش لوحده، وإن الحرارة اللي بتكون موجودة على المؤشر هي حرارة الفرن الفعلية. كمان تتأكدي إن تايمر البوتاجاز شغّال. لزيادة الأمان ممكن تجيبي تايمر وترمومتر فرن منفصلين.
- مكاييل القياس
دلوقتي بتتباع في كل مكان مكاييل الأكواب والملاعق، سواء كانت بلاستيكية أو معدنية. كمان مهم يكون عندك مقياس للمواد السائلة زي الزيت واللبن والماء، وده المكيال بتاعه بيكون متحدد بالملليلتر.
تعرفي على: استخدامات الميكرويف: 14 شيء لا توضع في الميكرويف
- ميزان
لازم يكون عندك ميزان في البيت، سواء كان عادي أو ديجيتال، لأن مؤخرًا بقى فيه وصفات كتيرة بتتعامل بالجرامات مش بالأكواب، فكوني مستعدة.
- بولة
ضروري يبقى فيه عندك أكتر من بولة بأكتر من حجم، عشان يبقى عندك حرية في اختيار المقاس المناسب لكمية المكونات اللي هتستخدميها، فمتكونش كبيرة من غير لزمة أو صغيرة ويبقى صعب التقليب فيها.
- سباتيولا spatula
دي من أكتر الأدوات المفيدة في المطبخ، السليكون منها بتستحمل درجات الحرارة العالية لو قلّبتي بيها على النار، وكمان بتتغسل بمنتهى السهولة وممكن تتحط في غسالة الأطباق. أما السباتيولا المعدن فبتكون مفيدة لما بتعوزي تطلّعي الكوكيز مثلاً من الصينية، وفيه كمان السباتيولا المنحنية، ودي بتكون مفيدة في توزيع الكريمة وخلافه على سطح الكيكة.
- نشّابة
النشّابة أو الـrolling pin، وفيه منها بلاستيك وسليكون وخشب، اللي بتستريحي فيها هاتيها، بس لو لسه مش عارفة هتستريحي في إيه يبقى هاتي الخشب الأول.
- منخل
المنخل ده لا غنى عنه أبدًا، وله أشكال كتيرة، وفيه منه اللي له إيد بتتحرك وينخل لوحده، وممكن تستغني عنه لو عندك مصفاة سلك كبيرة، بس بشرط إنك متسخدميش المصفاة لأي أغراض تانية.
- صواني
مهم جدًا يكون عندك مجموعة مختلفة من الصواني، وعلى حسب إنتي مخططة من الأول عايزة تخبزي إيه، يعني لو كيك يبقى لازم يكون عندك صواني عميقة مختلفة الأحجام وبتتراوح بين مدوّرة ومستطيلة. أو لو هتخبزي كوكيز وبسكويت أو خُبز يبقى يلزمك الصواني اللي ملهاش عمق (شبه بتاعة البيتزا)، أما لو ناوية على الفطاير pies يبقى هاتي اللي القاعدة بتاعتها متحركة. وفيه كمان الصواني الأشكال المختلفة والقوالب اللي بيتعمل فيها الـloaf، وطبعًا متنسيش صواني الكب كيك.
- فرشاة
الفرشاة مهمة للتوزيع أو لتنضيف سطح المخبوزات من الدقيق، فيه منها أنواع كتيرة ومختلفة. الفرشاة العادية اللي لها شعر كثيف هي الأفضل في الاستخدام بس بتكون أصعب في الغسيل، بينما الفرشاة السليكون بتكون أسهل جدًا في غسيلها.
- العجّان
هو بطل الحكاية، و صعب جدًا تعرفي تخبزي من غيره، بنصح باستخدام العجّان الثابت لأنه احترافي أكتر وله أكتر من قطعة على حسب إنتي بتخبزي إيه، لكن لو مش في مقدورك إنك تجيبيه يبقى هتجيبي العجّان الصغير المتحرك أو المضرب الكهربائي العادي. وطبعًا العجّان الكهربائي مينسّكيش تجيبي المضرب اليدوي، ويستحسن تجيبي الحجم المتوسط.
- ورق الزبدة
يفضّل دايمًا يبقى فيه رول ورق زبدة parchment paper عندك في البيت، ده صديقك اللي متقدريش تستغني عنه، بيريّح عليكي كتير في غسيل الصواني، وبيحفظلك المخبوزات من إنها تتحرق.
- شبك التبريد
ده شبك بيتحط عليه المخبوزات بعد ما تهدا شوية في صينيتها من حرارة الفرن، ميزته إنه الهوا داخله من كل حتة فبيعمل تبريد متساوي.
- كيس الحلواني
لطيف واستعماله سهل ومش غالي، بس ضروري في أي مرة هتحبي تزيني فيها تورتة أو تكتبي على الكوكيز أو حتى تعملي بلح الشام والإكلير.
- التخصصات
لو ناوية متعمليش غير صنف واحد هو اللي هتركزي فيه، يبقى لازم تجيبي بقية مستلزماته وكمالياته، يعني مثلًا لو هتشغلي في الكوكيز كتير يبقى أكيد لازم قطّاعات كوكيز مختلفة الأشكال والأحجام، ولو بتحبي ماكينة البسكويت يبقى لازم تكون عندك، أما بقى لو هتستعملي عجينة السكر (الفوندان) لتزيين التورت فيبقى لازم تجيبي أداة تنعيم وفرد الفواندان على الكيك.
ومتنسيش تقرأي المقادير كويس جدًا قبل ما تبدئي في تحضيرها، عشان تتأكدي إن مفيش حاجة ناقصاكي سواء من المكونات أو الأدوات. وأهم حاجة تتأكدي إنك مش هتشتغلي وإنتي متضايقة أو زعلانة، واعرفي كمية الحب اللي بتشتغلي بيها، اللي كل ما كانت أكتر كانت الوصفة أروع.
تسلم إيديكي مقدمًا وبألف هنا وشفا.
