الحب عند الأطفال واللغات التي يستخدمها في التعبير عن حبه

– ماما إنتي بتحبيني؟

– أيوة طبعًا!

– ليه؟!

هنا بقى بتبدأ الإجابات تختلف. فيه اللي هتقول عشان بتسمع الكلام، أو عشان بتخلص أكلك، أو عشان بتاخد بالك من إخواتك، أو عشان بتجيب درجات كويسة في الامتحان، أو حتى عشان ساعدتني في تنضيف البيت.

الإجابات اللي فوق دي بيسموها الحب المشروط، يعني أنا بحبك لسبب معين، ولو زال السبب ده أو معرفتش تحققه، أو غلطت في مرة، معناه إني مش هحبك. ودي تعتبر من أسوأ الرسايل النفسية اللي بيحس بيها البني آدم عمومًا، والطفل خصوصًا، لأنها -ببساطة- بتوصل له معلومة معناها الوحيد: أنا بحبك لسبب لازم تفضل محافظ عليه، وتعمل كل جهدك للوصول له لو عاوز حبى ليك. حاجة كده شبه المقايضة. الطفل يعمل حاجات كويسة فيكون المقابل الحب.

الحب غير المشروط

الحب السليم، أو بمعنى أدق اللي بينتج عنه الأطفال الأسوياء نفسيًا هو الحب غير المشروط، والنوع ده بتعرفه الدراسات بأنه نوع الحب الذي يظهر للطفل أيًّا ما كان، بغض النظر عن شكله أو إمكانياته أو قدراته أو إعاقاته، وبغض النظر عما نتوقع أن يصبح عليه في المستقبل، وبغض النظر عن كيفية تصرفه.

إزاي أحب ولادي؟ وإزاي أحسسهم بالحب؟

الإجابة المنطقية إن كل الآباء والأمهات الأسوياء فطريًا بيحبوا أطفالهم، بس للأسف مش كل الأطفال بيحسوا إنهم محبوبين، وده ممكن يكون لأسباب كتيرة، منها مثلاً اعتقاد الآباء إن الشدة بس واللي ممكن توصل للقسوة هي الطريقة الأفضل للتربية، ومنها كمان جهل الآباء والأمهات بلغة الحب عند أطفالهم.

اقرئي أيضًا: أجمل كلام عن طفل صغير، أجمل عبارات عن الأطفال

لغات الحب الخمسة

فيه خمس لغات للحب، بمعنى إن الخمس لغات هما اللي البشر بما فيهم الأطفال بيستخدموها للتعبير عن حبهم، وكمان بيستقبلوا بيها الحب:

1. التلامس الجسدي

ودي تعتبر أول طريقة بيفهم بيها الرضيع الحب. والدراسات بتأكد إن الأطفال الرضع اللي بيتم احتضانهم والتربيت عليهم وتقبيلهم بيكونوا أكثر صحة، من الأطفال اللي أهلهم بيهملوا التواصل الجسدي معاهم. وطبعًا هنا مش محتاجين نأكد إن نصيحة “سيبيه يعيط” دي بتكون أول مسمار بيتدق في نعش الأمان، اللي المفروض يحس بيه طفلك من أهله.

2. كلمات التوكيد

يعني كلمات التشجيع والمديح، ودي ممكن نبتدي نستخدمها من أول ما الطفل يبدأ يزحف أو يعمل أي نشاط أو حركة جديدة، حتى لو مش هيفهم المعنى الحرفي لكلامنا، لكن أكيد الإحساس هيوصله. بس مش لازم تستخدمها على أفعال اعتيادية، عشان متفقدش معناها واستقبال الطفل ليها يقل.

3. الوقت النوعي

وده معناه إنك تقضي وقت مع الطفل. بمعنى إن تركيزك كله يكون للطفل، يعني الوقت اللي في العربية وإنت بتوصله التمرين وطول السكة الموبايل على ودنك ده مش وقت نوعي. الوقت اللي مع طفلك بيحصل فيه تواصل بصري، وانتباهك ومشاركتك بكل حواسك للطفل وكلامه وحكاياته.

4. الهدايا

ودي معناها إنك تجيب هدية لطفلك بدون مقابل، يعنى مش مقابل نجاحه مثلاً أو عشان فاز ببطولة جديدة، لكن من غير أي سبب إنت افتكرته واشتريت هدية.

5. أعمال الخدمة

معناها الخدمة اللي بنقدمها لعيالنا عشان نساعدهم في تيسيير أمور الحياة عمومًا، من أول تحضير ببرونة للرضيع أو مساعدة طفل عمره 3 سنوات في تغيير لبسه. لازم هنا نفرق بين أعمال الخدمة وإننا نخلق أشخاص اتكاليين مش بيتحملوا المسؤولية. يعني مساعدة طفل عنده سنتين في الأكل غير لما تساعد طفل عنده 6 سنوات، والاهتمام بترتيب السرير لطفل عنده 4 سنوات غير ترتيب السرير لشخص عنده 13 سنة.

إزاي أكتشف لغة الحب عند طفلي؟

1. راقب الطفل واعرف إزاي بيعبر عن حبه لك، يعني لو بيحب يحضنك كتير يبقى لغة الحب التلامس الجسدي، لو بيفرح لما تقوله كلام إيجابي يبقى لغة الحب كلمات التوكيد. وراقب كمان إزاي بيعبر عن حبه للناس اللي حواليه مع إخواته وأصحابه.

2. خيَّره بين أمرين تكون قادر على تنفيذهم، وشوف هيختار إيه. مثلاً لو إنت عندك وقت فاضي خيَّره بين إنك تقعد معاه تلعب أو إنك تساعده في ترتيب كتبه، واعرف هيختار إيه.

العقاب ولغات الحب

أهم فايدة إنك لما تعرف لغة الحب لطفلك، هي إنك تعرف إزاي تحسسه إنه محبوب، لكن كمان هتساعدك في تحديد طريقة العقاب، بإنك تبعد تمامًا عن استخدامها كوسيلة للعقاب. مينفعش تكون لغة الحب لبنتي التلامس الجسدي ولما تغلط يكون العقاب إني أبطل أحضنها، لأن ده يعتبر حب مشروط، وهيوصل لها رسالة سلبية، معناها إنها مش محبوبة لنفسها، لكن أفعالها هي اللي بتعجبني.

أخيرًا العلماء بيقولوا إن الإجابة النموذجية لما طفلك يسألك ليه بتحبني؟ هى إنك تقوله: لأنك ابني.

المصدر: كتاب لغات الحب الخمس التي يستخدمها الأطفال.

اقرأ أيضًا: كيف نستخدم الحب كأداة للسيطرة على أطفالنا؟