أنا اتخطبت، آه وربنا، ويا دبلة الخطوبة عقبالنا كلنا وكدة، بس لو انتوا فاكرين إن خطوة الخطوبة دي كانت سهلة أحب أقولكوا كلا البتة، إطلاقاً مطلقاً، دي “قصص” كفاح مش جاية ع المرتاح، بصلها بابتسامة وادعيلها بالسلامة، دي مش كتر مال دي عند في الأندال”.
خطوبتنا كانت أسطورة سوف تتحاكى بها الأجيال (عديها عشان خاطري) وهفضل أحكي لعيالي لو جبت عيال قد إيه أمهم وأبوهم تعبوا عشان يتخطبوا، والدنيا كانت ملطشة معاهم ازاي، وكم واجهوا من صعاب وعراقيل وكدة يعني.
بس أنا في المقال ده، مش هحكي حكايتي الشخصية، أنا هحكيلكوا عصارة تجربتي وخبرتي في رحلة كفاح شعب طيبة المسماة خطوبة إنجي ومحمد.
عشان تتخطبي، لازم تمري بكذا مرحلة، زي بالظبط مراحل الفلتر بتاع الميا كده، في فلتر سبع مراحل وفي فلتر عشر مراحل وفي فلتر خمس مراحل، أنا جايبة لكوا عرض الفلتر الخمس مراحل.
خمس مراحل في لعبة الخطوبة، خمس مراحل عشان تقابلي الوحش وتروضيه وتاخدي التاج بتاعه تقسميه مع شريكك وتعملوا منه دبلتين، خمس مراحل عشان تبتدي الحكاية.
Level 1
وساعات في كلام بيجيب ف كلام واضحك واشتاق وأخاف
المرحلة اللي كل العلاقات بتمر بيها، بتقابل شخص ما تحت أي ظرف، بتبتدوا تتكلموا تحت أي مبرر، تتقابلوا عشان تتأكدوا من الفراشات اللي بتطير في القفص الصدري لما تشوفوا نمرة الطرف التاني ع الموبايل.
مرحلة التعارف هي أهم مرحلة، متتكلفيش، مش لازم تاكلي البيتزا بالشوكة والسكينة لو انتي متعودة تاكليها بإيدك، ومش لازم تحطي الشاليموه في كان البيبسي لو انتي متعودة تشربيها من غيره، هو كمان مش مضطر إنه يبهرك يعني، لو جه في أول مقابلة لابس في رجليه سليبر عشان بيريحه يبقى شخص صادق غالباً، مش لازم ينزل يشتري كوتشي ماركة عشان تحسي إنه مهتم.
Level 2
الاعتراف سيد الأدلة
خلاص اعترفتوا؟؟ مبروك، كدة اللعبة ابتدت تبقى مثيرة، لسة مبقتش صعبة بس المفاجآت ابتدت، هتفاجئي نفسك بكم الهلاوس والمخاوف اللي هتواجهيها، خاصة لو حياتك مكانتش رحلة في ديزني لاند.
مرحلة الاعتراف هي المرحلة اللي بتحدد هتكملوا وللا لا، لو لقيتي المسئولية كبيرة عليكي ويالهوي ايه اللي بيحصل دة ايه اللي انا شايفه دة، قدامك حل من اتنين، يا تستسلمي وتقولي مش لاعبة، يا تكملي اللعبة وتبقي قوية كفاية إنك تواجهي المخاوف.
عارفة إيه أحسن حاجة في المرحلة دي؟؟ الحلو في المرحلة دي إنك مش بتضطري تلعبي لوحدك، بيكون في طرف تاني شريك في اللعبة، بتبقوا فريق، لو واحد فيكوا تعب التاني هيكمل بداله.
النصيحة الوحيدة في المرحلة دي، سيبيه يكمل بدالك لما تتعبي.
Level 3
اتقدم تااااراااااا راااااا.. اتقدم تاااااااارااااااااااراااااااا
في المرحلة دي غالباً الصعوبات بتبتدي، خلاص انتوا قررتوا إنكم بتحبوا بعض، وكنتوا شجعان كفاية إنكم تعترفوا بده وتبتدوا العلاقة، المرحلة دي بقى هي المرحلة المفضلة للدنيا في تطليع ميتين أي اتنين بيحاولوا يعيشوا حياة سعيدة.
هتلاقي الدنيا زنقت، الظروف عمالة تتوحش، الفلوس بتخلص، الأزمات بتطلع من تحت الأرض ترقص قدامكوا رقصة الانتصار، كل حاجة بتتكعبل.
في المرحلة دي، مينفعش توقفوا لعب، ده لو انتوا بتحبوا بعض فعلاً يعني، تعالي نتخيل إنك بتلعب أي لعبة لو ف نصها في وقت الذروة، الدنيا زنقت عليك قمت موقف لعب، هترجع تلاقي نفسك مش عارف تكمل ومش عارف أنت كنت واقف إزاي وإيه هي الاستراتيجية اللي أنت كنت بتلعب بيها.
في المرحلة دي الاستسلام معناه إنك هتبتدي لعب من أول وجديد، بس خد بالك، الطرف التاني كمان مستنزف ومستهلك ومش قادر، زيك بالظبط، لو سبته في نص المعمعة اللعبة هتبوظ.
Level 4
جوايز للشطار للشطار للشطار.. وهدايا للشطار للشطار للشطار
لو عديتوا Level 3 أبشروا، المرحلة اللي بعد كدة بيبتدي البونص بتاع اللعبة ينزل، يعني هتلاقي الدنيا يئست إنها تطلع ميتينكوا، شوية شوية الدنيا هتبتدي تنور، مش أوي بس مفيش حاجة دايمة.
سنة الحياة هي التغيير، الحياة مينفعش تفضل على طول صعبة، لازم تتغير، ومينفعش كمان تبقى رز بلبن طول الوقت، دة حتى نفسكوا هتموع.
لو بتلعب أي لعبة في الدنيا، في مرحلة كدة بيبتدي فيها البونص إنه ينزل، هدايا أو كروت بتزود الـ سكور بتاعك، مزيكا تتلعب في الخلفية لما تلعب خطوة بحرفنة، أهو المرحلة دي من العلاقة هتلاقي الدنيا بتكافئكوا على اللعب بحرفنة في المراحل التلاتة اللي فاتت.
Level 5
والله وعملوها الرجاااااااااااااااااااااالة ورفعوا راس مصر بلدنا
المرحلة دي، بعد التعارف والاعتراف وتطليع الميتين والبونص، دة الوقت اللي الدبلة فيه بتتحط في الإيد اليمين في حفل عائلي بهيج وسط لفيف من الأصدقاء المقربين.
المرحلة دي بقى، رغم كل الاختلافات اللي ممكن تحصل، رغم الشد والتوتر، رغم المصاريف الكتير، رغم المسئولية اللي بتتحط عليك فجأة، رغم محاولاتك المضنية لإرضاء كل الأطراف، ورغم كل العوء اللي ممكن يحصل، معنديش غير نصيحة واحدة: استمتعوا، استمتعوا، استمتعوا، استمتعوا، استمتعوا، استمتعوا، استمتعوا، استمتعوا، استمتعوا، استمتعوا.
وسمعني سلام يا دبلة الخطوبة عقبالنا كلنا.
