من 10 سنين مكانش عندي الآراء دي، من 10 شهور مكنتش مقتنع ببعضهم، من 10 أيام مكنتش متأكد من قناعتي إنهم حقايق، من عشر دقايق حسمت أمرين تلاتة فيهم.. وبعد 10 أيام مش عارف إيه اللي هيتغير فيهم.
بعضهم اقتنعت بيهم بعد ما وقعت فيهم أكتر من مرة، اتعلمتهم بألم وتجارب شخصية وقصص ناس أكبر وأصغر، مرتبطين ومنفصلين ومقبلين على الانفصال.. وبعضهم لسه بتعلمهم ومش عارف أعيش بيهم.
المهم..
١–إحنا صنفين
في بداية أي علاقة بتسمع الجملتين دول أو ما يعادلهم: “أصله مختلف.. غير أي حد” – “إنت/ي بجد؟ حقيقي/ة يعني؟”.
بتبدأ أي علاقة على إن اللي قدامك مختلف، وبنبقي مصدقين ده قوي، وفي نهاية العلاقة أو نصها -لو استمرت- بيبقى شعارهم همّ الاتنين أغنية إيساف “زي غيرها”.
ليه منبدأش وإحنا جوانا قناعة إن كل الرجالة صنف واحد وكل الستات صنف واحد؟
٢– الجواز مبيقضيش على أهم ٣ مشاكل:
الجنس- الوحدة- الاحتياج للحب.
يمكن بيساهم في حلّهم، لكن مبيشبعش الاحتياج بالكامل.
للإثبات: اسأل مجرب.
٣– الحب قرار
ولأن الـ3 مشاكل دول مبيتحلوش بشكل نهائي، فوصلت لقناعة مبنية على رأي كتير من المتخصصين والمتزوجين إن الحب بجد هو إنك تقرر تفضل تحب وتبقى أمين للشخص اللي إنت مرتبط بيه لما -غصب عنه لأننا بشر- ميقدرش يشبع احتياجاتك في الـ3 مشاكل دول وغيرهم كمان.
4– كلاكيت عشروميت مرة
بنحب، ونفركش.. ونحب تاني.. ونفركش.. ونحب قوي.. ونتخانق ونفركش… ونحب ونفركش.. ونحب..
حقيقة مؤسفة، مش مريحة، مدمرة لأحلام الصغر والكبر وكل حاجة، بس للأسف طلعت حقيقة.. واقع مرير مكانش حد يتمناه.. للأسف طلعت واقع.. بس بنفضل نحب.. ومفيش حب العمر اللي هو الأول الأخير، ومفيش انفصال بيقضي تمامًا على قدرتنا على الحب وتكوين علاقة، فبنفضل كده لحد ما تظبط.
٥– الوقت
كل حاجة وقت، وقت عشان تنسى، وقت عشان تحب، وقت عشان تعرف حد، وقت عشان تقرر وتقول كلمة وتوعد وعد.. وقت عشان متبقاش too late إنك ترجع عن بعض قراراتك عشان تتفادى مشاكل أكبر.
٦– البعبع
الانفصال قبل الخطوبة أفضل من انفصال بعد خطوبة، الانفصال قبل الجواز أكيد أفضل من بعد الجواز.
فكرة الانفصال لازم تكون موجودة مش كبعبع لكن كحاجة طبيعية ممكن تحصل.
“هنكمل مع بعض مهما كان” ده للأسف اكتشفت إنه وهم مشينا وراه بسبب أفلام أنور وجدي وزبيدة ثروت.. طلع مبيحصلش يا بيبي للأسف.. والانفصال شيء صحي أكتر من جواز بمشاكل.
٧- الأهل
لو مش راضيين محتاج تفكر تاني.. تفكر كتير.. تفكر في أهلك.
٨– الاختلافات الدينية
في رأيي المتواضع.. بعيدًا عن حرام وحلال، بس كل الاختلافات ممكن تتحل ما عدا دي.
9- قائد
مش صاحب الصولجان الآمر الناهي، مقصدش صاحب القول الفصل والصوت الشديد والرأي السديد.. لكن لازم يكون فيه رب أسرة بياخد القرارات –حاضر.. بعد مناقشة، آديني قلت أهو- بس موضوع نمشيها مع بعض للأسف مبيأكلش عيش.. أو هيأكل شوية وبعدين هيبقى فيه لبس في الحيط.
10- “الإنسيكيوريتي إيشيوز”.. وما أدراك ما “الإنسيكيوريتي إيشيوز”!
في جيلنا أخدنا الاستقلالية عِند، فكل واحد داخل علاقة خايف من التاني لا يقهره، يستغله، يحجر عليه. والارتباط المبني على حب حقيقي مينفعش يبقى فيه خوف.. نعالجها إزاي؟ معرفش.
المهم مساحات “الإنسيكيوريتي” تبقى أقل ما يكون، لأن مع أول كلاش كبير هتلاقي كرسي في الكلوب وخالتي وخالتك وهات الحاجات.. لأن كل واحد ساعتها هيبقى بيدور على نفسه.. لوجيك أور نوت؟
١١– قوليلهم ضبش حرامي
كل الستات بتدور على راجل “مش شرقي قوي”، مع إن كل الرجالة في مجتمعنا شرقيين، وإن حاولوا يدّعوا أو يجرّبوا يبقوا العكس.
وكل الرجالة بيدوروا على ست بعقلية غربية.. مع إنها عمرها ما هتعرف تبقى كده.
بما إن السفارات بتقفل في وشنا والسياحة ضربت ففيها إيه يا جماعة لو نحط زيتنا على دقيقنا ونقبل حقيقة بعض، إننا شرقيين بدون إضافات؟! يمكن نلاقي حاجات كويسة في بعض وإحنا بعيبنا كده.. نحاول.. يلا.. هتساعدني؟
12- التغيير خسّرنا كتير
هو إحنا بنتغير عشان بعض، ولا بنغيّر بعض عشان نعرف نعيش مع بعض، ولا قابلين اختلافات بعض ومش فارق معانا التغيير؟
13- أصحاب؟ خليكم أصحاب
دقيقة حداد على روح كل علاقة إنسانية كانت ممكن تبقى مثمرة لو فضلتوا أصحاب ومفكرتوش تاخدوا خطوة ناحية الارتباط.
14- عيني فيه وأقول (…)
جيلنا مظلوم في كل حاجة، حتى الجزء المريح اللي كان الواحد متوقع يلاقي سعادته من خلاله طلع أصعب وأعقد مما كنا نتصور أو نتمنى.
شفنا في جيلنا وأجيال سبقتنا حالات كتير من الانفصال -حتى بدون طلاق- ومش بسبب ظروف مادية أو خلافات اجتماعية، ومعظمها كانت علاقات مبشرة جدًا في بدايتها.. ومحدش عارف إيه اللي حصل، ومحدش من اللي لسه ع البر عايز يكرر التجارب دي، ومحدش متطمن، فخايفين، فوقت المشاكل بين الطرفين يا إما كل واحد بيبص على مصلحته فبينفصلوا، يا إما بيحاولوا يلصّموا العلاقة عشان مينفصلوش، ومن كُتر التلصيم بتبقى العلاقة هشّة.. فبتتدشدش.. إحنا بنترعب من الفشل فبنفشل.
15- زَرَعَ…
محتاجين شوية توضيح وإعادة تعريف للمصطلحات اللي زي: “حب – علاقة – أسرة – مشكلة – معضلة – أب – حبيب – زوجة – صاحبة – صداقة … إلخ”.
اللي فات معظمه واقع مؤسف.. يمكن لو اتعاملنا معاه على إنه واقع نعرف نخرج من الشرنقة دي، بدل ما يضيع وقت وجهد وصحة وأعصاب وطاقة في محاولة الهروب منه.
أنا هبدأ بنفسي..
– أنا: أنا بعترف..
– صوت من الفضاء: مفيش حاجة اسمها تبطيل يا على.
