أيوة ده صحيح، الموضوع بيتكلم عن أسس وقواعد الخناق مع الزوج، خلينا نكون صرحاء، مفيش بيت بيخلو من زوجة وزوج بيتخانقوا مع بعض، ولكن عشان الخناق يبقى صحي وميؤديش لخسارة العلاقة الزوجية أو هدم بيت الزوجية أو حتى وجود ضغائن بين الزوجين، عليكو اتّباع النصائح دي، من أجل خناق عادل ميؤديش لأي آثار سلبية.
1- محدش كامل:
دي لازم تكون حقيقة بديهية حاضرة في الذهن عند الخناق، فكل البشر لهم عيوب ومميزات، بما فيهم زوجك وإنتي شخصيًا، عشان كده متطلبيش الكمال من زوجك، مفيش بشري يقدر عليه، حضّري نفسك جيدًا لخناق، ولكن مش بأدلة الهجوم والدفاع، ولكن بالتعاطف واستعداد مسبق للمسامحة والغفران والاعتراف بالخطأ.
2- اتخانقوا في مكان حيادي:
متتخانقيش أبدًا مع زوجك في مكان لحد فيكم فيه سيطرة حقيقية أو نفسية، عشان كده متتخانقوش في مكتب حد فيكم أو في غرفة مخصصة لأي غرض لواحد منكم، وعليكم اختيار مكان حيادي زي غرفة المعيشة، وحاولوا قدر الإمكان البعد عن الخناق في غرفة النوم عشان تكون عندكم ناحيتها دايمًا ذكريات طيبة، وبرضو متتخانقوش أبدًا برة البيت قدام الآخرين.
3- اسمعوا لبعض:
متقاطعيش زوجك أثناء كلامه ومتسيبيهوش بيتكلم من غير ما تسمعي، متبدئيش في تجهيز الردود على كل اللي بيقوله جواكي، اقفلي تمامًا الرغبة دي جوة عقلك وفرغيه تمامًا عشان تعرفي تسمعي له.
4- افتحي قلبك وعقلك:
متسبقيش الأحداث والكلام، فالأشخاص بيتغيروا والأحداث تتغير، متفضليش على نفس أفكارك الجامدة وظنونك البديهية، واللي بديهي النهارده بكرة هيبقى مُستغرب، اسمعي للي بيقوله، ممكن تكتشفي حاجة جديدة.
5- كوني صريحة مع نفسك:
لازم تكوني صريحة مع نفسك قبل ما تكوني صريحة مع زوجك، ومتقوليش الكلام اللي زوجك متوقع إنه يسمعه منك، ولكن قولي اللي بتفكري فيه وبتشعري بيه فعلاً. قدّري نفسك وحبيها واحترميها زي ما هي، هتلاقي إن الاحترام والتقدير ده اتنقل له بشكل تلقائي. كمان متحتفظيش بأسرارك بعيد عنه، لأن الصدق والصراحة هم أساس العلاقة.
6- اتخانقي بعدل:
متستخدميش أبدًا المعلومات الشخصية التي تعرفيها عن زوجك في الهجوم عليه، اللي بيشاركه زوجك معاكي في لحظات الصفا بينكم أمور مينفعش يتم استخدامها أبدًا كوسيلة للهجوم عليه، لأنه لما أفشى لك السر، توقع إنه بيحطه جوة خزينة أمينة وطيبة، ولو طلعتي اللي فيها في الخناقة، توقعي إنه مش هيحكيلك عن أي أسرار تاني.
7- الظروف المناسبة:
متتخانقوش أبدًا وواحد فيكو جعان أو تعبان أو مرهق، الخناق لوحده ضاغط على الأعصاب ومرهق، ومش محتاج عامل إضافي يزوّد العصبية.
8- متهاجميش زوجك لشخصه:
متذكريش عيوب زوجك العامة اللي إنتي عارفاها كويس ومتهاجميش شخصه وطباعه، اتكلمي في الموقف اللي ضايقك منه واللي بتتخانقوا بسببه، متجيبيش حاجات من الماضي.
9- متمليش عليه أفكاره:
متفرضيش رأيك في اللي بيفكر فيه أو يحس بيه، سيبيه هو يقولك اللي حاسس بيه من نفسه، متخمِّنيش اللي عايز يقوله، ومتسقطيش مشاعرك وأفكارك عليه، وساعتها الخنافة هتتفرع لأكتر من خناقة جانبية، وهيتوه سبب المشكلة الأصلي والأمل في حلها.
10- سيبي الخناق ياخد مجراه الطبيعي:
متبدأيش خناقة مع زوجك وإنتي متوقعة نهايتها أو عندك خطة للي لازم تنتهي عليه، بالعكس، اسمعي لرأيه، الرأي والرأي الآخر من الأمور المهمة، متبدئيش الخناق متوقعة إنك تنتصري في النهاية، فالخناقة مش معركة لازم تنتصري فيها، هي مجرد موقف عابر لازم ينتهي بطريقة طبيعية وعادلة.
11- التزمي بموضوع الخناقة:
تاني.. لما تتخانقي مع زوجك ده بيكون بسبب موقف معيّن، عشان كده متسيبيش نفسك تاخدك لذكريات المواقف السابقة، ومفيش داعي لذكر الماضي، ولو حاول هو فتحه سدّي عليه الطريق ده، لأنه طريق مسدود ومش بيؤدي لأي نتايج طيبة، وهتلاقوا نفسكم محاصرين داخل دوامة من الاتهامات اللي مش بتنتهي.
12- كوني على طبيعتك:
وقت الخناق، بلاش تتقمصي شخصية تانية مش شخصيتك، ومتتكلميش باللي مش حاسة بيه فعلًا، ومتوعديش بحاجة مش ناوية تعمليها، ولو كنتي مخطئة اعتذري، كلنا بنرتكب أخطاء ومش لازم حد يحاسبنا على كل خطأ، لأن الخطأ سمة بشرية لا بد بها، ولكن دايمًا يمكن تدراكها بالاعتذار الصادق.
13- الخناق مش معركة فايز وخاسر:
اعرفي دايمًا المعلومة دي، ومتحتفظيش بسجل الخناقات والجروح والخيبات السابقة، وتدخَّلي بيها أجوان في مرمى زوجك، في الآخر إنتو اتنين بتحبوا بعض، مش شيء صحي للعلاقة إنكم تكملوا شايلين ضغائن لبعض.
14- استشيروا متخصص:
لو لقيتوا إن جولات الخناق ما بينكم بتدور في دواير مفرغة لا منتهية ومش قادرين توصلوا لحل أو اتفاق يرضيكم، فدي مش نهاية الطريق، بس ده معناه إنه لازم تدخّلوا طرف ثالث في الخناقة اللا منتهية اللي ما بينكم، وأكيد مينفعش يكون حد من أفراد العيلة اللي لازم ميعرفوش أي حاجة عن الخناق المستمر ما بينكم، لأنكم لما تتصالحوا غالبًا هتتجاوزوا عن الموقف ده، بس الأهل عمرهم ما يقدروا يتجاوزوه وبيفضلوا فاكرينه كويس. للسبب ده لو لقيتوا طريق الاتفاق مسدود استشيروا إخصائي العلاقات الزوجية، وكونوا منفتحين في الكلام معاه ومتخبوش أي أسرار، لأن الأسرار هي أول طريق الفشل.
في النهاية.. لازم عليكم انتو الاثنين، تتعاملوا إن الخناق أمر طبيعي يحصل وهو مش نهاية الزواج، هو أمر طبيعي بيمر بيه كل المتزوجين، بس اللي يفرق بين الزواج السعيد والزواج المحبط، هو كيفية الخناق، لأن حتى الخناق لازم تكون له قواعد عشان متنقلبش حياتنا رأسًا على عقب بسبب الأمور التافهة والعابرة التي تعاملنا معها بشكل خاطئ.
المصدر: اضغط هنا
