الحلو مبيكملش غير في رمضان.. دي الحقيقة اللي كلنا لازم نعترف بيها، مهما عملنا ريجيم وقاطعنا الحلويات والسكريات، هيفضل مذاق أشهب حلويات رمضان لا يقاوم، مثلاً قطعة بسبوسة بالقشطة أو كنافة بالمكسرات مع قطايف بالعسل مرصوصين جنب مربع بسبوسة بالبندق، هما أحلى حاجة تدوقها بعد الفطار مع فنجان القهوة أو الشاي..في السطور التالية نشاركك أشهر محلات بيع الحلويات في رمضان بأجواد خامة وألذ طعم وأفضل سعر.
أشهر محلات بيع الحلويات في رمضان
قبل ما تدّبسي في تمن الحلو من المحل الغالي، اسألي مجرب عن أنواع حلويات رمضان في أشهر محلات بيع الحلويات في رمضان، ومفيش حد هيقولك الصح إلا الشيفات وربات البيوت المحترفات.. اللي جرّبوا وداقوا وقالولنا على الخلاصة.. تشتري الحلو منين في رمضان؟
عبد الرحيم قويدر
أول حاجة هتيجي في ذهنك هو الآيس كريم طبعًا، لكن الحقيقة إن قويدر عنده تشكيلة حلويات شرقية هايلة بإجماع كل اللي جرب، خصوصًا الكنافة العثمانلي والأساور والبقلاوة والبسبوسة المحشية. فروع قويدر كتير وأسعاره كمان متفاوتة حسب النوع والكمية.
سدرة
في مصر الجديدة، أرض الجولف. أكتر محل بالإجماع معندوش حاجة نص نص، كله طازة والحلو مظبوط قوي والسعر أحلى، ما عدا القطايف غالية شوية.
إيتوال
إيتوال يعني السعر الحلو والكمية الحلوة والطعم الأحلى، والسنة دي متميز بكنافة الريد فيلفت بالكريمة وتشيز بسبوسة، وفروعه كتير في كل مكان تقريبًا.
ساليه سوكريه
عارفين الجملة بتاعة فخامة الاسم تكفي؟ ساليه سوكريه السنة دي مسيطر في الكنافة، تحديدًا الكنافة بالنوتيلا وعيش السرايا.
الخباز The baker
في المعادي ومدينة نصر ومصر الجديدة والمهندسين، حلوياته الشرقية مبهرة، أكتر حاجة بتميزها إنها خفيفة، ممكن تاكل طبق كامل بدون ما تحس بالتقل أو نفسك تجزع، جرَّبوا منه الكنافة بالمهلبية وبلح الشام بالكريمة والقطايف بالمكسرات والبسبوسة المحشية والسادة.. وكده تقريبًا هكتب المنيو كامل.
العبد
لسّة محافظ على مكانته في رمضان، البسبوسة بالبندق والبقلاوة وطبق الحلويات المشكلة هما أحلى حاجة ممكن تدوقها عنده.
ديوكس Dukes
بولات الكنافة لمحبي الافتكاسات هي أحسن حاجة ممكن تجربها من ديوكس، الكنافة بالتوت والبلح والمانجو، حجمها كويس ومعمولة بميكس محترفين.
مونجيني
مونجيني عامل اختراع اسمه تورتة شرقي، والأجمد إن طعمها ميفرقش عن الصورة المبهرة للإعلان، اللي عنوانه “لم الشامي ع المغربي” ودي حقيقة، جربوها مش هتندموا.
زنوبيا
محل حلويات صغير في التجمع الخامس ومدينة نصر مكرم عبيد، كتير بيشكروا في حلوياته الشرقية خصوصًا الكنافة
والبسبوسة.
*طبعًا جميع المحلات السابق ذكرها بتوصل للبيت دليفري ومرفق صفحات الفيسبوك اللي عليها كل التفاصيل والأسعار، بالإضافة لمحلات تانية كان عليها إجماع، زي تومس وتورتينا وRuffle house التجمع، وكاروسيل Carousel Pastries.. المفاجأة بالنسبة لي كانت خروج لابوار ونولا كب كيك من أي ترشيحات بالإجماع، باعتبارهم الأسوأ في الحلو!
7 نصايح لأشهى حلويات رمضان
ودلوقتي بعد ما اتعرفنا على أشهر محلات بيع الحلويات في رمضان، لازم نتعرف على أنواع حلويات رمضان اللي نقدر نعملها في البيت بنفسنا وننوع فيها بطرق لذيذة وتكات شهية،
- الاقتراحات السابق ذكرها تخص الحلويات الشرقية في المقام الأول، لأن الحلويات الغربي زي الجاتوه والتورتة عادة
بيكون لكل بيت محل مفضل، ومش بالضرورة يكون من المحلات الشهيرة الغالية.. فلو هتشتروا غربي اشتروا من المكان المعتاد ليكم بغض النظر عن القائمة السابقة. - الحلويات الشرقي الحلوة بجد بتتعمل في البيت طازة قبل الفطار على طول، لو بتعرفي تعمليها يبقى الأفضل متشتريش من برّة إلا للضرورة، زي الزيارات وعزومات الإفطار مثلاً.. والإنترنت مليان وصفات مصورة لعمل الحلويات الشرقية.
- حلويات رمضان لها هيبتها يا جماعة، بعيدًا عن الإضافات المبتكرة كل سنة، لكن دايمًا الأصل يكسب في الطعم حتى لو كان الشكل مش ع الموضة.. المهم المعدة تتبسط، ولا إيه؟
- الحلويات الشرقية مش بتتشال في التلاجة، خالص، نهائي، أبدًا.. يفضل تتحفظ في مكان جيد التهوية بعيد عن الحرارة وتتعمل أو تُشترى بكميات قليلة عشان متبوظش في الحر.
- لو هتجربي تعملي حلويات في البيت أو تشتري نوع جديد "مفتكس" من محل حلويات، جربي في كمية صغيرة جدًا، لو الطعم تمام انطلقي، لو لأ يبقى مخسرتيش فلوس وجهد على الفاضي.
- لولا اختلاف الأذواق لبارت السلع، يعني مش بالضرورة اللي يعجبك يعجب غيرك وهكذا، تفضيلات الناس للأطعمة المختلفة متفاوت، عشان كده ممكن محل يكون بيعمل نوع كنافة رائع ونوع آخر سيئ جدًا، طبيعي، لكن المهم في كل الأحوال يكون فيه تنوع وإجماع إن المحل حلوياته حلوة، حتى لو فيه بعض الأصناف خارج التوقعات.
وأخيرًا، لو خلاص أكلتم طبق الحلو المتين من عند أشهر محلات بيع الحلويات في رمضان أو حتى عملتم أنواع حلويات رمضان اللذيذة في البيت، متجروش تبصوا على كمية السعرات الحرارية، هي خلاص استقرت في معدتك بالفعل، متكدّروش نفسكم يا جماعة، المهم متناموش ومارسوا أي نشاط بدني بعد الأكل بساعة ومتزودوهاش في الحلو.. عشان طبعًا صحكتم أحلى.
دمتم للحلو واكلين وبرمضان مبسوطين.
